Yohaannisi Beꞌido Ajjuutaa
9 Ichchashantto kiitanchchay ba malkkataa punniis. Yaatin taani saluwappe saꞌan wodhdhida issi xoolinttiya beꞌaas, qassi xaha ollaa qulppee ayyo imettiis. 2 I ollaa doonaa dooyido wode, wolqqaama itooniyagaa mala cuway ollaappe kiyiis; ollaappe kiyiya cuway awa ayfiyanne carkkuwa xumissiis. 3 Cuwaappe booleti saꞌan wodhdhidosona, qassi saꞌan deꞌiya masimasotuugaa mala maatay etayyo imettiis. 4 Somꞌꞌuwan Xoossaa maatafay baynna asatu xallappe attin, saꞌan deꞌiya maataa woy maata milatiyabaa aybanne woy ay mittanne qohenna mala etayyo odettiis.
5 He asata woranaadan gidennan, ichchashu aginawu seelissanaadan booletuyyo aawatettay imettiis, qassi eti seelissido seelay masimasoy asa dukkiyo wode seelliyogaa mala. 6 He wode asay hayquwa koyana, shin mule demmenna, qassi eti hayqqanawu amottana, shin hayqoy etappe baqatana.
7 Booleti olawu giigettida parata milatoosona; eta huuphiyan worqqa kallachcha milatiyabay deꞌees, qassi eta somꞌꞌoy asa somꞌꞌo milatees, 8 shin eta huuphiya binnaanay macca asaagaa mala, qassi eta achchay gaammotu achchaa mala; 9 eti tiran wottidobay wotaaddarati tiran wottiyo birataa mala. Qassi eta qefetu cenggurssay olawu jaamiya para gaaretu cenggurssaa mala. 10 Hegaa bollikka, masimasuwagaadan dukkiyobay eta goynan deꞌees, qassi etawu eta goynan ichchashu aginawu asaa qohiyo maatay deꞌees. 11 Eta kawoy xaha ollaa kiitanchchaa. A sunttay Ibraawettuwan Abaddoona,* shin ayyo Giriiketto sunttay Apholiyona.*
12 Aayye giido koyroogee aadhdhiis. Hekko! Hegaappe simmin, hara naaꞌꞌati yiiddi deꞌoosona.
13 Usuppuntto kiitanchchay ba malkkataa punniis. Taani worqqaappe oosettida, Xoossaa sinttan deꞌiya yarshshiyosawu kace malabatuppe haasayiyobaa siyaas; 14 malkkataa oyqqida usuppuntto kiitanchchawu hagaadan giis: “Gita shaafan Efiraaxiisan qashettida oyddu kiitanchchata birshsha.” 15 Asaappe, heezzaappe issi kushiya worana mala keeretti uttida saatiyawu, gallassawu, aginawunne layttawu giigissi wottido oyddu kiitanchchati birshshettidosona.
16 Olanchcha paraasatu qooday laatamu shaꞌutoo tammu shaꞌa* gidiyogaa taani siyaas. 17 Qassi taani paratanne eta toggidaageeta ajjuutan beꞌidoy hagaadaana: Paraasati tiran wottidobay tama milatiya zoꞌo, qassi salo milateesinne adilꞌꞌe ciishshaa milatees; hegaa bollikka, paratu huuphee gaammotu huuphiya mala, qassi eta doonaappe tamay, cuwaynne diinnee kiyiis. 18 Eta doonaappe kiyiya tamay, cuwaynne diinnee, ha heezzu boshati, asaappe heezzaappe issi kushiya woridosona. 19 Paratu wolqqay eta doonaananne eta goynaana; ayssi giikko, eta goynati shooshshaa mala, qassi huuphee deꞌiyogeeta; eti hegeetun asaa qohoosona.
20 Shin he boshati woribeenna asati bantta kushetun oottidobaappe zilꞌꞌettidi laamettibookkona; eti daydanttatuyyo, qassi worqqaappe, biraappe, nahaasiyappe, shuchchaappenne mittaappe oosettida, beꞌana woy siyana woy hemettana danddayenna eeqatuyyo goynniyogaa aggibookkona. 21 Qassi eti shemppo woriyo woy iita ayyaanatuura gayttiyo woy pokkiya tuna nagaraa* oottiyo woy wuuqqiyo bantta nagaraappe zilꞌꞌettidi laamettibookkona.