Tasalonqqe Asaassi Xaafettida Naaꞌꞌanttoogaa

1 Xoossaa nu Aawaageetussinne Godaa Yesuus Kiristtoosaageetussi, inttessi Tasalonqqen deꞌiya galchchaassi Phawuloosi, Siliwanoosinne* Ximootiyosi hagaa kiittoos:

2 Laggetiyabi baynna Xoossaa Aawaa kehatettaynne sarotettay, qassi Godaa Yesuus Kiristtoosaagee intteyyo gido.

3 Ishatoo, nuuni intte gaasuwan ubba wode Xoossaa galatana koshshees giidi qoppoos. Intte ammanoy keehi minniiddinne intte ubbay issoy issuwa siiqiyo siiqoy dalggiiddi deꞌiyo gishshawu, nuuni yaatiyogee bessiyaba. 4 Hegaappe denddidaagan, asay naaqqiyobaaninne intte waayettiyoban* ubban intte gencciyogaanne* Xoossan ammanettiyogaa bessiyo gishshawu, Xoossaa galchchatun nuuni ceeqettidi inttebaa yootoos. 5 Hagee Xoossay suure yiggi xeelliyogaa bessiyaba; hegaappe denddidaagan, intte ayyo giidi waayettiyo Xoossaa Kawotettawu bessiya asadan Xoossay inttena xeellana.

6 Xoossay xillo gidiyo gishshawu, intte waayettanaadan oottiyageeti waayettanaadan oottidi, I haluwa kessana. 7 Shin Goday Yesuusi lacottiya taman ba wolqqaama kiitanchchatuura saluwappe yiidi nunaara qoncci beettiyo wode, waayettiya inttena shemppissana; 8 Xoossaa erennaageetu bollinne nu Godaa Yesuusabaa mishiraachchuwawu azazettennaageetu bolli he wode I haluwa kessana. 9 Goday hegeetu bolli pirddidi eta ba sinttappe merinawu xayssana, eti A gita wolqqaappe duuxxana; 10 Nu Goday ba geeshshatuura bonchchettanawu yiyo wode, A ammaniya ubbay, hegaadan, inttekka nuuni yootidobaa ammanido gishshawu an malaalettana.

11 Nuuni hegaa gishshawu intteyyo ubbatoo woossoos; nu Xoossay I xeesido deꞌuwawu bessiya asadan inttena xeellana mala, qassi I ba wolqqan bana ufayssiya loꞌꞌobaa ubbaanne ammanoy denttettin intte oottiyo ubbabaa wurssi polana mala woossoos. 12 Laggetiyabi baynna nu Xoossaa kehatettaadaaninne Godaa Yesuus Kiristtoosaagaadan, inttenan nu Godaa Yesuusa sunttay bonchchettana malanne intte aara issippe bonchchettana mala hegaa woossoos.