Yohaannisi Xaafido Heezzanttoogaa
1 Taani cima bitanee* tumuppe siiqiyo, ta siiqo ishaa Gaayosawu hagaa xaafays.
2 Taani siiqiyogoo, neeyyo* haꞌꞌiigaadan ubbabay giiga gidin, qassi neeni payyatettan deꞌanaadan taani woossays. 3 Ayssi giikko, ishati yiidi neeni tumaa mintta oyqqidoogaa yootin taani keehi ufayttaas; neeni awudekka tumaa ogiyan hemettiyogaa taani erays. 4 Ta naati awudekka tumaa ogiyan hemettiyogaa siyiyogaappe aaruwan tana ufayssiyabi* baawa.
5 Taani siiqiyogoo, neeni ishatussi, haray atto neeni erennaageetussikka oottiyoban ammanettiya asa gidiyogaa bessaasa. 6 Eti galchchaa sinttan ne siiquwabaa markkattidosona. Eti biyosaa hayyanaa Xoossaa ufayssiyagaadan moyssa yedda. 7 Ayssi giikko, eti hara biittaa asaappe aybanne ekkennan, A sunttawu giidi kiyidosona. 8 Hegaa gishshawu, nuuni hegaa mala imattatuyyo kehana* bessees; yaatikko, nuuni tumaayyo etaara issippe oottana.
9 Taani galchchawu aybakko xaafaas, shin eta giddon awudekka aawatanawu koyiya Diyotirefeesi nuuni yootiyobaa aybanne bonchchenna. 10 Hegaa gishshawu, taani biyo wode, I nuna wordduwan mootiyogan* oottiyo iitabay erettanaadan oottana. I hegankka adabennan, ishata mokki ekkanawu ufayttenna, qassi mokki ekkanawu koyiyageeta digganawunne galchchaappe kessanawu malees.
11 Taani siiqiyogoo, loꞌꞌobaa oottiyageeta milatappe attin, iitabaa oottiyageeta milatoppa. Loꞌꞌobaa oottiya asi Xoossaagaa. Iitabaa oottiya asi Xoossaa beꞌibeenna. 12 Eti ubbay Dimexiroosabaa loꞌꞌobaa yootoosona. Tumaara maayiya A deꞌoy hegaa markkattees; nuunikka abaa markkattoos, qassi nuuni markkattiyobay tuma gidiyogaa intte ereeta.
13 Taani neeyyo xaafiyo darobay deꞌees, shin biiriyaninne qalamiyan xaafanawu koyikke. 14 Gidoppe attin, taani mata wode nenaara gayttanawu qoppays; he wode nuuni baazzan haasayana.
Neeyyo saroy gido.
Hagan deꞌiya ishati neeyyo sarotaa kiittoosona. Yan deꞌiya ishata ubbaa saro ga.