Pheexiroosi Xaafido Koyroogaa
1 Yesuus Kiristtoosi kiittido taani Pheexiroosi, Phanxxoosan, Galaatiyan, Qaphphadooqiyan, Isiyaninne Bitiniyan laalettidi haꞌꞌissawu deꞌiya, 2 azazettana malanne Yesuus Kiristtoosa suuttay eta bolli caccafettana mala Xoossay Aaway halchchi uttidoogaadan, ayyaanan geeshshido doorettidaageetuyyo hagaa xaafays:
Xoossay intteyyo laggetiyabi baynna kehatettaanne sarotettaa gujjanaadan woossays.
3 Nu Godaa Yesuus Kiristtoosa Xoossaynne Aaway sabetto; ayssi giikko, I Yesuus Kiristtoosa hayquwappe denttiyogan, deꞌi bayiya hidootawu A gita maarotan nuuni haranttuwa yelettanaadan oottiis; 4 Xoossay musananne xayana danddayenna laataa intteyyo immana. I hegaa intteyyo saluwan minjjiis; 5 intte ammaniyo gishshawu, I ba wolqqan naagiyo intteyyo hegaa minjjiis; I wurssetta wodiyan muleera erettana atotettawu inttena naagees. 6 Koshshiyaba gidikko, dumma dumma paacee inttena haꞌꞌi guutta wodiyawu wayssikkokka, he ubbabaappe denddidaagan intte keehi ufaytteeta; 7 hegaappe denddidaagan, paacettida intte ammanoy Yesuus Kiristtoosi qoncci beettiyo wode intte sabettanaadaaninne bonchchettanaadan oottana danddayees; yaanida intte ammanoy taman geeyikkokka* xayana danddayiya worqqaappe aaruwan goꞌꞌiyaba. 8 Intte Yesuusa mule beꞌi erana xayikkokka, A siiqeeta. Intte haꞌꞌi A beꞌana xayikkokka, A ammaneeta, qassi zawi baynna gita ufayssaa ufaytteeta; 9 ayssi giikko, intte ammanoy intte shemppuwa* ashshanaagaa ammanetteeta.
10 Xoossay erissidobaa yootiya, I intteyyo kehana laggetiyabi baynna kehatettaabaa yootidaageeti ha atotettaabaa yeemottidi oychchidosonanne mintti koyidosona. 11 Kiristtoosa waayiyabaanne hegaappe kaalliya bonchchuwabaa geeshsha ayyaanay markkatti uttido gishshawu, bantta giddon deꞌiya ayyaanay Kiristtoosabaa bessido wodee woy hanotay aybakko eranawu eti ubbatoo pilggidosona. 12 Eti banttayyo gidennan, intteyyo haggaaziyogaa Xoossay etayyo qonccissiis; geeshsha ayyaanay maaddin haꞌꞌi intteyyo odidaageetuppe intte siyido, saluwappe yiida mishiraachchoy aybakko eti xaafidosona. Hegaa kiitanchchatikka eranawu keehi koyoosona.
13 Simi intte kahaa giigissidi oosuwawu gixxi denddite; ubbaban suure qoppiyogaa aggoppite; Yesuus Kiristtoosi qoncci beettiyo wode Xoossay intteyyo kehana laggetiyabi baynna kehatettaa ammanettidi naagite. 14 Xoossaayyo intte azazettiya naata gidiyo gishshawu, intte erenna wode amottiyo amuwadan oottiyogaa aggite, 15 shin inttena xeegida Geeshsha Xoossaadan, intte haniyo ubbaban geeshsha gidite; 16 ayssi giikko, “Taani geeshsha gidiyo gishshawu, intte geeshsha gidana bessees” geetettidi xaafettiis.
17 Qassi oonanne zaggennan ubbaayyo A oosuwadan yiggi xeelliya Aawaa intte xeegikko, haꞌꞌissawu deꞌiyo wodiyan intte oottiyoban Xoossaayyo yayyite. 18 Ayssi giikko, intte xayiyabatun, biran woy worqqan, intte mayzza aawati* inttena laatissido pattenna deꞌuwa ogiyappe laꞌa kiyibeennaagaa* ereeta. 19 Shin qiti baynnanne tilla dorssaagaa mala Kiristtoosa alꞌꞌo suuttan laꞌa kiyideta. 20 Xoossay saꞌaa doomettaappe* kase A eri uttidoogee tuma, shin wodiya wurssettan nu Xoossay inttessi giidi I qoncci beettanaadan oottiis. 21 Intte Yesuusan, A hayquwappe denttidi xoqqu xoqqu oottida Xoossaa ammaniyageeta gidideta; hegaa gishshawu, Xoossaa ammanananne an ammanettana danddayeeta.
22 Intte tumaayyo azazettiyogaappe denddidaagan, inttena* geeshshidi ishanttudan tumuppe gomppan mishettiyo gishshawu, issoy issuwara wozanappe mintti siiqettite. 23 Ayssi giikko, intte xayiya zerettan gidennan, xayenna zerettan,* merinawu deꞌiya Xoossaa qaalan haranttuwa yelettideta. 24 Geeshsha Maxaafay yootiyogaadan, “ashoy* ubbay maata mala, qassi loꞌꞌiya A meray dembbaa ciishshaa mala; maatay shullees, ciishshaykka qoqqofettees, 25 shin Yihoowa qaalay* merinawu deꞌees.” Qassi intteyyo odettida mishiraachchoy he ‘qaalaa.’*