Yohaannisi Beꞌido Ajjuutaa
14 Hegaappe guyyiyan, taani hagaa beꞌaas: Hekko! Dorssay Xiyone Deriyan eqqiis, qassi A sunttaynne A Aawaa sunttay eta somꞌꞌuwan xaafettido, 144,000ti aara deꞌoosona. 2 Taani wolqqaama soossuwagaanne gummiya dadaagaa mala cenggurssay saluwappe yiishin siyaas; qassi taani siyido cenggurssay bantta diittaa diixxiiddi yexxiyageetuugaa mala. 3 Eti araataa sinttan, oyddu kiruubetu sinttaaninne cimatu sinttan ooratta milatiya yettaa yexxoosona; saꞌaappe shamettida 144,000tuppe hara ooninne he yettaa erana danddayibeenna. 4 Eti macca asaara gayttennan geeshsha gididi deꞌidosona; eti geelaꞌo mala. Dorssay awa biikkokka awudenne A kaalliyageeti hageeta. Eti Xoossaayyonne Dorssaayyo koyro gakkida xeera kattaadan asaa giddoppe shamettidosona, 5 qassi eti bantta doonan balettibookkona; etan boree baawa.
6 Qassi taani hara kiitanchchay saluwan* paallishin beꞌaas; I deretu, yaratu, doona* ubbaa haasayiyageetunne asa sheeshshatu ubbaayyo, saꞌan deꞌiyageetuyyo merinaa mishiraachchuwa awaajjees. 7 I ba qaalaa xoqqu oottidi hagaadan giis: “Xoossay pirddiyo saatee gakkido gishshawu, ayyo yayyitenne A bonchchite; simi saluwa, saꞌaa, abbaanne haattaa pulttota medhdhidaagawu goynnite.”
8 Hara naaꞌꞌantto kiitanchchay hagaadan giiddi kaalliis: “A kunddaasu! Pokkiya tuna nagaraa* qaaqqatanaadan oottiya ba* woyne eessaa dereta ubbaa ushshida Gita Baabiloona kunddaasu!”
9 Hara heezzantto kiitanchchay ba qaalaa xoqqu oottidi hagaadan giiddi eta kaalliis: “Ooninne doꞌawunne A misiliyawu goynnikko, qassi ba somꞌꞌuwan woy ba kushiyan malaata wotissikko, 10 Xoossaa hanqquwa wanccan tigido walahettibeenna, A hanqquwa woyne eessaa ikka uyana, qassi geeshsha kiitanchchatinne Dorssay beꞌishin tamaanne diinniya seelay A barchchiya bessana. 11 Qassi eta seelaa* cuway meri merinawu pude kiyees; doꞌawunne A misiliyawu goynniyageeti, hegaadankka, doꞌaa sunttaa malaataa banan wotissiya ooninne gallassinne qammi shemppenna. 12 Xoossaa azazota naagiyanne Yesuusa ammaniyo ammanuwa* mintti oyqqiya geeshshati genccana koshshiyoy hegaassa.”
13 Qassi taani saluwappe hagaadan giishin siyaas: “Hageeta xaafa: Hagaappe sinttanawu Godaara issuwa gididi hayqqiyageeti ufayttoosona. Ayyaanay, ee, eti oottidobay etaara issippe biyo gishshawu, eti bantta daafuraappe shemppona yaagees.”
14 Hegaappe simmin, taani hagaa beꞌaas: Hekko! bootta shaaraa beꞌaas, qassi worqqa kallachchaa ba huuphiyan wottidanne qara baacaa ba kushiyan oyqqida asa naꞌa milatiyagee shaaraa bolli uttiis.
15 Hara kiitanchchay ba qaalaa xoqqu oottidi shaaraa bolli uttidaagaa xeegidi hagaadan giiddi geeshsha* sohuwappe kiyiis: “Cakkiyo saatee gakkido gishshawu, ne baacan cakkiyogaa doomma; ayssi giikko, saꞌaa kattay muleera gakkiis.”* 16 Shaaraa bolli uttidaagee ba baacaa saꞌaa yeddiis, qassi saꞌaa kattay cakettiis.
17 Saluwan deꞌiya geeshsha sohuwappe hara kiitanchchaykka kiyiis; ikka qara baacaa oyqqiis.
18 Hara kiitanchchaykka yarshshiyosaappe kiyiis, qassi ayyo tamaa bolli maatay imettiis. Qassi I ba qaalaa xoqqu oottidi qara baacaa oyqqidaagaa xeegidi hagaadan giis: “Woynee teerido gishshawu, wurccetti uttida saꞌaa woyniya ne qara baacan cakkada, shiishshiyogaa doomma.” 19 Kiitanchchay ba baacaa saꞌaa yeddidi saꞌaa woyniya shiishshiis, qassi I hegaa Xoossaa hanqquwa gishshaa eqqiya, woyniya yedhdhiyo gita sohuwan yeggiis. 20 Parati katamaappe gaxan woyniya yedhdhidosona, qassi woyniya yedhdhiyosaappe kiyida suuttay paratu bixaalaa gakkanaashiininne 300 kilo meetire* gidiya sohuwa gakkanaashin eelliis.