Pheexiroosi Xaafido Koyroogaa
3 Hegaadankka, machchotoo, intte azinatu maataa bonchchite; hegaappe denddidaagan, etappe ooninne Xoossaa qaalaayyo azazettennaba gidikko, intte qaalanne qaattennan intte eeshshaa gaasuwan azazettana danddayees; 2 eti intte haniyo loꞌꞌobaanne* eta wozanappe bonchchiyogaa beꞌido gishshawu yaanana. 3 Intte huuphiya daddiyogaaninne worqqaa wottiyogan woy loꞌꞌiya maayuwa maayiyogan bolla baggaa puulayoppite, 4 shin intte ayyaanan woppu giidinne ashilaalidi, Xoossay keehi maaddiyabadan xeelliyo moorettennaban intte geema wozanaa puulayana koshshees. 5 Ayssi giikko, beni Xoossan ammanettida geeshsha macca asati bantta azinatu maataa bonchchiyogan, hegaadan banttana puulayidosona, 6 Saara Abrahaama ‘godawu’ gaydda, hegaadan ayyo azazettaasu. Intte ubbatoo loꞌꞌobaa oottiyabanne yayyidi aggi bayennaba gidikko, I naata.
7 Hegaadankka, azinatoo, intte eridoogaadan* etaara deꞌiyogaa aggoppite. Xoossay laggetiyabi baynna kehatettan immiyo deꞌuwa etikka inttenaara laattiyo gishshawu, intte woosay teqettenna mala, intteegaa keena mino miishsha gidenna macca asata bonchchite.
8 Wurssettan, intte ubbay qofan issuwa gidite,* sotuwan seelettite, ishanttudan gomppan mishettite, qarettite, qassi ziqqi giite. 9 Iitabawu iitabaa woy cashshawu cashshaa zaaroppite. Shin Xoossay inttena hegaayyo xeegido gishshawu, anjjuwa zaarite; yaatikko, I inttena anjjana.
10 Ayssi giikko, “deꞌuwa siiqanawu koyiyanne loꞌꞌo gallassata beꞌanawu koyiya ooninne ba inxxarssaa iitabaappe naagananne balettiyabaa haasayennaadan ba doonaa naagana bessees. 11 I iitabaappe baqatananne loꞌꞌobaa oottana koshshees, qassi sarotettaa koyananne A naagana koshshees. 12 Ayssi giikko, Yihoowa ayfee xillota xeellees, qassi A hayttay eti wozanappe woossiyo woosaa siyees, shin Yihoowi iitabaa oottiyageeta ixxees.”
13 Intte loꞌꞌobaa wozanappe oottikko inttena ooni qohana danddayii? 14 Shin intte xillotettawu giidi waayettikkokka ufaytteeta. Gidoppe attin, eti yayyiyobaa* yayyoppite, woy hirggoppite. 15 Kiristtoosa bonchchoy bessiyo* Goda oottidi intte wozanan xeellite; intte hidootaabaa oychchiya ubbawu zaaranawu awudekka giigi uttite, shin zaariyo wode ashilaalitenne wozanappe bonchchite.
16 Intte kahay ubbatoo geeshsha gido; yaatikko, intte bolli iitabaa haasayiyageeti iitabaa ayba ogiyan haasayikkokka, intte Kiristtoosa kaalliyo gishshawu loꞌꞌobaa haniyogaappe denddidaagan yeellatana danddayoosona. 17 Ayssi giikko, loꞌꞌobaa oottiyo gishshawu waayettiyogee Xoossaa shene gidikko, iitabaa oottiyo gishshawu waayettiyogaappe hegee keha. 18 Xilloy Kiristtoosi inttena Xoossaakko gattana mala, xillo gidennaageeta merinawu maaddanawu, eta gishshawu nagaraayyo issitoo xallaa hayqqiis. A ashuwan woridosona, shin Xoossay denttiyo wode I ayyaana. 19 Yaatidi, I qasho keettan deꞌiya ayyaanatuyyo awaajjanawu biis; 20 he ayyaanati Nohe wode markkabee keexettishin Xoossay danddayidi* naagiyo wode ayyo azazettibookkona; he markkabee haattaa bolli tookki efin guutta asati, hegeekka, hosppun shemppoti* attidosona.
21 Hegaara geeddarettiya muukettiyogee Yesuus Kiristtoosa dendduwan (bollaappe qitaa diggiyogan gidennan, loꞌꞌo kahawu Xoossaa woossiyogan) haꞌꞌi nuna ashshiiddi deꞌees. 22 Kiristtoosi saluwa biidi haꞌꞌi Xoossaappe ushachcha baggan uttiis, qassi kiitanchchati, maataynne wolqqay deꞌiyogeeti ubbay ayyo haarettidosona.