Ibraawe Asaassi
7 Saleema kawoy, ha Malkkixedeqi, Ubbaappe Xoqqiya Xoossaa kahinee, olan kawota woridi simmiya Abrahaamaara gayttidi A anjjiis, 2 qassi Abrahaami ayyo ubbabawu tammaappe issi kushiya immiis.* Koyruwan A sunttay, “Xillotettaa Kawuwa” geetettidi birshshettees; hegaa bollikka, I Saleema kawuwa, hegeekka, “Sarotettaa Kawuwa.” 3 A aawaynne aayyiya oonakko erettenna, qassi A mayzza aawati oonakko, I awude yelettidaakko woy awude hayqqidaakko xaafettibeenna; hegan I Xoossaa Naꞌaa mala; I ubba wode* kahine gididi deꞌees.
4 Nu mayzza aaway* Abrahaami omooddido murutabaappe tammaappe issi kushiya immido ha bitanee ay keena gitakko akeekite. 5 Asay Abrahaama zeretta* gidikkonne, Leewa naatuppe kahine gididi sunttettiyageeti etappe asirataa shiishshanaadan Higgiyan azazoy imettidoogee tuma; he asati eta ishata. 6 Shin ayyo xuussay etappe gidenna ha bitanee Abrahaamappe asirataa ekkiisinne Xoossay anjjana giido bitaniya anjjiis. 7 Gitatiyagee guuxxiyagaa anjjiyogaa kashi giya asi deꞌenna. 8 Qassi hayqqiya Leewa yara asati asirataa ekkidosona, shin I deꞌiyogaa Geeshsha Maxaafay markkattido hara asikka asirataa ekkiis. 9 Haray atto, asirataa ekkiya Leewikka Abrahaama baggaara asirataa immiis gaana danddayettees, 10 ayssi giikko, A mayzza aaway Malkkixedeqaara gayttiyo wode, I Abrahaama zeretta gididi yelettiichchibeenna.*
11 Leewa yaraa kahinetettan (hegee asawu imettida Higgiya shaaho) wottiyobi baynna asa gidana danddayettiyakko, Aaroona mala gidennan, Malkkixedeqa mala gidana geetettida hara kahinee ayssi denddana koshshii? 12 Kahinetettay laamettiyo gishshawu, Higgeekka laamettana koshshees. 13 Ayssi giikko, ha ubbabay geetettido asi etappe ooninne yarshshiyosan oottibeenna hara yaraappe yiis. 14 Nu Goday Yihudaa zerettaappe yelettidoogee qoncce; shin Muusee he yaraappe yaana kahiniyabaa aybanne yootibeenna.
15 Qassi haꞌꞌi Malkkixedeqa mala hara kahinee denddido gishshawu, hegee nuuyyo keehi qoncciis; 16 I Higgiyadan Leewa yaraappe yiido gishshataassa gidana xayikkonne, ayyo xayana danddayenna deꞌuwa immiya wolqqan hegaadan haniis. 17 Ayssi giikko, Xoossay, “Neeni merinawu Malkkixedeqa mala kahine” yaagidi ayyo markkattiis.
18 Simi kase azazoy mino gidenna gishshawunne maaddenna gishshawu, shaarettiis. 19 Ayssi giikko, Higgee aybanne wottiyobi baynnaagaa oottibeenna, shin Xoossay nuussi immido, appe kehiya hidootay hegaa oottiis, qassi nuuni an Xoossaakko shiiqiiddi deꞌoos. 20 Hegaa bollikka, caaqqido caaqoy baynnan ha kahinee denddibeenna 21 (ayssi giikko, caaqoy baynnan kahine gidida asati deꞌiyogee tuma, shin abaa caaqqida Xoossaa caaquwan kahine gidida uri deꞌees; I hagaadan giis: “Yihoowi, ‘Neeni merinawu kahine’ yaagidi caaqqiis, qassi I ba qofaa laammenna”*); 22 Yesuusi koyroogaappe kehiya maachchawu waabe* gidiis. 23 Hegaa bollikka, eti haggaaziiddi deꞌenna mala hayqoy diggiyo gishshawu, daro kahineti kaalli kaallidi haggaazidosona, 24 shin I merinawu deꞌiyo gishshawu, A kahinetettan kaalli kaallidi haggaaziyageeti deꞌokkona. 25 I ba sunttan Xoossaa woossiyageeta maaddanaadan Xoossaa oychchanawu awudekka deꞌiyo gishshawu, eta muleera ashshanawu danddayees.
26 Ayssi giikko, ammanettiya, iitatetti baynna, geeshsha, nagaranchchatuppe dummatiya, qassi Xoossay salotuppe bollawu xoqqu xoqqu oottido hegaa mala gita kahinee nuuyyo koshshees. 27 I he gita kahinetu mala gidenna gishshawu, koyro ba nagarawu, qassi hegaappe simmin asaa nagarawu ubba galla yarshshuwa gattana koshshenna; ayssi giikko, I issitoo xalla yarshshuwawu bana aattidi immiis, qassi hegee asaa merinawu maaddees. 28 Ayssi giikko, Higgiyan gita kahine gididi sunttettiyageeti nagaranchcha, shin Higgiyappe simmin caaqqido caaquwadan, merinawu wottiyobi baynnaagaa gidida Naꞌay sunttettiis.