Yohaannisi Beꞌido Ajjuutaa
3 “Sarddeesan deꞌiya galchchaa kiitanchchaayyo hagaadan gaada xaafa: Xoossaa ayyaanati laappunatinne laappun xoolintteti deꞌiyogee yootiyobati hageeta: ‘Taani ne oosota, neeni hayqqidaba gidikkokka, paxa deꞌiyaba milatiyogaa* erays. 2 Beegotta utta, qassi ta Xoossaa sinttan neeni oottiyobati polettibeennaagaa taani beꞌiyo gishshawu, hayqqanawu giigi uttidabata mintta. 3 Hegaa gishshawu, neeni ekkidobaanne siyidobaa hassayiyogaanne naagiyogaa aggoppa, qassi zilꞌꞌettada laametta. Neeni beegotta uttennaba gidikko, taani kaysodan yaana, qassi taani yiyo saatiya neeni mule erakka.
4 “ ‘Gidoppe attin, bantta maayuwa qitayibeenna keehi guutta asati* Sarddeesan ne giddon deꞌoosona, qassi eti he bonchchoy bessiyogeeta gidiyo gishshawu, bootta maayuwa maayidi tanaara hemettana. 5 Xooniya asi hegaadan bootta maayuwa maayana, qassi taani deꞌo maxaafaappe A sunttaa mule xayssikke,* shin taani ta Aawaa sinttaaninne A kiitanchchatu sinttan A sunttaa erays gaana. 6 Ayyaanay galchchatuyyo yootiyobaa hayttay deꞌiyo uri siyo.’
7 “Pilaadelifiyan deꞌiya galchchaa kiitanchchaayyo hagaadan gaada xaafa: Geeshshay, tumay, Daawita qulppee awu deꞌiyogee, ooninne gorddennaadan oottidi dooyiyageenne ooninne dooyennaadan oottidi gorddiyagee yootiyobati hageeta: 8 ‘Taani ne oosota erays—hekko! ooninne gorddana danddayenna, dooyettida penggiya ne sinttan wottaas. Qassi ne wolqqay laafa gidikkonne, neeni ta yootidobaa naagidoogaanne ta sunttaayyo ammanettiyogaa bessidoogaa taani erays. 9 Ayhuda gidana xayikkonne banttana Ayhuda giidi worddotiya, Seexaanaa shiiqo keettaa asata, hekko! taani eti yiidi ne tohuwa sinttan gulbbatanaadaaninne* taani nena siiqiyogaa eranaadan oottana. 10 Qassi ta genccaabaa yootidobaa neeni naagido* gishshawu, saꞌan deꞌiyageeta paaccanawu kumetta saꞌan yaana paaciya saatiyappe taani nena naagana. 11 Taani elle yaana. Neeyyo deꞌiyabaa mintta naagiyogaa aggoppa; yaatikko, ne kallachchaa ooninne ekkenna.
12 “ ‘Xooniya asa taani ta Xoossaa garuwan tuussa oottana; I yaappe mule kiyenna, qassi taani A bolli ta Xoossaa sunttaanne saluwappe Xoossaa matappe wodhdhiya ta Xoossaa katamaa, Ooratta Yerusalaame sunttaanne ta ooratta sunttaa xaafana. 13 Ayyaanay galchchatuyyo yootiyobaa hayttay deꞌiyo uri siyo.’
14 “Lodooqiyan deꞌiya galchchaa kiitanchchaayyo hagaadan gaada xaafa: Ammanettiya tumu markkay, Xoossay medhdhidobatu doomettay, Aminꞌꞌi giyogee yootiyobati hageeta: 15 ‘Ne oosota, neeni irxxennaagaa, woy michchennaagaa erays. Neeni irxxiyakko woy hankkoode michchiyakko taani ixxikke. 16 Simi neeni michchennan woy irxxennan aggada, dombboloꞌꞌa gidiyo gishshawu, taani nena ta doonaappe cuchchana hanays. 17 Neeni, “Taani dure, taayyo daro miishshaynne aqoy deꞌees, aybinne taayyo koshshenna” yaagikkonne, neeni ufayttenna asa, laafa, hiyyeesa, qooqenne kallottida asa gidiyogaa erenna gishshawu, 18 neeni duretana mala taman geeyida worqqaa, harati ne kalluwa beꞌin neeni yeellatennaadan maayana mala, bootta maayuwa, qassi neeni xeellana mala, ne ayfiyawu xaliya taappe shammanaadan taani nena zorays.
19 “ ‘Taani siiqiyogeeti ubbay ay balidaakko eta bessaysinne seerays. Hegaa gishshawu, Xoossaayyo wozanappe haggaazanne zilꞌꞌettada laametta. 20 Hekko! Taani penggen eqqada kariya qoxxays. Ooninne taani haasayiyogaa siyidi penggiya dooyikko, taani A soo gelada kahuwa aara maana, ikka tanaara maana. 21 Taani xoonada ta Aawaa araatan aara uttidoogaadan, xooniya asi tanaara ta araatan uttanaadan maataa immana. 22 Ayyaanay galchchatuyyo yootiyobaa hayttay deꞌiyo uri siyo.’ ”