Yohaannisi Beꞌido Ajjuutaa

2 “Efisoonan deꞌiya galchchaa kiitanchchaayyo hagaadan gaada xaafa: Laappun xoolintteti A ushachcha kushiyan deꞌiyogee, qassi xomppiya wottiyo laappun worqqa miishshatu giddon hemettiyagee yootiyobay hagaa: 2 ‘Taani ne oosota, ne daafuraa, ne genccaanne neeni iita asata ne giddon wottennaagaa erays, qassi kiitettidaageeta gidana xayikkonne, banttana kiitettidaageeta giyageeta paaccada, eti worddanchcha gidiyogaa neeni beꞌidoogaakka erays. 3 Neeni genccaydda deꞌaasa, qassi ta sunttaa gishshawu waayettayddakka, taayyo haggaaziyogaa aggabaakkanne shuggabaakka. 4 Gidoppe attin, neban tana ufayssennabay hagaa: neeni ne koyro siiquwa aggadasa.

5 “ ‘Hegaa gishshawu, neeni awappe kunddidaakko hassaya, qassi zilꞌꞌetta laamettada, neeni koyro oottidobata ootta. Neeni yaatana xayikko, taani neekko yaana, qassi neeni zilꞌꞌettada laamettana xayikko, ne xomppiya A sohuwappe diggana. 6 Shin neeni oottiyo loꞌꞌobay hagaa: Niiqoolaaweta giyo citay oottiyo, taanikka ixxiyobaa ixxaasa. 7 Ayyaanay galchchatuyyo yootiyobaa hayttay deꞌiyo uri siyo: Xoossaa gannatiyan deꞌiya deꞌo mittaa ayfiya miyo maataa taani xooniya asassi immana⁠.’

8 “Samirnneesan deꞌiya galchchaa kiitanchchaayyo hagaadan gaada xaafa: Hayqqidaageenne zaarettidi deꞌiyagee, ‘Koyroogeenne Wurssettaage⁠e’ yootiyobati hageeta: 9 ‘Taani ne waayiyanne ne hiyyeesatettaa erays, shin neeni dure, qassi Ayhuda gidana xayikkonne, banttana Ayhuda giyageeti nena toochchiyobaakka erays, shin eti Seexaanaa shiiqo keetta. 10 Neeni waayettanabata yayyoppa. Hekko! Intte muleera paacettana mala, Dabloosi intteppe issota issota qasho keettan yeggiyogaa awudenne aggenna, qassi intte tammu gallassi waayettana. Haray atto hayqqikkokka, ammanettiyagaa gidiyogaa bessa, qassi taani neeyyo deꞌuwa kallachchaa immana. 11 Ayyaanay galchchatuyyo yootiyobaa hayttay deꞌiyo uri siyo: Xooniya asi mule naaꞌꞌantto hayquwa hayqqenna⁠.’

12 “Pherggaamoonan deꞌiya galchchaa kiitanchchaayyo hagaadan gaada xaafa: Naaꞌꞌu zooziyan qanxxiya adussa, qara bisoy deꞌiyogee yootiyobati hageeta: 13 ‘Neeni deꞌiyosaa, hegeekka, Seexaanaa araatay deꞌiyo sohuwa taani erays; gidoppe attin, neeni ta sunttaa mintta oyqqadasa, qassi Seexaanay deꞌiyosan, haray atto taayyo ammanettida markkaa, intte miyyiyan worido Anttiphaasa wodekka neeni tana ammaniyogaa aggabaakka.

14 “ ‘Gidoppe attin, neban tana ufayssenna amaridabay deꞌees; Israaꞌeela naati eeqatussi yarshshettidabaa maanaadaaninne pokkiya tuna nagaraa* oottanaadan eta sinttan xubbiyabaa wottana mala Baalaaqa tamaarissida Balaama timirttiya baqqi oyqqidaageeti ne giddon deꞌoosona. 15 Hegaadankka, Niiqoolaaweta giyo citay tamaarissiyobaa baqqi oyqqidaageetikka ne giddon deꞌoosona. 16 Simi zilꞌꞌettada laametta. Neeni yaatana xayikko, taani neekko elle yaana, qassi ta doonaappe kiyiya adussa bisuwan etaara olettana.

17 “ ‘Ayyaanay galchchatuyyo yootiyobaa hayttay deꞌiyo uri siyo: Taani genttido mannaappe amaridaagaa xooniya asassi immana, qassi ayyo bootta muylaa immana; A ekkiya urappe attin hara ooninne erenna ooratta sunttay he muylaa bolli xaafettiis⁠.’

18 “Tiyaxiroonan deꞌiya galchchaa kiitanchchaayyo hagaadan gaada xaafa: Tamaa laco mala ayfeenne loꞌꞌo nahaasiya mala tohoti deꞌiyo, Xoossaa Naꞌay yootiyobati hageeta: 19 ‘Taani ne oosota, ne siiquwa, ne ammanuwa, haggaazaanne genccaa, qassi neeni koyro oottidobatuppe haꞌꞌi oottiyobati aadhdhiyogaa erays.

20 “ ‘Gidoppe attin, tana neban ufayssennabay hagaa: Xoossay erissidobaa yootays giya maccaasiyo Elzzaabeelo hanqqettakka; pokkiya tuna nagaraa* oottanaadaaninne eeqatussi yarshshettidabaa maanaadan, A ta aylleta tamaarissawusunne balettawusu. 21 Taani A zilꞌꞌettada laamettanaadan naagaas, shin A zilꞌꞌettada pokkiya ba tuna nagaraappe* laamettanawu koyukku. 22 Hekko! Taani A gashetanaadan oottana, qassi iira wodiraa laammiyageeti zilꞌꞌettidi iigaa mala oosuwappe laamettana xayikko, etikka keehi waayettanaadan oottana. 23 Qassi taani I naata boshan worana; yaatin, gomppan asi qoppiyobaanne* wozanaa qoriyagee tana gidiyogaa galchchati ubbay erana, qassi taani intteyyo intte oosuwadan oosuwadan immana.

24 “ ‘Gidoppe attin, Tiyaxiroonan deꞌiya, “Seexaanaabaa geemmida yoho” giyobaa eribeenna, Elzzaabeeli timirttiya ekkenna ubbatussi yaagays: Taani harabaa aybanne inttena toossikke. 25 Shin intteyyo deꞌiyabaa taani yaana gakkanaashin mintti oyqqite. 26 Qassi xooniyagaassinne taani azazidobaa wurssettay gakkanaashin naagiyagaassi dereta haariyo maataa taani immana, 27 hegaa bollikka, taani ta Aawaappe ekkidoogaadan, asay urqqa miishshaadan kinchchettana mala, I eta birata xamꞌꞌan heemmana. 28 Qassi taani bakkaaliya ayyo immana. 29 Ayyaanay galchchatuyyo yootiyobaa hayttay deꞌiyo uri siyo⁠.’