Yohaannisi Beꞌido Ajjuutaa
7 Hegaappe guyyiyan, oyddu kiitanchchati saꞌawu oyddu zooziyan eqqidi, saꞌawu oyddu ginaappe carkkiya carkkota mintti oyqqidaageeta beꞌaas; hegaappe denddidaagan, saꞌaa bolli woy abbaa bolli woy ay mitta bollinne carkkoy carkkana danddayenna. 2 Qassi away kiyiyosaappe* wodhdhiya hara kiitanchchay merinawu deꞌiya Xoossaa maatafaa oyqqidaagaa beꞌaas; saꞌaanne abbaa qohiyo maatay imettido oyddu kiitanchchata I ba qaalaa xoqqu oottidi xeegiis; 3 hagaadan giis: “Nu Xoossaa aylletu somꞌꞌuwan nuuni attamana gakkanaashin, saꞌaa woy abbaa woy mittata qohoppite.”
4 Qassi eta bolli attamidoogeetu qoodaa siyaas; Israaꞌeela naatu yaratu ubbaa giddoppe attamettidaageeti 144,000:
5 Yihudaa yaraappe attamettidaageeti 12,000;
Roobeela yaraappe 12,000;
Gaada yaraappe 12,000;
6 Aseera yaraappe 12,000;
Nifttaaleema yaraappe 12,000;
Minaase yaraappe 12,000;
7 Simoona yaraappe 12,000;
Leewa yaraappe 12,000;
Yisaakoora yaraappe 12,000;
8 Zaabiloona yaraappe 12,000;
Yooseefa yaraappe 12,000;
Biniyama yaraappe attamettidaageeti 12,000.
9 Hegaappe simmin, taani hagaa beꞌaas: hekko! ay asinne qoodana danddayenna keehi cora asay dere ubbaappe, yara ubbaappe, asa sheeshsha ubbaappenne doona* ubbaa haasayiyageetuppe bootta kaabbaa maayidi, araataa sinttaaninne Dorssaa sinttan eqqiis; qassi eti zambbaa tashiya bantta kushiyan oyqqidosona. 10 Eti bantta qaalaa xoqqu oottidi, “Araatan uttida Xoossaynne Dorssay nuna ashshidosona” yaagoosona.
11 Araataanne cimata, qassi oyddu kiruubeta yuuyi aadhdhidi eqqida kiitanchchati ubbay araataa sinttan gulbbatidosonanne Xoossawu hoolidosona;* 12 hagaadan giidosona: “Aminꞌꞌi! Sabay, gitatettay, hayyoy, galatay, bonchchoy, wolqqaynne minotettay meri merinawu nu Xoossaayyo gido. Aminꞌꞌi.”
13 Hegaappe simmin, cimatuppe issoy tana, “Bootta kaabbaa maayidaageeti hageeti oonee, qassi eti awuppe yiidonaa?” yaagidi oychchiis. 14 Yaagin, sohuwara taani A, “Ta godawu, hegaa eriyay nena” yaagaas. Qassi I taayyo hagaadan giis: “Hageeti gita waayiya kanttidi yiidaageeta, qassi eti bantta kaabbata Dorssaa suuttan meeccidosonanne booxissidosona. 15 Eti Xoossaa araataa sinttan eqqidoy hegaassa, qassi eti A garuwan gallassinne qammi ayyo geeshsha haggaazaa haggaazoosona; araatan uttidaagee ba dunkkaaniya eta bolli miccana. 16 Eti hagaappe guyyiyan mule namisettokkona woy saamettokkona; qassi eta away meenna woy suulliya mishoykka xuuggenna; 17 ayssi giikko, araataa matan* eqqida Dorssay eta heemmananne deꞌuwa haattaa pulttotukko kaalettana. Qassi Xoossay eta ayfiyappe afutta ubbaa quccana.”