Tiitussi
3 Ishati deriya ayssiyageetuyyonne maataawatuyyo haarettanaadaaninne azazettanaadan, qassi loꞌꞌo ooso ubbawu giigi uttanaadan hassayissiyogaa aggoppa. 2 Eti obaakka iitabaa haasayennaadan, qassi ooyettennaadan hassayissa; hegaa bollikka, zozzu geennaadaaninne asa ubbawu awudekka ashilaalanaadan* hassayissa. 3 Ayssi giikko, nuunikka kase eeyyata, azazettennaageeta, asi balettidoogeeta, dumma dumma amossi aylledan haarettidaageeta, ufayttiyoba xalaalaa koyidaageeta, iitiiddinne qanaatiiddi deꞌidaageeta, qassi asi ixxiyogeetanne issoy issuwa ixxiyageeta.
4 Shin nuna ashshiya Xoossay ba kehatettaanne asaa I siiqiyogaa bessiis. 5 Nuuni ayba xillo oosonne oottido gishshataassa gidennan, I ba maarotaappe denddidaagan nuna ashshiis; I nuna geeshshidi* deꞌuwa immiyogaaninne ba geeshsha ayyaanan ooraxissiyogan nuna ashshiis. 6 I nuna ashshiya Yesuus Kiristtoosa baggaara he ayyaanaa nuussi guuppidi* immiis. 7 Nuuni laggetiyabi baynna A kehatettan xillo geetettidi, I immana giidoogaadan merinaa deꞌuwa laattana mala hegaa oottiis.
8 Ha qaalati tuma, qassi ha allalleta neeni etawu mintta yootiyogaa aggennaadan koyays; yaatikko, Xoossaa ammaniyageeti ubbatoo loꞌꞌobaa oottana danddayoosona. Hegeeti loꞌꞌo, qassi asaa maaddoosona.
9 Shin eeyyatetta palaman, mayzzaa qoruwara gayttidaban, walaqettiyobaaninne higgeban ooyettiyoban gelennaadan naagetta; ayssi giikko, hegeeti aynne maaddokkonanne pattokkona. 10 Shaakkiya timirttiya haratussi yootiya ura issitoo mintta zorada* naaꞌꞌanttuwakka gujjin I siyennaba gidikko, aara gayttoppa. 11 Ayssi giikko, hegaa mala uri tumaa ogiyappe sherꞌꞌi giidoogaanne nagaraa oottiyogaa, qassikka I oottidobay A mootiyogaa eraasa.
12 Taani Arxxemaasa woy Tikiqoosa neekko kiittiyo wode, neeni aynne hanada taakko Niqophiliyosa ya. Ayssi giikko, taani balgguwa yan aattanawu qoppaas. 13 Aphiloosassinne Higgiya loytti eriya Zenaasassi ogiyawu koshshiyabi aybinne paccenna mala, eta loytta maadda. 14 Qassi nu asaykka koshshiyaban harata maaddanawu loꞌꞌobaa oottiyogaa meezetana bessees. Yaatikko, eti oottiyoban ayfe xayokkona.
15 Tanaara deꞌiya ubbati nena saro goosona. Nuna siiqiya ammaniyageeta saro ga.
Laggetiyabi baynna Xoossaa kehatettay inttessi ubbaassi gido.