Yohaannisi Xaafido Koyroogaa

1 Doomettaappekka deꞌiya, nuuni siyido, nu ayfiyan beꞌido, tishshi ootti xeellidonne nu kushiyan bochchido deꞌuwa qaalaabaa intteyyo xaafoos; 2 (ee, deꞌoy qoncci beettiis, qassi Aaway immiyo, nuuyyo qoncci beettida merinaa deꞌuwa beꞌida, qassi abaa markkattoosinne intteyyo yootoos), 3 nuuni beꞌidobaanne siyidobaa intteyyokka yootoos; hegaappe denddidaagan, inttekka nunaara issuwa gidana danddayeeta. Qassi nuuni Aawaaranne A Naꞌaa Yesuus Kiristtoosaara issuwa gidoos. 4 Qassi nuuni polidi ufayttana mala hageeta xaafoos.

5 Nuuni intteyyo awaajjiyo, appe siyidobay hagaa: Xoossay pooꞌo, qassi an xumi mule baawa. 6 Nuuni, “Aara nu issuwa” giiddi xuman hemettiyogaa aggennaba gidikko, worddotoos, qassi tumaadan deꞌokko. 7 Gidoppe attin, I pooꞌuwan deꞌiyogaadan nuuni pooꞌuwan hemettikko, nuuni ubbay issuwa gidana, qassi A Naꞌaa Yesuusa suuttay nagara ubbaappe nuna geeshshees.

8 Nuuni, “Nunan nagari baawa” giikko, nuna cimmoos, qassi tumay nunan baawa. 9 Xoossay ammanetteesinne xillo; hegaa gishshawu, nuuni nu nagaraa paaxikko, I nu nagaraa atto gaananne iita ooso ubbaappe nuna geeshshana. 10 Nuuni, “Nagara oottibookko” giikko, A worddanchcha kessoos, qassi A qaalay nunan baawa.