Yohaannisi Beꞌido Ajjuutaa
16 Geeshsha* sohuwappe laappun kiitanchchatuyyo gunttidi hagaadan giishin siyaas: “Biidi, laappun keretun deꞌiya Xoossaa hanqquwa saꞌaa bolli gussite.”
2 Koyroogee biidi, ba keriyan deꞌiyabaa saꞌaa bolli gussiis. Yaatin, doꞌaa malaataa banan wotissidanne A misiliyawu goynniya asaa bolli qohiya iita cittoy kiyiis.
3 Naaꞌꞌanttoogee ba keriyan deꞌiyabaa abban gussiis. Yaatin, worido asagaa mala suutta, abbay gidin, A giddon deꞌon deꞌiya mereta* ubbay hayqqiis.
4 Heezzanttoogee ba keriyan deꞌiyabaa shaafatuuninne pulttotun gussiis. Yaatin, eti suutta gididosona. 5 Taani haattaa bolli maatay deꞌiyo kiitanchchay hagaadan giishin siyaas: “Haꞌꞌi deꞌiyanne kasekka deꞌida, ammanettiya Xoossawu, ha pirddata pirddido gishshawu neeni suure, 6 ayssi giikko, eti geeshshatunne neeni erissidobaa yootiyageetu suuttaa gussidosona, qassi uyana mala neeni etayyo suuttaa immadasa; hegee etawu bessiyaba.” 7 Qassi yarshshiyosaappe taani, “Ee, Ne Wolqqawu Zawi Baynna Xoossawu, Yihoowaa,* ne pirdday tumanne suure” yaagiyogaa siyaas.
8 Oyddanttoogee ba keriyan deꞌiyabaa awa ayfiya bolli gussiis; yaatin, asaa taman xuuggiyo wolqqay awa ayfiyawu imettiis. 9 Qassi asaa wolqqaama mishoy xuuggiis, shin eti ha boshatu bolli aawatettay deꞌiyo Xoossaa sunttaa toochchidosona; hegaa bollikka, eti zilꞌꞌettidi laamettibookkonanne A bonchchibookkona.
10 Ichchashanttoogee ba keriyan deꞌiyabaa doꞌaa araataa bolli gussiis. Yaatin, A kawotettay xumiis, qassi eti bantta seelaappe denddidaagan bantta inxxarssaa saxxiyogaa doommidosona, 11 shin eti bantta seelaappenne bantta cittuwappe denddidaagan saluwa Xoossaa toochchidosona, qassi eti bantta oosuwappe zilꞌꞌettidi laamettibookkona.
12 Usuppunttoogee ba keriyan deꞌiyabaa gita shaafaa Efiraaxiisa bolli gussiis; yaatin, away kiyiyosaappe* yiya kawotuyyo ogiya giigissanawu he shaafaa haattay meliis.
13 Qassi taani miimminttiya doonaappe, doꞌaa doonaappenne Xoossay erissidobaa yootays giya worddanchchaa doonaappe shodhdhe milatiya, ayyaanan odettiya heezzu tunabati* kiyishin beꞌaas. 14 Hegeeti daydanttati odissiyobata, qassi eti malaaliyabata oottoosona; hegaa bollikka, eti kumetta saꞌan deꞌiya kawota A Wolqqawu Zawi Baynna Xoossaa gita gallassaa olawu shiishshanawu etakko boosona.
15 “Hekko! Taani kaysodan yays. Beegotti uttiyanne ba maayuwa naagiya asi ufayttees; yaatikko, I kallo hemettennaaninne A yeellayiyabaa asay beꞌennan aggana danddayees.”
16 Qassi Ibraawettuwan Armmageedoona* giyo sohuwa eta shiishshidosona.
17 Laappunttoogee ba keriyan deꞌiyabaa carkkuwa bolli gussiis. Yaatin, geeshsha sohuwan deꞌiya araataappe gunttidi, “Polettiis!” yaagiyobay siyettiis. 18 Yaatin wolqqanttay wolqqammiisinne daday guummiis, qassi taani haasayaa siyaas; hegaa bollikka, asay saꞌan deꞌiyogaa doommoosappe denddida biittaa qaattaappe dummatiya, keehi wolqqaama biittaa qaattay denddiis. 19 Gita katamay shaahettidi heezzu kiyiis, qassi deretu katamati kunddidosona; Xoossay suulliya ba hanqquwa woyne eessaa wanccaa Gita Baabilooniyyo immanawu O hassayiis. 20 Qassi haruuro ubbaynne dereti kichchidosona. 21 Hegaappe simmin, issoy issoy taalantte* keena gidiyagaa deexxiya, wolqqaama shachchay saluwappe asaa bolli wodhdhiis; shachchaa boshay keehi wolqqaama gidiyo gishshawu, asay he boshaappe denddidaagan Xoossaa toochchiis.