Yohaannisi Beꞌido Ajjuutaa
21 Qassi taani ooratta saluwanne ooratta saꞌaa beꞌaas; ayssi giikko, kase saloynne kase saꞌay kichchidosona, qassi hagaappe guyyiyan abbay deꞌenna. 2 Qassi taani geeshsha katamiya, Ooratta Yerusalaama ba azinawu alleeqettida mishira maccaaseedan giigada Xoossaa matappe saluwappe wodhdhishin beꞌaas. 3 He wode, araataappe gunttidi hagaadan giyobaa taani siyaas: “Hekko! Xoossaa dunkkaanee asaara deꞌees, qassi I etaara deꞌananne eti A asa gidana, qassi Xoossay ba huuphen etaara deꞌana. 4 I eta ayfiyappe afutta ubbaa quccana, qassi hagaappe guyyiyan hayqoy woy kayyoy woy zilaassay woy seelay deꞌenna. Kasebati kichchidosona.”
5 Qassi araatan Uttidaagee, “Hekko! Taani ubbabaa ooraxissays” yaagiis. I qassikka, “Ha qaalati ammanettiyabanne tuma gidiyo gishshawu xaafa” yaagiis. 6 Qassi I taayyo hagaadan giis: “Eti polettidosona! Taani doomettaanne wurssettaa, Alifaanne Omeegaa.* Saamettiya ooyyonne taani deꞌuwa haattaa pulttuwappe haattaa coo* immana. 7 Xooniya ooninne hageeta laattana, qassi taani A Xoossaa gidananne I taayyo naꞌa gidana. 8 Shin yayyiyageeti, ammanennaageeti, tunatinne sheneyiyageeti, shemppo woriyageeti, pokkiya tuna nagaraa* oottiyageeti, iita ayyaanatuura gayttiyageeti, eeqiyageetinne worddanchchati ubbay tamaaninne diinniyan eexxiya abban yibidettana. Hegee naaꞌꞌantto hayquwa gishshaa eqqiyaba.”
9 Laappun boshati kumido laappun kereta oyqqida kiitanchchatuppe issoy yiidi taayyo, “Haa ya, taani nena mishira maccaasiyo, Dorssaa machchiyo bessana” yaagiis. 10 Qassi I tana ayyaanaa wolqqan tookkidi gita xoqqa deriya efiisinne geeshsha katamiya Yerusalaama saluwappe Xoossaa matappe wodhdhishin bessiis; 11 A Xoossaa gitatettan phoolawusu. I phoolettay qulxxuxxa burccukkuwadan phooliya, keehi alꞌꞌo shuchchaa yasphphiidiyagaa mala. 12 A gita, xoqqa dirssan direttaasu, qassi penggiyan penggiyan issi kiitanchchay deꞌiyo, 12 penggeti he katameeyyo deꞌoosona; hegaa bollikka, Israaꞌeela naatu 12tu 12u sunttati penggetu bolli woocettidi xaafettidosona. 13 Arshsho baggan heezzu penggeti, huuphessa baggan heezzu penggeti, tohossa baggan heezzu penggetinne arggo baggan heezzu penggeti deꞌoosona. 14 Hiixettida 12 shuchchtikka he katamee dirssawu deꞌoosona; Dorssay kiittidoogeetu 12tu sunttati he shuchchatu bolli 12ti deꞌoosona.
15 Tanaara haasayiyagee katamiyo, I penggetanne I dirssaa likkanawu worqqa maqaa oyqqiis. 16 He katamiya oyddu baggaarakka lagge, qassi I zananay I gomppaa keena. I katamiyo maqan likkiis; A 2,220 kilo meetire* gidana; I zananay, gomppaynne geesay lagge. 17 I qassikka katamee dirssaa likkiis; dirssay asa likettan, qassi kiitanchchaa likettankka 144 wara.* 18 Dirssay yasphphiidiyan gimbbettiis, qassi katamiya qulxxuxxa burccukkuwa mala, walahi baynna worqqa. 19 Katamee dirssaayyo hiixettida shuchchati ubba qommo alꞌꞌo shuchchatun alleeqettidosona: koyro hiixettida shuchchay yasphphiidiya, naaꞌꞌanttoogee sampperiya, heezzanttoogee kelqqedooniya, oyddanttoogee maragidiya, 20 ichchashanttoogee sarddonikisa, usuppunttoogee sarddiyona, laappunttoogee kiristtilooba, hosppunttoogee biralle, uddufunttoogee tophaaziyoniya, tammanttoogee kirisphphiraasisa, isiininttoogee yaakinttiya, tammanne naaꞌꞌanttoogee ametesxxinoosiya. 21 Qassi 12 penggeti 12 inqqota; penggeti issoy issoy issi inqquwa gozddaappe oosettidosona. Hegaa bollikka, katamee wogga ogee qulxxuxxa burccukkuwa mala, walahi baynna worqqa.
22 A Wolqqawu Zawi Baynna Xoossay Yihoowinne* Dorssay iyyo garo gidiyo gishshawu, taani Xoossaa garo he katamen beꞌabeykke. 23 He katamen Xoossaa gitatettay pooꞌissiyo gishshawunne I xomppee Dorssaa gidiyo gishshawu, awa ayfee woy aginay iini pooꞌissana koshshenna. 24 Dereti I pooꞌuwan hemettana, qassi saꞌaa kawoti bantta gitatettaa he katamaa ehaana. 25 Yan qammay deꞌenna gishshawu, I penggeti kumetta gallassaa gorddettokkona. 26 Qassi eti deretu gitatettaanne bonchchuwa yaa efaana. 27 Shin tunabay aybinne, qassi sheneyiyabaanne balettiyabaa oottiya ooninne he katamaa mule gelenna; Dorssaa deꞌo maxaafan xaafettidaageetu xalaalay yaa gelana.