Ibraawe Asaassi
9 Koyro maachchan geeshsha haggaazaaninne saꞌan deꞌiya geeshsha sohuwan oottana bessiyabawu higgee deꞌees. 2 He koyro dunkkaaniyan naaꞌꞌu kifilee deꞌees. Koyro kifiliyan xomppiya wottiyobay, xaraphpheezaynne Xoossaa sintti aattido oyttay deꞌiyosay giigiis; hegee Geeshsha Sohuwa geetettees. 3 Shin naaꞌꞌantto magalashuwappe guyye baggaara Aybippekka Aadhdhiya Geeshshaa giyo kifilee deꞌees. 4 Ixaanaa cuwayiyo, worqqaappe oosettidabaynne A bolli muleera worqqaa tigido maachchaa saaxinee hegan deꞌees; mannay deꞌiyo worqqa xaaroy, Aaroona xamꞌꞌay aacidaageenne maachchaa shuchchati masettidaageeti he saaxiniyan deꞌoosona; 5 qassi maachchaa saaxiniya qumꞌꞌuwa* eta qefee kammido bonchcho kiruubeti A bolli deꞌoosona. Shin haꞌꞌi hegeetubaa wurssi yootiyo wode gidenna.
6 Hageeti hegaadan giigi simmin, kahineti geeshsha haggaazaa haggaazanawu ubbatoo dunkkaaniyawu koyro kifiliya geloosona; 7 shin gita kahinee layttan issitoo barkka naaꞌꞌantto kifiliya gelikkonne, suuttaa ekkennan gelenna; I ba nagarawunne asay erennan oottido nagarawu he suuttaa yarshshuwa yarshshees. 8 Koyro dunkkaanee deꞌiyo wode geeshsha sohuwa geliyo ogee biron qonccibeennaagaa geeshsha ayyaanay hegaadan bessees. 9 He dunkkaanee ha wodiyabawu leemiso, qassi hegee Xoossawu gattiyo imoynne yarshshoy geeshsha haggaazaa haggaaziya asa kahaa wottiyobi baynnaagaa oottana danddayennaagaa bessees. 10 Hegeeti qumaa, ushshaanne higgiya maaran meecettiyogaa* xalaalaara gayttidabata. Hegeeti higgiyan ashuwaban oottana bessiyabata, qassi hanotata sittayiyo wodee gakkanaashin oottoosona.
11 Gidoppe attin, Kiristtoosi gita kahine gidiis, qassi nuuni hegaa anjjuwa ekkida. I gita kahine gididi koyroogaappe aaruwan gitanne wottiyobi baynna, asa kushee oottibeenna, hegeekka, ha meretaabaa gidenna dunkkaaniya geliis. 12 I nuna merinaassi maaddanawu ba suuttaa ekkidi issitoo xalla geeshsha sohuwa geliisippe attin, deeshshatunne mirggotu suuttaa ekkidi gelibeenna; qassi I nuna merinawu ashshees.* 13 Deeshshatunne mirggotu suuttay, qassi tunida asatu bolli toskkayiyo ussee bidinttay Xoossaa sinttan ashuwa geeshshees; 14 shin Kiristtoosa suuttay hegaappe aadhdhees. Kiristtoosi merinawu deꞌiya ayyaanan bana wottiyobi baynna yarshsho oottidi Xoossaayyo gattiis; A suuttay nu kahaa geeshshees, qassi nuuni pattennabaa oottiyogaa aggoos. Hegaa gishshawu, nuuni merinawu deꞌiya Xoossaayyo geeshsha haggaazaa haggaazana danddayoos.
15 I ooratta maachchaa maacissiyagaa gididoy hegaassa; hegaappe denddidaagan, Xoossay I xeegidoogeetuyyo merinaa laataa immana gaana danddayees; hegee hanidoy koyro maachchaa maacetti uttidi oottido nagaraappe eta wozidi laꞌa kessiya A hayquwa gaasuwana. 16 Ayssi giikko, maachchi deꞌiyo wode, maacida asi* hayqqidoogee erettana koshshees; 17 maacida asi paxa deꞌiyo wode, maachchi aynne maaddenna; hegee maaddana mala maacidaagee hayqqana koshshees. 18 Hegaa gishshawu, koyro maachchaykka suutti gukkennan doomettibeenna.* 19 Asawu ubbawu Muusee Higgiya azazota ubbaa yootiyo wode, hiisoophphiya xamꞌꞌan qachchido zoꞌo ikisiya mirggotunne deeshshatu suuttaa haattaara walakkidoogan yeggidi, maxaafaa* bollinne asa ubbaa bolli caccafees; 20 I hagaadan gees: “Hagee intte naaganaadan Xoossay azazido maachchaa suuttaa.” 21 Hegaadankka, I dunkkaaniya bollinne geeshsha* haggaazaa miishshatu ubbaa bolli he suuttaa caccafees. 22 Ee, Higgiyan suutti geeshshiyobay ubbabaa gaana danddayettees, qassi Xoossay suutti gukkennan nagaraa atto gaana danddayenna.
23 Hegaa gishshawu, saluwan deꞌiyabatu misilenne eta gishshaa eqqidaba gididabati yarshshido mehiya suuttan geeyiyogee koshshiyaba gidiis, shin saluwan deꞌiyabatuyyo hegaappe keehi aadhdhiya yarshshoy koshshees. 24 Ayssi giikko, Kiristtoosi saluwa geliisippe attin, tumu sohuwawu misile gidida, kushiyan oosettida geeshsha sohuwa gelibeenna; hegaa gishshawu, haꞌꞌi nu gishshatawu Xoossaa sinttan* deꞌees. 25 Gita kahinee layttan layttan geeshsha sohuwa gelees, qassi I mehiya suuttaappe attin, baagaa yarshshenna; gidoppe attin, Kiristtoosi bana darotoo yarshshana koshshenna. 26 Hankkoode, saꞌay doomettoosappe* hanno gakkanawu I darotoo waayettana koshshees. Shin I bana yarshshidi nagaraa xayssanawunne merinawu maaddanawu issitoo xalla haꞌꞌi wodiya* wurssettan yiis. 27 Asay guyyeppe pirddaa ekkanawu issitoo xalla hayqqiyogee attennaagaadan, 28 Kiristtoosikka darotu nagaraa tookkidi merinawu maaddanawu issitoo xalla yarshshettiis; qassi I naaꞌꞌantto yiyo wode nagaraa xayssanawu yeenna,* shin bana wozanappe koyiyageeta ashshanawu yees.