Yohaannisi Beꞌido Ajjuutaa

1 Ha yohoti Yesuus Kiristtoosi haꞌꞌi qonccissidobata;* Yesuusi mata wode hanana bessiyabata Xoossaa aylletuyyo bessanawu hageeta Xoossaappe ekkiis. Qassi I ba kiitanchchaa kiittidi Xoossaa* aylliyawu Yohaannisawu hegaa bessiis.* 2 Yohaannisi Xoossaa qaalaanne Yesuus Kiristtoosi yootidobaa,* ee, beꞌidobaa ubbaa markkattiis. 3 Keerettida wodee matattido gishshawu, ha hiraagaa qaalata sissidi nabbabiyagee, hegaa siyiyageetinne A giddon xaafettidabata naagiyageeti ufayttoosona.

4 Taani Yohaannisi Isiya moottan deꞌiya laappun galchchatuyyo hagaa xaafays:

Haꞌꞌi deꞌiya, kasekka deꞌida, qassi yiiddi deꞌiya Xoossaynne A araataa sinttan deꞌiya laappun ayyaanati intteyyo laggetiyabi baynna kehatettaa kehanaadaaninne sarotettaa immanaadan amottays; 5 hegaadankka, “Ammanettida Markkay,” “hayquwappe denddiyageetun bayray,” qassi “saꞌaa kawota Haariyagee” Yesuus Kiristtoosikka intteyyo yaatanaadan woossays.

Nuna siiqiyagawunne nu nagaraa aylletettaappe nuna ba suuttan laꞌa kessidaagawu, 6 qassi nuna kawotettanne ba Xoossaayyonne Aawaayyo kahineta oottidaagawu merinawu bonchchoynne minotettay gido. Aminꞌꞌi.

7 Hekko! I shaaraara yaana, ayfe ubbay, qassi caddidaageetikka A beꞌana; saꞌan deꞌiya asaa yara ubbay A gaasuwan kayyottidi ba tiraa bubbuxana. Ee, Aminꞌꞌi.

8 Xoossay Yihoowi,* “Taani Alifaanne Omeegaa,* haꞌꞌi deꞌiya, kasekka deꞌida, qassi yiiddi deꞌiya, ta Wolqqawu Zawi Baynna Xoossaa” yaagees.

9 Yesuusa kaalliyo gishshawu inttenaara waayettiyagee, kawotanaageenne gencciyagee, taani intte ishay Yohaannisi Xoossaabaa yootido gishshawunne Yesuusabaa markkattido gishshawu, Paaxima giyo haruuruwan deꞌays. 10 Geeshsha ayyaanay tana Godaa gallassawu efin, taappe guyyen malkkataadan guummiya cenggurssaa siyaas; 11 hagaadan giis: “Neeni beꞌiyobaa maxaafan* xaafada, Efisoonan, Samirnneesan, Pherggaamoonan, Tiyaxiroonan, Sarddeesan, Pilaadelifiyaninne Lodooqiyan deꞌiya laappun galchchatuyyo kiitta.”

12 Tanaara haasayiyagee oonakko beꞌanawu guyye simmaas; guyye simmada hagaa beꞌaas: xomppiya wottiyo laappun worqqa miishshata, 13 qassi tohuwa gakkiya maayuwa maayidanne ba tiran worqqa danccuwa danccida, asa naꞌa milatiyagaa xomppiya wottiyo miishshatu giddon beꞌaas. 14 Hegaa bollikka, A huupheenne A binnaanay bootta suufiyadan, shachchaadan bootta, qassi A ayfee tamaa lacuwa mala, 15 qassi A tohoti tamaa giddon phaphalqqi giya loꞌꞌo nahaasiya malanne A haasayay wolqqaama soossuwa cenggurssaa mala. 16 A ushachcha kushiyan laappun xoolintteti deꞌoosona, qassi naaꞌꞌu zooziyan qanxxiya, adussa qara bisoy A doonaappe kiyees, qassi A somꞌꞌoy* wolqqaama pooꞌuwa pooꞌiya awa ayfiya mala. 17 Taani A beꞌada, hayqqida asadan A tohuwan kunddaas.

Qassi I ba ushachcha kushiya ta bolli wottidi hagaadan giis: “Yayyoppa. Taani Koyroogaanne Wurssettaagaa, 18 qassi deꞌiyagaa; taani hayqqaas, shin haꞌꞌi deꞌaysinne meri merinawu deꞌana, qassi taayyo hayquwanne Duufuwa* qulppeti deꞌoosona. 19 Simi neeni beꞌidobata, haniiddi deꞌiyabatanne hageetuppe simmin hananabata xaafa. 20 Neeni ta ushachcha kushiyan beꞌido laappun xoolinttetubaanne xomppiya wottiyo laappun worqqa miishshatubaa Xoossay genttidobay hagaa: Laappun xoolintteti laappun galchchatu kiitanchchatu gishshaa eqqiyaba, qassi xomppiya wottiyo laappun miishshati laappun galchchatu gishshaa eqqiyaba.