Yohaannisi Beꞌido Ajjuutaa
12 Hegaappe simmin, taani saluwan gita malaataa beꞌaas: Issi maccaasiya awa ayfiyan alleeqettaasu,* qassi aginay I tohuwappe garssaara deꞌeesinne 12 xoolinttetu kallachchay I huuphiyan deꞌees; 2 hegaa bollikka, A shahaaraasu. Qassi A yelana haniyo gishshawu, leessoy unꞌꞌettin waassaasu.
3 Qassi taani saluwan hara malaataa beꞌaas. Hekko! Tama milatiya issi gita miimminttee deꞌees; ayyo laappun huuphetinne tammu kaceti deꞌoosona, qassi I ba huuphetun laappun kallachchata wottiis;* 4 I saluwa xoolinttetuppe heezzaappe issi kushiya ba goynan goochchiis, qassi eta saꞌawu yibiddiis. Hegaa bollikka, miimminttee yelana haniya maccaasee sinttan eqqi bayiis; yaatidi, A yeliyo wode, I naꞌaa mitti bayana danddayees.
5 Qassi maccaasiya dere ubbaa birata xamꞌꞌan heemmana attuma naꞌaa yelaasu. A yelosaara eti naꞌaa dafidi Xoossaakkonne A araataakko efiidosona. 6 Maccaasiya Xoossay iyyo giigissidonne eti O 1,260 gallassaa mizana sohuwa bazzuwa baqataasu.
7 Qassi saluwan olay denddiis: Mikaaꞌeelinne* A kiitanchchati miimminttiyara olettidosona; miimmintteenne A kiitanchchatikka olettidosona, 8 shin eti xoonettidosona;* hegaappe guyyiyan, etayyo saluwan sohoy xayiis. 9 Hegaa gishshawu, kumetta saꞌaa balettiya, Dabloosanne Seexaanaa giyo beni shooshshay, gita miimminttee duge yibidettiis; I duge saꞌawu yibidettiis, qassi A kiitanchchatikka aara duge yibidettidosona. 10 Taani saluwan gunttidi hagaadan giyogaa siyaas:
“Haꞌꞌi Xoossay asaa ashshiis! A wolqqay xooniis! A Kawotettay eqqiis! A Kiristtoosa aawatettay doommiis! Ayssi giikko, nu ishata gallassinne qammi Xoossaa sinttan mootiyagee duge yibidettiis! 11 Eti Dorssaa suuttaappenne eti markkattiyo qaalaappe denddidaagan A xoonidosona, qassi haray atto, hayqoy tiran kiyinkka bantta shemppuwawu* qarettibookkona. 12 Hegaappe denddidaagan, saluwawunne A giddon deꞌiyageetoo, ufayttite! Dabloosi baayyo guutta wodee attidoogaa eridi, keehi hanqqettidi inttekko duge wodhdhido gishshawu, saꞌawunne abbawu aayyeero.”
13 Miimminttee duge saꞌawu yibidettidoogaa akeekidi, attuma naꞌaa yelida maccaasiyo naaqqiis. 14 Shin maccaaseeyyo gita argganttaa naaꞌꞌu qefeti imettidosona; hegaappe denddidaagan, A paallada, shooshshaa sinttappe aggada, wodiya, wodetanne wodiya baggaa* O mizana sohuwa bazzuwa baana danddayawusu.
15 Maccaasiya shaafan muukettanaadan oottanawu, shooshshay I geeduwan shaafa mala haattaa ba doonaappe cuchchiis. 16 Shin saꞌay maccaasiyo maaddiis, qassi miimminttee ba doonaappe cuchchido shaafaa saꞌay hanggidi mitti bayiis. 17 Hegaa gishshawu, miimminttee maccaasen hanqqettidi, Xoossaa azazota naagiyanne Yesuusabaa markkattiyo oosuwa mintti oyqqida, I naatuppe* attidaageetuura olettanawu biis.