Pheexiroosi Xaafido Naaꞌꞌanttoogaa
2 Gidoppe attin, Xoossay erissidobaa yootoos giya worddanchchati Israaꞌeela asaa giddon deꞌidosona; hegaadan, intte giddonkka worddanchcha asttamaareti deꞌana. He asati intte ammanuwa bashshiya, inttena shaakkiyabaa geeman gelissana, qassi eti banttana wozida godawu ubba ammanettennan ixxidi elle xayana. 2 Hegaa bollikka, daroti etaagaadan yeelli baynnabaa* hanananne eta gaasuwan asay tumaa ogiya toochchana. 3 Qassi eti gagaamettidi yootiyo worddoban inttena balettanawu malana. Shin eta bolli pirddanawu beni maacidobay gamꞌꞌenna, qassi eti xayanaagee attenna.
4 Xoossay nagaraa oottida kiitanchchata eta bolli pirddanaashin sakkana xumaa sanssalatan qachchidi Inxxoroxoosan* oliisippe attin, eta qaxxayennan aggibeenna. 5 Qassi I saꞌaa asaa beni qaxxayennan aggibeenna, shin Xoossaayyo azazettenna asay kumido saꞌaa bolli shohattiya haattaa yeddido wode xillotettaabaa awaajjiya Noha hara laappunatuura ashshiis. 6 Qassi Sadoomanne Gamoora katamata bidintta xallay attana gakkanaashin xuuggidi, eta bolli pirddiis; yaatiyogan, Xoossaayyo azazettenna asatussi sinttappe eta gakkanabaa bessiis. 7 Qassi maari baynna asati yeellaa xayidi* oottiyoban keehi waayettida xillo bitaniya Looxa ashshiis; 8 ayssi giikko, he xillo bitanee eta giddon deꞌiyo wode beꞌiyonne siyiyo iitaban A xillo shemppoy ubba galla seelettiis. 9 Hegaa gishshawu, Xoossawu ammanettiya asata waayiyappe* waati ashshanaakko Yihoowi erees, shin I xillo gidenna asata pirddaa gallassi xayssanawu* waati wottanaakkokka erees; 10 ubba qassi haratu ashuwa tunissanawu geeddiyageetanne maataawata kariyageeta* xayssanawu waati wottanaakko I erees.
Eti xalanne zozza, qassi bonchchettidaageeta toochchanawu yayyokkona, 11 shin kiitanchchati etappe minonne wolqqaama gidikkokka, Yihoowayyo* yayyiyo gishshawu, toochchiyabaa haasayidi eta mootokkona. 12 Shin he asati oyqqidi xayssana mala yelettida, haniyoban yuushshi qoppenna mehiya mala; eti erennabata toochchoosona. Eti xayssiya bantta ogiya gaasuwan xayana; 13 eti qohiya bantta ogiya gaasuwan qohettana.
Eti ashoy amottiyobaa seeta gallassikka oottiyogaa ufayssiyabadan xeelloosona. Shoobettidosan inttenaara eti issippe miyo wode worddo timirttiyan harata balettiyogan keehi ufayttiya* xeleqonne qita. 14 Shunchchoy kumido, nagaraa oottiyogaa aggana danddayenna ayfeti etawu deꞌoosona, qassi eti yeeqiyeeqiyageeta* qaaqqayoosona. Yaaretiyogan gooba wozanay etayyo deꞌees. Eti qanggettida naata, 15 qassi sitta ogiya aggidi wora simmidosona. Eti iita oosuwa woytuwa dosida, Biꞌoora naꞌaa Balaama ogiya kaallidosona, 16 shin I suurebaa oottennan ixxidi amassalettiis. Haasayana danddayenna hariya asadan haasayada hiraagaa yootiyagee jallidi beennaadan diggaasu.
17 Hegeeti haatti baynna pulttuwanne wolqqaama carkkoy laaggiyo shaaraa mala, qassi etawu sakkana xumay giigi uttiis. 18 Aynne maaddennaba gidikkokka, eti keehi koshshiyaba milatiyabaa yootoosona. Eti yeelli baynnabaa* oottidi, asay zaarettidi iitabaa amottanaadan denttettoosona; yaatidi, aggido iitabaa oottanaadan eta qaaqqayoosona. 19 Eti asaa laꞌa kiyeeta giikkonne, banttawu nagaraa aylle; ayssi giikko, issi asi bana haariya ooyyonne* aylle. 20 Eti Godaanne Ashshiya Yesuus Kiristtoosa geeshshidi eriyogan saꞌaa asay oottiyo tunabaappe kessi ekki simmidi, hegeeta zaaretti oottidi xoonettikko, etayyo doomettaappe wurssettay iitiis. 21 Eti xillotettaa ogiya geeshshi eri simmidi banttana azazido geeshsha azazuwappe wora simmiyogaappe hegaa erennan aggiyakko loꞌꞌo. 22 Eti hanidobay ha leemisoy tuma gidiyogaa bessees: “Kanay ba cooshshaakko simmiis, qassi meecettida gudunttiya guyye simmada urqqan gonddorettaasu.”