Tasalonqqe Asaassi Xaafettida Koyroogaa

1 Xoossaa Aawaageetussinne Godaa Yesuus Kiristtoosaageetussi, inttessi Tasalonqqen deꞌiya galchchaassi, Phawuloosi, Siliwanoosinne* Ximootiyosi hagaa kiittoos:

Laggetiyabi baynna Xoossaa kehatettaynne sarotettay intteyyo gido.

2 Nuuni woossiiddi inttena ubbaa hassayiyo wode awudenne Xoossaa galatoos, 3 ayssi giikko, ammanoynne siiqoy denttettin intte oottidobaanne nu Godaa Yesuus Kiristtoosan intteyyo deꞌiya hidootaappe denddidaagan intte genccidobaa, nuuni nu Xoossaanne Aawaa sinttan ubbatoo hassayoos. 4 Ayssi giikko, Xoossay siiqiyo ishatoo, I inttena dooridoogaa nuuni eroos; 5 ayssi giikko, nuuni inttessi giidi intte giddon ay mala asa gididi deꞌidaakko intte eriyogaadan, nuuni yootido mishiraachchoy qaala xalaalan gidennan, wolqqan, geeshsha ayyaanaaninne mino ammanuwan inttekko gakkiis. 6 Qassi intte keehi waayettiiddi geeshsha ayyaanaa maaduwan qaalaa ekkido gishshawu, nunanne Godaa milatideta; 7 hegaappe denddidaagan, waani deꞌana koshshiyakko Maqidooniyaninne Akaayiyan deꞌiya ammaniyageetussi ubbaassi bessideta.

8 Maqidooniyaninne Akaayiyan ubbasan deꞌiya asay intte gaasuwan Yihoowa qaalaa siyiisinne Xoossaa intte ammaniyo ammanoy ubbasan odettiis; hegaappe denddidaagan nuuni harabaa yootana koshshenna. 9 Ayssi giikko, nuuni koyro inttenaara waani gayttidaakko, qassi intte merinawu deꞌiya tumu Xoossawu aylle gidanawu intte eeqata waati aggidaakko he asati ubbatoo yootoosona; 10 qassi Xoossay hayquwappe denttido A Naꞌaa, hegeekka, Xoossay gussana haniyo hanqquwappe nuna ashshiya, saluwappe yiya Yesuusa intte naageeta.