Ximootiyosassi Xaafettida Koyroogaa
4 Gidoppe attin, wodeppe* issoti issoti ayyaanan odettiya balettiyabaanne* daydanttati tamaarissiyobaa siyidi, ammanuwappe shaahettanaagaa Xoossay ba ayyaanan* geeshshidi yootees. 2 qassi suulliya biratan xuuggidobadan eta kahay dammido, sholloore asati yootiyo worddobaa eti siyana. 3 eti asay ekkennaadaaninne gelennaadan teqqoosona, qassi tumaa geeshshi eridi ammaniya asay galatidi maanaadan Xoossay medhdhido qumaa meennaadan azazoosona. 4 Ayssi giikko, Xoossay medhdhido ubbabay loꞌꞌo, qassi galatidi ekkiyo wode aybanne phenqqeshana koshshenna; 5 ayssi giikko, hegee Xoossay yootidobaaninne woosan geeyiis.
6 Neeni hagaa ishata zoriyo wode, Kiristtoos Yesuusayyo loꞌꞌo ogiyan haggaaziya asa gidiyogaa bessana, qassi nuuni ammananaadan maaddiyanne neeni loytta naagido loꞌꞌo timirttiya qaalatun minniyogaanne dicciyogaa neeni bessana. 7 Shin cima macca asay yootiyogaa mala, Xoossaa toochchiya worddo oduwa siyoppa. Gidoppe attin, Xoossawu ammanettanawu halchchada loytta baaxeta. 8 Ayssi giikko, bollaa meezeyiyogee* guuttaa maaddees, shin Xoossawu ammanettiyogee nu deꞌuwan haꞌꞌikka sinttappekka Xoossaappe anjjuwa ekkanaadan oottiyo gishshawu, ubbaban maaddees. 9 Ha yohoy tumanne wozanappe ammanana koshshiyaba. 10 Nuuni minnidi oottiyoynne keehippe baaxetiyoy hegaassa; ayssi giikko, nuuni asa qommo ubbaa, ubbaappe aaruwan ammaniyageeta ashshiya, merinawu deꞌiya Xoossan ammanettoos.
11 Ha azazota yootiyogaanne tamaarissiyogaa aggoppa. 12 Ne yelagatettaa gaasuwan nena ooninne karana koshshenna. Shin haasayiyoban, oottiyoban, siiquwan, ammanuwan, geeshshatettan* waatanaakko ammanettiya asata bessa. 13 Taani yaana gakkanaashin minnada, asaa sinttan nabbabiyogaa, wozanappe zoriyogaanne* tamaarissiyogaa aggoppa. 14 Cimatu citay ba kushiya ne bolli wottido wode Xoossay nebaa odissidoban neeyyo imettida imotaa agga bayoppa. 15 Hageeta yuushsha* qoppa, qassi tishshi gaada ootta; yaatikko, neeni diccaydda deꞌiyogee asa ubbawu qoncci beettana. 16 Harati waatanaakko loytta bessanawunne loytta tamaarissanawu neeyyo danddayettida ubbabaa ootta. Yaatiyo wode, neenikka neeni yootiyobaa siyiyageetikka attiyo gishshawu, hageeta genccada ootta.