Yaaqoobi Xaafidoogaa
2 Ta ishatoo, intte nu gita Godaa Yesuus Kiristtoosa ammaniiddi waanidi asa asappe shaakkeetii? 2 Worqqa migidota ba biradhdhiyan wottidanne loꞌꞌiya maayuwa maayida asinne qitattida maayuwa maayida hiyyeesa asikka intte shiiqidosaa yiyakko, 3 loꞌꞌiya maayuwa maayidaagaa aatti bonchchidi A, “Neeni hagan loꞌꞌosan utta” yaagidi, qassi hiyyeesaa, “Neeni eqqa baya” woykko “Taani yedhdhido oydiya matan utta” yaageetii? 4 Yaatikko, intte giddon zagettay* deꞌennee? Qassi intte iitabaa maaciya daannata gidekketii?
5 Ta siiqo ishatoo, siyite. Ammanuwan dure asata, qassi Xoossay bana siiqiyageetuyyo immana giido Kawotettaa laattiyageeta gidana mala, ha saꞌaa asay hiyyeesadan xeelliyogeeta Xoossay dooribeennee? 6 Inttena huqqunniyageetinne pirdda keettaa goochchi efiyageeti dureta gidokkonaa? 7 Intte xeegettiyo loꞌꞌo sunttaa toochchiyageeti eta gidokkonaa? 8 Geeshsha Maxaafay, “Ne shooruwa nena siiqiyogaadan siiqana bessees” yaagees. Hegaa gishshawu, intte he kawuwa higgiyawu azazettikko, loꞌꞌobaa ootteeta. 9 Shin intte asa asappe shaakkiyogaa aggana xayikko, nagaraa ootteeta, qassi intte mooranchcha gidiyogaa higgee bessees.
10 Ayssi giikko, ooninne Higgiyawu ubbawu azazettiiddi issiban balikko, I higgiya muleera kanttees. 11 Ayssi giikko, “Neeni wodiraa laammana bessenna” giidaagee hagaadankka giis: “Neeni asa worana bessenna.” Neeni wodiraa laammana xayikkonne, asa woriyaba gidikko, higgiya kanttadasa. 12 Laꞌa asaa* higgiyan pirddaa ekkana asatuugaadan haasayiyogaanne haniyogaa aggoppite. 13 Ayssi giikko, maarenna uri maarotay baynna pirddaa ekkana. Maariyogee pirddiyogaappe aadhdhees.
14 Ta ishatoo, issi asi ammanays giiddi hegaa oosuwan bessana xayikko ay maaddii? He ammanoy A ashshana danddayiiyye? 15 Issi ishaayyo woy issi michcheeyyo maayoy deꞌennaba,* qassi gallassawu gidiya qumay baynnaba gidikko, 16 intteppe issi asi asatettawu koshshiyabaa immennan, eta, “Saro ba; nena hoꞌo, qassi kallada deꞌa” giikko, eta ay maaddii? 17 Ammanoykka hegaa mala; nuuni oosuwan bessana xayikko, nu ammanoy hayqqiis.
18 Gidoppe attin, issi asi hagaadan gaana: “Neeyyo ammanoy deꞌees, qassi taayyo oosoy deꞌees; oosoy baynnan ne ammanuwa taayyo bessa, qassi taani ta ammanuwa oosuwan neeyyo bessana.” 19 Neeni issi Xoossay deꞌiyogaa ammanaasa gidennee? Loꞌꞌobaa oottaasa; gidoppe attin, haray atto daydanttatikka ammanoosonanne kokkoroosona. 20 Shin ha akeekay paccidoogoo, oosoy baynna ammanoy pattennaba gidiyogawu naqaashaa koyay? 21 Nu aaway Abrahaami ba naꞌaa Yisaaqa yarshshanawu yarshshiyosan wottido gishshawu, xillo geetettidoy oosuwana gidennee? 22 A ammanoy A oosuwara hashetiyogaanne A ammanoy A oosuwan polettidoogaa beꞌeeta; 23 hegaa bollikka, Geeshsha Maxaafay, “Abrahaami Yihoowa ammaniis, qassi hegaappe denddidaagan Xoossay A xillo asadan xeelliis” yaagiyogee polettiis, qassi I Yihoowi siiqiyogaa geetettiis.
24 Issi asi ammano xalaalan gidennan, oosuwan xillo geetettanaagaa beꞌeeta. 25 Hegaadankka, shaaramuxiya Raꞌaabakka kiitettida asata mokka ekkada hara ogiyara moyssido gishshawu, xillo geetettidoy oosuwana gidennee? 26 Ayyaanay* baynna bollay hayqqidaba gidiyogaadan, oosoy baynna ammanoykka hayqqiis.