Ibraawe Asaassi
3 Hegaa gishshawu, saluwa baanawu xeegettida* geeshsha ishatoo, nuuni A ammanidi abaa asawu yootiyo, kiitettidaagaanne gita kahiniya Yesuusa qoppite. 2 Muusee Xoossaa keettan kumettan ammanettidoogaadan, Yesuusikka bana sunttidaagawu ammanettiis. 3 Ayssi giikko, keettaa keexxiya asi keettaappe aaruwan bonchchettiyogaadan, I* Muuseegaappe aaro bonchchoy bessiyo uradan xeelettiis. 4 Keetta ubbaa keexxida asi deꞌiyogee tuma, shin ubbabaa medhdhidaagee Xoossaa. 5 Guyyeppe odettanabatuyyo naqaasha* gidana mala, Muusee Xoossaa keettan kumettan ammanettidi haggaazida asa, 6 shin Kiristtoosi Xoossaa keettaa bolli sunttettida ammanettida naꞌa. Nuuni nu haasayaa laꞌatettaanne wurssettay gakkanaashin ceeqettiyo hidootaa mintti oyqqikko, A keetta.
7 Hegaa gishshawu, geeshsha ayyaanay hagaadan gees: “Hachchi, intte I yootiyobaa siyikko, 8 intte mayzza aawati tana keehi hanqqetissido wodiyagaadan, bazzuwan tana paaccido gallassaagaadan, intte wozanaa muumissoppite; 9 eti taani oottidobaa 40 layttawu beꞌidaba gidikkonne, tana yan paaccidosona. 10 Hegaa gishshawu, taani he yeletaabaa shenetada, ‘Eti ubbatoo bantta wozanan wora simmoosona, qassi ta ogiya eribookkona’ yaagaas. 11 Yaatin, taani hanqqettada, ‘Eti taani shemppiyosaa gelokkona’ yaagada caaqqaas.”
12 Ishatoo, merinawu deꞌiya Xoossaappe inttena wora zaariyogaappe denddidaagan ammanenna iita wozanay intteppe ooyyonne deꞌenna mala naagettite; 13 shin “Hachchi” giyo gallassa ubban intte issoy issuwa minttettiyogaa aggoppite; yaatikko, nagaray balettiyo wolqqan intteppe ooyyonne wozanay muumenna. 14 Ayssi giikko, nuuni doomettaagaadan wurssettay gakkanaashin ammanettidi deꞌikko, Kiristtoosi ekkidobaa malaa ekkana.* 15 “Hachchi, intte I yootiyobaa siyikko, intte mayzza aawati tana keehi hanqqetissido wodiyagaadan intte wozanaa muumissoppite” geetettidi xaafettiis.
16 Xoossay yootishin siyidaageetinne A keehi hanqqetissidaageeti oonee? Muusee kaalettin Gibxxeppe kiyidaageeta ubbaa gidokkonaa? 17 Hegaa bollikka, Xoossay 40 layttawu etabaa shenetidoogeeti oonee? Nagaraa oottidi bazzuwan hayqqidaageeta gidokkonaa? 18 Qassi I ba shemppiyosaa gelokkona giidi caaqqidoogeeti oonee? Azazettennan ixxidaageeta gidokkonaa? 19 Yaanikko, eti ammanibeenna gishshawu gelibeennaagaa akeekoos.