Ximootiyosassi Xaafettida Koyroogaa
6 Aylleti bantta godata wozanappe bonchchiyogaa aggana koshshenna; yaanikko, Xoossaa sunttaanne I tamaarissiyobaa asay toochchennan aggana danddayees. 2 Hegaa bollikka, ammaniya asatu aylleti eta godati ishata gidiyo gishshawu eta bonchchiyogaa aggana koshshenna. Gidoppe attin, eta loꞌꞌo haggaazan goꞌettiyageeti eti siiqiyo ammaniya ishata gidiyo gishshawu, minnidi etayyo haggaazana koshshees.
Ha yohota eta tamaarissiyogaanne zoriyogaa aggoppa. 3 Ay asinne worddo timirtteta tamaarissiyabanne nu Godaa Yesuus Kiristtoosa tumu* timirttiya woy Xoossaayyo ammanettanaadan minttettiya timirttiya maayennaba gidikko, 4 I keehi otoretteesinne aybanne akeekenna. I qaalatuura gayttidaagan midiididi palametteesinne* ooyettees. Hegee asay qanaatanaadan, ooyettanaadan, sunttaa bashshanaadan,* siranaadan oottees, 5 qassi hegee Xoossawu ammanettiyogan banttawu goꞌettanawu qoppiya, eta qofay moorettidonne tumay etappe kichchiichchido asati laafaban ubbatoo palamettanaadan oottees. 6 Xoossaayyo ammanettiyanne bawu deꞌiyaban ufayttiya* asi keehi goꞌettiyogee tuma. 7 Ayssi giikko, nuuni ha saꞌaa aybanne ekkidi yibookko, qassi appe aybanne ekkidi baana danddayokko. 8 Hegaa gishshawu, nuuni miyobaaninne maayiyoban* ufayttidi deꞌana.
9 Shin duretanawu murttidaageeti paaciyaninne piriyan geloosona, qassi pattennanne qohiya daro amuwan xoonettoosona; eti xayana. 10 Ayssi giikko, miishshaa siiqiyogee qohiyaba ubbawu gaaso; issoti issoti hegaa siiqiyogaappe denddidaagan, Xoossan ammanettiyogaa aggidosonanne banttana keehi qohidosona.*
11 Gidoppe attin, Xoossaayyo haggaaziya nenoo, neeni hageetuppe baqata, shin suurebaa oottanawu, Xoossan ammanettanawu, ne ammanuwa bessanawu, siiqanawu, genccanawunne ashilaalanawu ubbatoo baaxeta. 12 Ammanuwawu loytta oletta; Xoossay nena ayyo xeesidonne neeni daro markkatu sinttan loytta awaajjido merinaa deꞌuwa mintta oyqqa.
13 Ubbabaa deꞌuwan wottiya Xoossaa sinttaaninne Phenxxeniya Philaaxoosayyo loytti markkattida Kiristtoos Yesuusa sinttan taani nena hagaa oychchays: 14 Nu Goday Yesuus Kiristtoosi ba wolqqaa bessana gakkanaashin wottiyobi baynnanne asi amassalenna ogiyan azazuwa naaganaadan taani nena oychchays; 15 ufayttiya wolqqaama Goday hegawu keerettida wodiyan ba wolqqaa bessana. I kawotu Kawuwanne godatu Godaa; 16 hegeetu giddon hayqqana danddayennaagee A xalaala; I shiiqana danddayettenna pooꞌuwan deꞌees; A ay asinne beꞌibeenna woy beꞌana danddayenna. I bonchchettonne A wolqqay merinawu deꞌo. Aminꞌꞌi.
17 Ha wodiya dureti otorettennaadan,* qassi ammanttenna duretettan hidootaa wottiyogaa aggidi, nuuyyo koshshiya ubbabaa immidi dureyiya Xoossan hidootaa wottanaadan yoota.* 18 Loꞌꞌobaa oottanaadan, ee, loꞌꞌo oosuwan duretanaadan, kehidi immanaadan, haratuyyo immanawu wozanappe koyanaadan etayyo yoota; 19 yaatiyogan, Xoossaa matan eti banttayyo buquraa minjjoosona; hegee sinttappe A bolli keexxana shuchchaa loytti hiixxiyogaa mala; yaatikko, eti tumu deꞌuwa mintti oyqqana danddayoosona.
20 Ximootiyosaa, Xoossaa toochchiya pattenna haasayaappenne wordduwan “era” giyo, issoy issuwa phalqqiya qofaappe baqada, Xoossay neeyyo immidobaa naaga. 21 Issoti issoti hegaa mala eraa bessiiddi ammanuwappe wora simmidosona.
Laggetiyabi baynna Xoossaa kehatettay neeyyo gido.