Yohaannisi Beꞌido Ajjuutaa
17 Laappun kereta oyqqida laappun kiitanchchatuppe issoy yiidi taayyo hagaadan giis: “Haaya, daro haattatu bolli uttida gita shaaramuxee bolli pirddettana pirddaa taani nena bessana; 2 saꞌaa kawoti iira pokkiya tuna nagaraa* oottidosona, qassi saꞌan deꞌiyageeti pokkiya I tuna nagaraa* woyne eessan mattottidosona.”
3 Qassi I tana ayyaanaa wolqqan tookkidi bazzuwa efiis. Xoossaa toochchiya sunttati A bolli kumido, laappun huuphetinne tammu kaceti deꞌiyo zoꞌo doꞌaa toggida maccaasiyo beꞌaas. 4 Maccaasiya teerida ochchaa milatiyanne zoꞌo maayuwa maayaasu; A worqqan, alꞌꞌo shuchchatuuninne phooliya alꞌꞌo gozddatun* aleeqettaasu, qassi sheneyiyabatinne pokkiya I tuna nagaraa* dajje oosoti kumido worqqa wanccaa ba kushiyan oyqqaasu. 5 I somꞌꞌuwan ha geema sunttay xaafetti uttiis: “Shaaramuxatunne saꞌan deꞌiya sheneyiyabatu aayyiyo, Gita Baabiloono.” 6 Qassi maccaasiya geeshshatu suuttaaninne Yesuusa markkatu suuttan mattottidoogaa taani beꞌaas.
Taani O beꞌada keehi malaalettaas. 7 Yaanin, kiitanchchay taayyo hagaadan giis: “Neeni ayssi malaalettadii? Taani neeyyo ha maccaaseebaanne laappun huuphetinne tammu kaceti deꞌiyo, A toggido doꞌaabaa geema yohuwa yootana: 8 Kase deꞌikkonne haꞌꞌi baynna, shin xaha ollaappe kiyana haniya, neeni beꞌido doꞌay xayana. Saꞌay doomettoosappe eta sunttay deꞌuwa maxaafan xaafettibeenna, saꞌan deꞌiya asay doꞌay kase deꞌikkonne haꞌꞌi deꞌennaagaa, shin sinttappe deꞌanaagaa beꞌidi malaalettana.
9 “Hagawu akeekaynne* hayyoy koshshees: Laappun huupheti maccaasiya liiphiyan uttido laappun deretu gishshaa eqqiyabata. 10 Qassi kawoti laappuna: Ichchashati kunddidosona, issoy deꞌees, qassi haray gakkiichchibeenna; shin I gakkiyo wode, guutta wodiya takkanaagee attenna. 11 Qassi kase deꞌikkonne haꞌꞌi deꞌenna doꞌay hosppuntta kawuwa, shin I laappunatuppe kiyiis, qassi I xayana.
12 “Neeni beꞌido tammu kaceti kawotettaa biron ekkibeenna tammu kawotu gishshaa eqqiyabata, shin eti doꞌaara issi saate haariyo kawo maataa ekkoosona. 13 Hageetu qofay issuwa; hegaa gishshawu, eti bantta wolqqaanne maataa doꞌaayyo immoosona. 14 Hageeti Dorssaara olettana, shin Dorssay godatu Godaanne kawotu Kawuwa gidiyo gishshawu, I eta xoonana. Xoossay xeegidonne doorido, ayyo ammanettiya, Dorssaara deꞌiyageetikka xoonana.”
15 I taayyo hagaadan giis: “Shaaramuxiya uttido, neeni beꞌido haattati asa sheeshshatu, cora asatu, deretunne doona* ubbaa haasayiyageetu gishshaa eqqiyabata. 16 Neeni beꞌido tammu kacetinne doꞌay shaaramuxiyo ixxana, iyyo deꞌiya ubbabaa ekkirggananne O kalloyana; eti I ashuwa mirggana, qassi O muleera taman xuuggana. 17 Ayssi giikko, Xoossay ba qofaa eti oottanaadan, ee, Xoossaa qaalay polettana gakkanaashin, eti bantta kawotettaa doꞌaayyo immiyogan bantta issi qofaa oottanaadan, I hegaa eta wozanan wottiis. 18 Qassi neeni beꞌido maccaasiya saꞌaa kawota haariya kawotettay deꞌiyo gita katamaa gishshaa eqqiyaba.”