Yohaannisi Beꞌido Ajjuutaa

18 Hegaappe simmin, taani gita maatay deꞌiyo hara kiitanchchay saluwappe wodhdhishin beꞌaas, qassi A gitatettay saꞌan pooꞌissiis. 2 I ba qaalaa xoqqu ootti gunttidi hagaadan giis: “A kunddaasu! Gita Baabiloona kunddaasu, qassi daydanttati deꞌiyo sohonne tuna ayyaana* ubbaynne asi ixxiyo tuna kafo ubbay qatiyo soho gidaasu! 3 Ayssi giikko, pokkiya tuna nagaraa* qaaqqatanaadan oottiya I* woyne eessay dereta ubbaa mattoyiis, qassi saꞌaa kawoti pokkiya tuna nagaraa iira oottidosona; hegaa bollikka, A yeellaa xayada ishalidoogan* saꞌan deꞌiya zalꞌꞌanchchati* duretidosona.

4 Qassi saluwappe harabaakka siyaas, hagaadan giis: “Ta asawu I nagaran gelanawu koyennabanne I boshaappe aybanne ekkanawu koyennaba gidikko, ippe kiyite. 5 Ayssi giikko, I nagaray saluwa gakkanawu kuurettiis, qassi Xoossay I iita oosota* hassayiis. 6 A haratuyyo immidoogaadan iyyo zaaridi immite; A immidobaa naaꞌꞌu kushiya darissidi iyyo zaarite; A walakkido wanccan naaꞌꞌu kushiya darissidi iyyo walakkite. 7 A bana gitayidoogaanne yeellaa xayada ishalidoogaa keenaa waayettanaadaaninne kayyottanaadan oottite. Ayssi giikko, A ba wozanan, ‘Taani kaweedan uttaas, taani amꞌꞌe gidikke, qassi taani mule kayyottikk⁠e’ yaagawusu. 8 I boshati, hayqoy, kayyoynne koshay issi galla yaanay hegaassa, qassi I bolli pirddida Xoossay Yihoowi* mino gidiyo gishshawu, A muleera taman xuugettana.

9 “Iira pokkiya tuna nagaraa* oottidanne yeellaa xayi ishalidi iira deꞌida saꞌaa kawoti A xuugettin kiyiya cuwaa beꞌidi, iyyo azzanidi yeekkananne bantta tiraa bubbuxana. 10 A waayettiyo waayee yashshido gishshawu, eti haahuwan eqqidi, ‘Gita katamee, mino katamee Baabiloonee, Xoossay issi saatiyan ne bolli pirddido gishshawu, nebaa poora, poora⁠!’ yaagana.

11 “Qassi saꞌan deꞌiya zalꞌꞌanchchati eti bayzzanawu ehiyo ubbabaa hegaappe guyyiyan shammiyabi baynna gishshawu, iban yeekkoosonanne kayyottoosona; 12 ee, eti bayzzanawu ehiyo ubbabaa, worqqaa, biraa, alꞌꞌo shuchchata, inqquwa, loꞌꞌo liinuwa, teerida ochcha milatiya maayuwa, harriyanne zoꞌo mayuwa; qassi sawiya mittaappe oosettida ubbabaa; hegaa bollikka, danggarssaa zaaliyappe oosettidabaa qommo ubbaanne alꞌꞌo mittaappe, nahaasiyappe, birataappenne ibinabaradiyappe oosettidabaa; 13 qassi qarafaa, Hindde qimamiya, tonggu giyabaa, shittuwa, ixaanaa, woyne eessaa, wogaraa zaytiya, xiilliya, gisttiya, mehiya, dorssata, parata, gaareta, aylletanne asa shemppota.* 14 Ee, neeni* amottido teeridabay neeppe ekettiichchiis; malꞌꞌiyabati ubbaynne keehippe loꞌꞌiyabati, naaꞌꞌantto mule beettennaadan, ne matappe kichchidosona.

15 “Hageeta bayzzida, I gaasuwan duretida zalꞌꞌanchchati A waayettiyo waayee yashshido gishshawu haahuwan eqqidi, yeekkananne kayyottana; 16 eti hagaadan gaana: ‘Loꞌꞌo liinuwa, teerida ochcha milatiyanne zoꞌo maayuwa maayida, qassi worqqa alleeqotun, alꞌꞌo shuchchatuuninne inqquwan keehi alleeqettida gita katamee, nebaa poora, poora; 17 ayssi giikko, hegaa keena gita duretay issi saatiyan xayiis⁠!’

“Qassi markkabiya laaggiya ubbay, markkabiyan biya ubbaynne abbaa bolli markkabiyan oottiya ubbay haahuwan eqqidi, 18 A xuugettin kiyiya cuwaa xeelliiddi bantta qaalaa xoqqu oottidi, ‘Gita katamee mala ay katami deꞌii⁠?’ yaagidosona. 19 Eti bantta huuphiyan baanaa toskkayiiddi, yeekkiiddinne kayyottiiddi bantta qaalaa xoqqu oottidi, ‘Abban markkabee deꞌiyogeeti ubbay I duretan duretido gita katamiya issi saatiyan xayido gishshawu, ibaa poora, poora⁠!’ yaagidosona.

20 “Saluwawu, geeshshatoo, kiitettidaageetoonne Xoossay erissidobaa yootiyageetoo, Xoossay inttessi giidi I bolli pirddido gishshawu, hegan ufayttite!”

21 Qassi issi mino kiitanchchay gita woxa mala shuchchaa denttidi hagaadan giiddi abban oliis: “Gita katamiya Baabiloona hegaadan yibidettada olettana, qassi A naaꞌꞌantto mule deꞌukku. 22 Hegaa bollikka, diittaa diixxiiddi yexxiyageetu, pulaaliya punniyageetu, uldduuduwa punniyageetunne hara yettanchchatu cenggurssay ne giddon naaꞌꞌantto mule siyettenna. Ay oosonne oottiya asi naaꞌꞌantto ne giddon deꞌenna, qassi woxaa cenggurssi naaꞌꞌantto ne giddon siyettenna. 23 Ay xomppeenne ne giddon naaꞌꞌantto mule pooꞌenna, qassi mishira attumaageenne maccaara haasayishin ne giddon naaꞌꞌantto mule siyettenna; ayssi giikko, ne zalꞌꞌanchchati saꞌan gita asata, qassi neeni iita ayyaanatuura gayttiyogee dereta ubbaa balettiis. 24 Ee, Xoossay erissidobaa yootiyageetu, geeshshatunne saꞌan shuhettidaageetu ubbaa suuttay gukkanaadan A oottaasu.”