Yohaannisi Beꞌido Ajjuutaa
19 Hegaappe simmin, taani saluwan cora asay gunttidi haasayiyoba milatiyabaa siyaas. Eti hagaadan giidosona: “Yaha sabbite!* Nu Xoossay ashshiyagaa, bonchchettidaagaanne wolqqaamaa; 2 ayssi giikko, A pirdday tumanne suure. Pokkiya ba tuna nagaran* saꞌaa bashshida gita shaaramuxee bolli I pirddiisinne A gussido* ba aylletu suuttaa awutiya achchiis.”* 3 Eti sohuwara, naaꞌꞌanttuwakka hagaadan giidosona: “Yaha sabbite!* Qassi ippe kiyiya cuway meri merinawu pude tululattees.”
4 Qassi 24 cimatinne oyddu kiruubeti araatan uttida Xoossaayyo gulbbatidi goynnidosonanne, “Aminꞌꞌi! Yaha Sabbite!”* yaagidosona.
5 Qassi araataappe hagaadan giyobaa siyaas: “Ayyo yayyiya guuttatinne gitati, A aylleti ubbay nu Xoossaa sabbite.”
6 Taani cora asay haasayiyoba milatiyabaa, qassi soossuwagaa malanne wolqqaama dadaagaa mala cengurssaa siyaas. Eti hagaadan giidosona: “A Wolqqawu Zawi Baynna, nu Xoossay Yihoowi* ba kawotetta haaruwa doommido gishshawu, Yaha Sabbite!* 7 Dorssaa bullachchay gakkido gishshawunne A machchiya bullachchawu giigettido gishshawu, simi ufayttoos, ililoosinne A bonchchoos. 8 Ee, phooliya, geeshshanne loꞌꞌo liinuwa maayiyo maatay iyyo imettiis; ayssi giikko, loꞌꞌo liinoy geeshshatu suure oosuwa gishshaa eqqiyaba.”
9 Qassi I taayyo hagaadan giis: “Hagaa xaafa: Dorssaa bullachchaa kahuwawu shoobettidaageeti ufayttoosona.” Qassikka I taayyo, “Hageeti Xoossay yootido tumu yohota” yaagiis. 10 He wode taani ayyo goynnanawu A sinttan gulbbataas. Shin I taayyo hagaadan giis: “Nena yeꞌꞌe! Agga! Nenadaaninne Yesuusabaa markkattiyo oosuwa oottiya ne ishatudan taanikka aylle. Xoossaayyo goynna! Ayssi giikko, Xoossay erissidobaa yootiyo halchchoy Yesuusabaa markkattiyogaa.”
11 Taani saloy dooyettidaagaa, qassi hekko! bootta paraa beꞌaas. A toggidaagee Ammanettiyagaanne Tumanchchaa geetettees, qassi I suure pirddeesinne suure olaa olettees. 12 A ayfeti tamaa laco mala, qassi A huuphiyan daro kallachchati* deꞌoosona. Appe hara ooninne erenna sunttay A bolli xaafettiis. 13 Hegaa bollikka, suuttan xeleqotida* maayuwa I maayiis, qassi Xoossaa Qaalaa giyo sunttan xeegettees. 14 Qassi saluwa olanchchati bootta paraa toggidi A kaalloosona, eti bootta, geeshshanne loꞌꞌo liinuwa maayidosona. 15 Qassi I dereta busakkana mala, adussa qara bisoy A doonaappe kiyees; I birata xamꞌꞌan eta heemmana. Hegaa bollikka, A Wolqqawu Zawi Baynna Xoossaa suulliya hanqquwa gishshaa eqqiya yedhdhiyosan I woyniya yedhdhana. 16 A maayuwa bolli, ee, A wodiraa bolli kawotu Kawuwanne godatu Godaa giya sunttay xaafettiis.
17 Taani awaa giddon eqqida issi kiitanchchaakka beꞌaas, qassi I ba qaalaa xoqqu ootti gunttidi, saluwan* paalliya kafotu ubbaayyo hagaadan giis: “Haa yiite, Xoossaa gita kahuwawu issippe shiiqite; 18 yaatidi, kawotu ashuwa, wotaaddarata azaziyageetu ashuwa, mino asatu ashuwa, paratunne eta toggidaageetu ashuwa, qassi goqatunne aylletu, guuttatunne gitatu ubbaa ashuwa intte maana.
19 Qassi doꞌay, saꞌaa kawotinne eta olanchchati paraa toggidaagaaranne A olanchchatuura olettanawu shiiqidaageeta taani beꞌaas. 20 Qassi doꞌaynne A sinttan malaaliyabaa oottida, Xoossay erissidobaa yootays giya worddanchchay oyqettidosona; he worddanchchay doꞌaa malaataa banttanan wotissidaageetanne A misiliyawu goynniyageeta he malaaliyaban balettiis. Eti naaꞌꞌaykka paxa deꞌiiddi, diinniyan eexxiya tamaa abban yibidettidosona. 21 Shin paraa toggidaagee ba doonaappe kiyiya adussa bisuwan harata woriis. Qassi kafoti ubbay eta ashuwa miidi kallidosona.