Ibraawe Asaassi
8 Nuuni yootiyobawu ayfe qofay hagaa: Nuuyyo hagaa mala gita kahinee deꞌees, qassi I saluwan gita Xoossaa araatawu ushachcha baggan uttiis; 2 I asi gidennan, Yihoowi essido tumu dunkkaaniyaninne geeshsha sohuwan haggaaziyagaa.* 3 Gita kahine ubbay imotaa gattanawunne yarshshuwa yarshshanawu sunttettees; hegaa gishshawu, ikka yarshshuwa yarshshiyogee koshshiyaba gidiis. 4 Higgiyadan imotaa gattiya asati deꞌiyo gishshawu, I saꞌan deꞌiyakko kahine gidenna. 5 Ha asati haggaaziyo geeshsha haggaazay saluwan deꞌiyabatu misilenne eta gishshaa eqqidaba, qassi eesho; Muusee dunkkaaniya giigissana haniyo wode Xoossay azazidobay hegaa bessees; I hagaadan giis: “Taani nena deriya bolli bessidoogaa maaran ubbabaa naagettada ootta.” 6 Shin Yesuusayyo koyro kahinetuugaappe keehi aadhdhiya haggaazay* haꞌꞌi imettiis; ayssi giikko, I hegaadan koyroogaappe kehiya maachchaa maacissiyagaa; he maachchay Xoossay immana giido, koyroogaappe kehiyaban higgiyan minni eqqiis.
7 Koyro maachchay paci baynnaagaa gidiyakko, naaꞌꞌantto maachchi koshshenna. 8 Ayssi giikko, I asaa hagaadan giidi borees: “Yihoowi hagaadan gees, ‘Beꞌite! Taani Israaꞌeela keettaaranne Yihudaa keettaara ooratta maachchaa maacettiyo gallassay yiiddi deꞌees. 9 He maachchay taani eta mayzza aawatu kushiya oyqqada Gibxxe biittaappe eta kaaletta kessido gallassi etaara maacettido maachchaa mala gidenna; eti ta maachchaadan deꞌibeenna gishshawu, taani etayyo qoppiyogaa agga bayaas.’ Hegaa Yihoowi yootees.
10 “Yihoowi hagaadan gees: ‘Ayssi giikko, he gallassatuppe guyyiyan taani Israaꞌeela keettaara maacettana maachchay hagaa: Taani ta higgeta eta kahan wottana, eta wozanankka xaafana. Qassi taani eta Xoossaa gidana, etikka ta asa gidana.
11 “‘Qassi hegaappe guyyiyan etappe ooninne ba biittaa asa woy ba ishaa, “Yihoowa era!” yaagenna. Ayssi giikko, eta ubbaa giddon guuttaappe gitaa gakkanaashin eti ubbay tana erana. 12 Taani eti oottido iitabawu eta maarana, qassi eta nagaraa mule hassayikke.’”
13 I “ooratta maachchaa” giyo wode koyroogaa galꞌꞌa kessiis. Qassi galꞌꞌabaynne ceeggiyabay mata wode xayana.