Qoronttoosa Asaassi Xaafettida Naaꞌꞌanttoogaa
13 Inttekko baanawu giigettishin hagee tawu heezzantto. “Yoho ubbay naaꞌꞌu woy heezzu asay markkattiyogan* tumattana bessees.” 2 Taani yan deꞌennaba gidikkonne, inttekko naaꞌꞌantto biidabadan qoppite; taani yaa biikko ooninne seeraappe attennaagaa, nagaraa kase oottidaageetuyyonne haratu ubbaayyo kasetada odays, 3 oottiyoban shugo gidana xayikkonne, intte giddon ba wolqqaa bessiya Kiristtoosi ta doonan haasayiyogawu intte naqaashaa koyiyo gishshawu, taani yaatays. 4 Ayssi giikko, I mino gidenna gishshawu A mittan kaqqidi woridosona, shin Xoossaa wolqqaappe denddidaagan I deꞌees. Kase I mino gidennaagaadan nuunikka mino gidennaagee tuma, shin inttenan oottiya Xoossaa wolqqaappe denddidaagan nuuni aara issippe deꞌana.
5 Intte ammanuwan deꞌiyakkonne ubbatoo paaccite; intte ay mala asakko eranawu ubbatoo inttena paaccite. Woy Yesuus Kiristtoosi inttenaara deꞌiyogaa erekketii? Xoossay inttenan ufayttennaba gidana xayikko, intte hegaa erana koshshees. 6 Xoossay nunan ufayttees. Intte hegaa erana mala taani wozanappe koyays.
7 Intte aynne moorennaadan nuuni Xoossaa woossoos, harati Xoossay nunan ufayttennabadan qoppikkokka, nuuni intte loꞌꞌobaa oottanaadan woossoosippe attin, Xoossay nunan ufayttiyo asadan harati nuna xeellana mala woossokko. 8 Ayssi giikko, nuuni tumawu oottanaappe attin, tumaa phalqqiyabaa aybanne oottana danddayokko. 9 Nuuni minnennaba gidikkokka, intte minniyo wode awudekka ufayttoos. Qassi nuuni woossiyobay intte intte qofaa suurissanaadaana. 10 Taani yaa beennan hageeta intteyyo xaafidoy hegaassa; yaatiyo gishshawu, intte ammanuwa shugissanawu gidennan minttanawu Goday taayyo immido maatan, taani yaa biyo wode inttena mintta seerana koshshenna.
11 Wurssettan, ishatoo, ufayttiyogaa, intte qofaa suurissiyogaa, minettiyogaa, issi malabaa qoppiyogaanne haratuura saro deꞌiyogaa aggoppite; qassi siiquwanne sarotettaa Xoossay inttenaara deꞌana. 12 Issoy issuwa geeshsha wozanan yeridi sarotite. 13 Geeshshati ubbay intteyyo sarotaa kiittoosona.
14 Godaa Yesuus Kiristtoosa laggetiyabi baynna kehatettay, Xoossaa siiqoynne nuussi ubbaassi imettida geeshsha ayyaanay inttenaara gido.