Pilimoonassi
1 Kiristtoos Yesuusa ammaniyo gishshawu qashettida taani Phawuloosinne nu ishay Ximootiyosi, nunaara oottiya neessi, nu siiqo ishawu Pilimoonawu sarotaa kiittoos. 2 Hegaadankka, nu michchee Afiibeessi, nu lagge wotaaddaraa Arkkipoosawunne ne keettan shiiqiya galchchawu kiittoos:
3 Laggetiyabi baynna Xoossaa nu Aawaa kehatettaynne sarotettay, qassi Godaa Yesuus Kiristtoosaagee intteyyo gido.
4 Ta siiqo ishawu Pilimoonaa, taani woossaydda nena hassayiyo wode awudekka Xoossaa galatays. 5 Daroti tawu yootidoogaadan, neeni Godaa Yesuusa ammanaasanne ne kumetta wozanaappe A siiqaasa; qassi geeshshata ubbaakka hegaadan siiqaasa. 6 Kiristtoosaara gayttidaagan nuussi deꞌiya loꞌꞌobaa ubbaa neeni akeekanaadan, neeni haratuugaadankka ammaniyo ne ammanoy nena maaddana mala woossays. 7 Ta ishawu, neeni oottidoban geeshshatu wozanay* minettido gishshawu, taani ne siiquwa siyada keehi ufayttaasinne minettaas.
8 Hegaa gishshawu, neeni bessiyabaa oottanaadan taani Kiristtoosa sunttan keehi xalada nena azazanawu danddayikkonne, 9 ne siiquwa gishshawu neeni yaatanaadan minttettiyogee loꞌꞌo; ayssi giikko, taani Phawuloosi cimaas, qassi Kiristtoos Yesuusa ammaniyo gishshawu haꞌꞌi qashetta uttaas. 10 Taani qashetta uttada ayyo aawa gidido ta naꞌaa Anaasimoosa gishshawu nena woossays. 11 I nena kase goꞌꞌenna asa, shin haꞌꞌi nenakka tanakka maaddiya asa. 12 Taani wozanappe siiqiyo* Anaasimoosa guyye neekko kiittays.
13 Taani mishiraachchuwa yootiyogaa gaasuwan qashetta uttidaashin I ne gishshaa taayyo oottana mala, hagan tanaara takkiyakko ixxikke. 14 Shin neeni maayettennan taani aybanne oottanawu koyikke; hegaappe denddidaagan, giddido gishshawu gidennan, neeni neeyyo koyada loꞌꞌobaa oottana. 15 I amarida wodiyawu* neeppe shaahettidoogee tuma; shin I merinawu nebaa gidanaadan hegee hanennan waayi aggana; 16 A kaseegaadan aylledan gidennan, keehi maaddiya siiqo ishadan mokka; taani A keehi siiqays, shin I neeyyo aylle, qassi Godaa oosuwan siiqo isha gidiyo gishshawu, neeni A ay keena aattada siiquuteeshsha. 17 Yaatiyo gishshawu, neeni tana ne laggedan* xeellikko, tana mokkiyabadan kehatettan A mokka. 18 Hegaa bollikka, I nebaa aybakko xayssidaba woy ekkidaba gidikko, hegaa taani neeyyo qanxxana. 19 Hegaa neeyyo qanxxanaagaa taani Phawuloosi ta kushiyan xaafays. Shin neeni taayyo hegaappekka aadhdhiyabaa acotidoogaa eraasa. 20 Ee ta ishawu, neeni Godaassi gaada ha yohuwan tana maaddanaadan woossays; Kiristtoosassi gaada ta wozanaa* woppissa.
21 Taani oychchidobaa neeni oottanaagaa ammanettays. Hegaa gishshawu, taani giidoogaappekka aadhdhiyabaa neeni oottanaagaa erada, hagaa neeyyo xaafays. 22 Shin hegaa bolli, taayyo shemppana sohuwakka giigissa. Ayssi giikko, intte woosaappe denddidaagan, taani qashuwappe birshshettada* inttekko beennan waaya aggana.
23 Kiristtoos Yesuusa ammaniyogaa gaasuwan tanadan qashettida Eppaafiri nena saro gees. 24 Tanaara issippe oottiya Marqqoosi, Arisxxirokoosi, Deemaasinne Luqaasikka nena saro goosona.
25 Laggetiyabi baynna Godaa Yesuus Kiristtoosa kehatettay intte ayyaanaara gido.