Ximootiyosassi Xaafettida Koyroogaa
5 Cimida attuma asa keehi amassaloppa. Shin neeni ne aawaara haasayiyogaadan aara haasaya, ne ishatuura haasayiyogaadan yelaga attuma asatuura haasaya, 2 ne aayeera haasayiyogaadan cima macca asatuura haasaya, qassi ne michchetuura haasayiyogaadan yelaga macca asatuura geeshsha wozanan haasaya.
3 Tumu amꞌꞌe gidiya* amꞌꞌeta bonchcha.* 4 Shin issi amꞌꞌeeyyo naati woy naatu naati deꞌikko, eti koyro bantta son Xoossaayyo ammanettiyogaa bessiyabaa oottana koshshees. Eti banttana yelidaageetuyyonne eta yelidaageetuyyo bessiyabaa oottidi kushiya zaariyogan hegaa oottoosona. Hegee Xoossaa ufayssiyaba. 5 Aybinne baynna, tumu amꞌꞌe maccaasiya Xoossan hidootaa wottada ubbatoo qamminne gallassi watiwatawusunne woossawusu. 6 Shin ashuwa amo xalaalawu deꞌiya amꞌꞌiya paxa deꞌikkonne hayqqaasu. 7 Hegaa gishshawu, eta ha yohota azaziyogaa aggoppa; yaatikko, asi eta amassalennan aggana danddayees. 8 Koshshiyaban baageetuyyo, ubbaappe aaruwan ba soo asaayyo qoppenna asi ammanuwa aggida asa, qassi ammanenna asappekka iita.
9 Issi amꞌꞌeeyyo layttay 60 gidana xayikko, maaduwawu O xaafana koshshenna; A kase issi azinaa machchonne 10 ba loꞌꞌo oosotun erettidaaro gidana koshshees; he oosoti A naata dichchidoogaa, imattaa mokkidoogaa, geeshshatu tohuwa meeccidoogaa, metootidaageeta maaddidoogaanne loꞌꞌo ooso ubbaa minnada oottidoogaa.
11 Shin yelaga amꞌꞌeta maaduwawu xaafana koshshenna; ayssi giikko, attuma asa qaaqqatiyogee Kiristtoosayyo haggaaziyo haggaazan etayyo xube gidiyo wode, eti azinaa gelanawu koyoosona. 12 Qassi eti koyro ammanuwan yootidobaa* aggido gishshawu mooranchcha gidana. 13 Hegaadankka, eti allaallee baynnan keetta ubban yuuyiyogaa meezetoosona; ee, eti allaallee baynnan yuuyiyogaa xalaala gidennan, zigiroosonanne asa yohon geloosona; yaatidi, haasayana bessennabaa haasayoosona. 14 Hegaa gishshawu, eqettiyagawu boriyo gaasoy deꞌenna mala, yelaga amꞌꞌeti gelanaadan, naata yelanaadan, bantta keettaa maara oyqqanaadan koyays. 15 Ubbakka issoti issoti Seexaanaa kaallanawu wora simmidosona. 16 Ammaniya issi maccaaseeyyo amꞌꞌe dabboti deꞌikko, galchchawu deexxenna mala A eta maaddana koshshees. Yaatikko, galchchay tumu amꞌꞌeta* maaddana danddayees.
17 Galchchan sintta xeera gididi loꞌꞌobaa oottiya cimata, ubba qassi eti haasayiyogaaninne tamaarissiyogan minnidi oottikko, eta wozanappe bonchchana bessees. 18 Ayssi giikko, Geeshsha Maxaafay, “Neeni kattaa qoxxiyo wode booraa doonaa qachchoppa” yaagees; qassi, “Oottiya urassi A miishshay imettiyogee bessiyaba” yaagees. 19 Naaꞌꞌu woy heezzu markkatu naqaashi baynnan cima asa* mootiyobaa siyoppa. 20 Ubbay yayyana mala, nagaraa oottiyogaa aggennaageeta eta ubbaa sinttan seera. 21 Aybanne kasetada pirddennan woy somꞌꞌo xeellennan ha azazota naagana mala, Xoossaa sinttan, Kiristtoos Yesuusa sinttaaninne doorettida kiitanchchatu sinttan nena minttada azazays.
22 Ellellada O bollinne ne kushiya mule wottoppa,* qassi haratu nagaran geloppa; geeshshatettan deꞌa.
23 Ne uluwawunne darotoo nena sakkiyo gishshawu, guutta woyne eessaa uyappe attin, haatta xalaalaa uyoppa.*
24 Issi issi asaa nagaray qoncci erettiyaba gidiyo gishshawu, eta bolli sohuwara pirddettees, shin haratu nagaray takkidi erettees. 25 Hegaadankka, loꞌꞌo oosoti qoncci erettoosona; hegeetuppe qoncci erettibeennaageetikka geemmidi attana danddayokkona.