Ximootiyosassi Xaafettida Koyroogaa
3 Taani yootiyobay ammanettiyaba: Attuma asi cima gidanawu wozanappe koyikko, I loꞌꞌobaa oottanawu amottees. 2 Hegaa gishshawu, issi cimay asi amassalennaagaa, issi machchee azinaa, ba deꞌuwan ubbaban bana naagiyagaa, suurebaa qoppiyagaa, ubbaban maara deꞌiyagaa, imattaa mokkiyagaa, tamaarissanawu danddayiyagaa gidana koshshees; 3 qassi mattottennaagaa, kobattennaagaa,* zozzu geennaagaa, ooyettennaagaa, miishshaa siiqennaagaa gidana koshshees. 4 I azazettiya suure naati deꞌiyonne ba keettaa loꞌꞌo ogiyan ayssiya* asa gidana koshshees 5 (ayssi giikko, issi asi ba keettaa waati ayssanaakko* erennaba gidikko, Xoossaa galchchawu waani qoppana danddayii?); 6 I otorettenna malanne Dabloosaagaa mala pirddaa ekkenna mala, mati ammanida asa gidana koshshenna. 7 Hegaa bollikka, asi A borenna* malanne I Dabloosa gitiyan oyqettenna mala, galchchan deꞌenna asay loꞌꞌoban denttiyo* asa gidana koshshees.
8 Hegaadankka, galchchawu haggaaziyageeti tishsha, haasayidobaa laammennaageeta,* daro woyne eessaa uyennaageeta, banttawu goꞌettanawu giidi yaaretennaageeta gidana koshshees; 9 eti ammanuwa, hegeekka, Xoossay gentti wottido yohuwa geeshsha kahan mintti oyqqana koshshees.
10 Qassi he haggaazawu bessiya* asakkonne eta koyro paaccana koshshees; yaatin eti asi amassalenna asa gidikko, galchchawu haggaazana danddayoosona.
11 Hegaadankka, macca asati tishsha, zigirennaageeta, bantta deꞌuwan ubbaban banttana naagiyageeta, ubbaban ammanettiyageeta gidana koshshees.
12 Galchchawu haggaaziyagee issi machchee azinaa, ba naatanne ba keettaa loꞌꞌo ogiyan ayssiya asa gidana koshshees. 13 Ayssi giikko, loꞌꞌo ogiyan haggaaziya attuma asata asay loꞌꞌoban denttees, qassi eti Kiristtoos Yesuusa ammaniyo ammanuwabaa yayyennan yootana danddayoosona.
14 Taani mata wode neekko baanawu qoppays, shin geella gamꞌꞌikko gaada hageeta neeyyo xaafays; 15 hegaappe denddidaagan, tumaa amppiyanne ayyo tuussa mala gidida, merinawu deꞌiya Xoossaa galchchan, hegeekka, Xoossaa keettan neeni waana deꞌana koshshiyakko erana danddayaasa. 16 Xoossay gentti wottidobay, ayyo ammanettiyogaara gayttidabay tumukka gitaba: ‘I asa gidiis, ayyaanan xillo geetettiis, kiitanchchati A beꞌidosona, asawu abay odettiis, saꞌan deꞌiya asay A ammaniis, Xoossay A bonchchuwan pude efiis.’