Yihuday Xaafidoogaa
1 Taani Yihuday, Yesuus Kiristtoosa aylleenne Yaaqooba ishay nu Aaway Xoossay siiqiyonne Yesuus Kirittoosawu naagi wottido xeesettidaageetuyyo hagaa xaafays:
2 Xoossay intteyyo ba maarotaa, sarotettaanne siiquwa gujjidi immanaadan woossays.
3 Taani siiqiyogeetoo, Xoossay nuna waati ashshanaakko taani intteyyo xaafanawu wozanappe koyidaba gidikkonne, I geeshshatuyyo issitoo xalla* immido ammanuwawu intte minni baaxetana mala, inttena minttettanawu xaafana koshshiyogaa akeekaas. 4 Daro wodeppe kase, eti pirddettanaagee Geeshsha Maxaafan odettido issi issi asati intte erennan intte giddo gelido gishshawu taani hagaa xaafays. Eti laggetiyabi baynna nu Xoossaa kehatettan gaasoyidi, yeelli baynnabaa haniyageetanne* nuna shammida, A xalaalay nu Godaa gidiya Yesuus Kiristtoosawu ammanettennaageeta. He asati Xoossawu yayyokkona.
5 Ha ubbabata intte loytti ereeta; shin Yihoowi ba asaa Gibxxe biittaappe kessidaba gidikkokka, ammanoy baynnaageeta guyyeppe xayssidoogaa inttena hassayissanawu koyays. 6 Hegaa bollikka, Xoossay etawu immido oosuwanne eti deꞌana bessiyo sohuwa aggida kiitanchchata I merinawu qachchiis; qassi gita pirddaa gallassay gakkanaashin, eti sakkana xuman deꞌoosona. 7 Hegaadankka, Sadoomanne Gamoora katamatinne eta yuushuwan deꞌiya katamati pokkiya tuna nagaraanne ashoy amottiyo, bantta meretawu bessennabaa oottido gishshawu, merinaa taman qaxxayettidosona; hegaa gishshawu, nuuni naagettana koshshiyabaa bessiyaba gididosona.
8 Gidikkonne, iitabaa qoppiya ha asati bantta bollaanne haratuugaa tunissoosona, haariyageeta karoosona, qassi bonchchettidaageeta cayoosona. 9 Shin kiitanchchatu ubbaa gadaaway Mikaaꞌeeli Muuse anhaaban Dabloosaara palamettido wode, ziqqi giidi, “Yihoowi nena seero” giisippe attin, A bolli pirddibeennanne A cayibeenna. 10 Gidoppe attin, he asati banttawu akeekettenna ubbabaa boroosona. Qassi qoppi erenna mehiyadan, banttawu milatiyagaadan akeekiyo ubbabaa oottoosona. Hegaa oottiyogan, banttana tunissoosona.
11 Etayyo aayyeero! Ayssi giikko, eti Qaaꞌeela ogiya kaallidosona, Balaamaagaadan woytuwa ekkanawu giidi likke gidennabaa oottiigidosonanne Qoraahadan maatay deꞌiyogeetu bolli makkalidi haasayidosona, qassi eti adan hayqqana. 12 He asati ishata intte shoobbidosan inttenaara qumaa miyo wode haattaa giddon geeman deꞌiya zaallata, yeelli baynnan banttawu miya henttanchchata, carkkuwan yaanne haanne qaaxxiya iri baynna shaarata, qassi ayfana bessiya wodiyan ayfenna, muleera hayqqidanne* xoqollettida mittata; 13 eti yeelli baynnaageeta, iitabaa gaxaa kessiya wolqqaama abbaa beetata, mela coo yuuyiya xoolintteta; Xoossay eta sakkana xuman wottiis. Eti merinawu yaappe kiyokkona.
14 Addaameppe simmin laappuntta yeleta gidida Heenooki, etabaa hagaadan giidi kasetidi yootiis: “Yihoowi ba cora* kiitanchchatuura yiis. 15 I asaa ubbaa bolli pirddanawunne bana bonchchenna nagaranchchatu ubbaa mooruwa qonccissanawu yiis, qassi eti iitabaa ubbaa oottiyo gishshawunne A hanqqetissiyabaa haasayiyo gishshawu yiis.”
16 He asati banttawu deꞌiyaban ufayttenna gishshawu zuuzummoosona, eti amottiyo iitabaa oottoosona, keehi ceeqettoosona, qassi banttawu goꞌettanawu giidi harata heebboyoosona.*
17 Shin taani siiqiyogeetoo, nu Goday Yesuus Kiristtoosi kiittidoogeeti kase* yootidobaa intte hassayite. 18 Eti intteyyo, “Wurssetta wodiyan bantta amottiyo iitabaa oottiya qilliicciyageeti deꞌana” giidi darotoo yootidobaa hassayite. 19 Issuwa issuwappe shaakkiyageeti, ashuwabaa amottiyageetinne* Xoossaa ayyaanay baynnaageeti he asata. 20 Shin taani siiqiyogeetoo, intte geeshsha ammanuwa minttitenne geeshsha ayyaanay kaalettin woossite; 21 qassi Xoossaa siiquwan ubbatoo goꞌettanawu woossite. Yaatiiddi, intte merinawu deꞌanaadan oottana danddayiya nu Godaa Yesuus Kiristtoosa maarotaa naagite. 22 Qassi siriya issota issota maariyogaa aggoppite; 23 tamaappe eta dafi kessidi ashshite. Shin intte yayyikkokka, harata maariyogaa aggoppite; eti garssaara maayidobaa ashuwa oosotun moorido gishshawu, eta maariyo wode, moorettida eta maayuwakko shiiqoppite.
24 Qassi nu gita Xoossay intte xubettennaadan naagananne intte keehi ufayttiiddi A sinttan qiti baynnan eqqanaadan maaddana danddayees. 25 Nuna Ashshiyagawu, A xalla Xoossawu nu Godaa Yesuus Kiristtoosa baggaara bonchchoy, gitatettaynne wolqqay gido; qassi A haaroy aadhdhida wodetu ubbaagaadan, haꞌꞌikka sinttappekka merinawu gido. Aminꞌꞌi.