Tasalonqqe Asaassi Xaafettida Naaꞌꞌanttoogaa
3 Wurssettan, ishatoo, Yihoowa qaalay awudekka ubbasaa eesuwan gakkana malanne intteban sabettiyogaadan sabettana mala nuuyyo woossiyogaa aggoppite, 2 qassi ammanoy deꞌiyoy asa ubbaassa gidenna gishshawu, palanne iita asatuppe Xoossay nuna ashshana mala woossite. 3 Shin Goday yootiyoban ammanettees, qassi I inttena minttananne iitaappe* naagana. 4 Hegaa bollikka, nuuni Godaa kaalliyageeta gidiyo gishshawu, nuuni azazidobaa intte oottiiddi deꞌiyogaanne oottanaagaa ammanettoos. 5 Intte Xoossaa siiqanaadaaninne Kiristtoosassi giidi genccanaadan Goday intte wozanaa suure kaalettana mala woossoos.
6 Ishatoo, maara hemettennanne intte* nuuppe ekkidobatu* maaran deꞌenna ay ishappekka intte duuxxanaadan, nu Godaa Yesuus Kiristtoosa sunttan inttena azazoos. 7 Ayssi giikko, nuuni intte giddon maara deꞌido gishshawu, intte nuna waani milatana koshshiyakko ereeta, 8 qassi nuuni miishsha qanxxennan* oonanne miyoba oychchibookko. Gidoppe attin, intte giddon oonanne darobaa kesissidi ayyo tooho gidennaadan qamminne gallassi minnidi oottidanne daafurida. 9 Inttena aybakko oychchanawu nuuyyo maatay deꞌees, shin intte nuugaadan oottana mala bessanawu hegaa oottida. 10 Nuuni inttenaara deꞌiyo wode, inttena hagaadan azazida: “Oottanawu koyenna uri maana bessenna.” 11 Ayssi giikko, intte giddon issoti issoti aynne oottennan ixxidi, maara hemettennaagaa siyida; gidoppe attin, eti banttana gattennaban geloosona. 12 Hegeetu mala asati harata wayssennan deꞌanaadaaninne bantta kushiyan oottidobaa maanaadan Godaa Yesuus Kiristtoosa sunttan azazoosinne zoroos.
13 Shin ishatoo, intte loꞌꞌobaa oottiyogaa aggoppite. 14 Gidoppe attin, ooninne nuuni ha dabddaabbiyan yootidobaa azazettennaba gidikko, A huruuritenne* aara zuppetiyogaa aggite; yaatikko, I baban yeellatana. 15 Shin A morkkedan xeelloppite, qassi A ishadan zoriyogaa aggoppite.
16 Sarotettaa Goday awudekka intteyyo ubbaban sarotettaa immanaadan woossoos. Goday inttenaara ubbaara gido.
17 Dabddaabbetu ubban deꞌiya malaatan, taani Phawuloosi ta kushiyan ha sarotaa xaafaas; taani xaafiyoy hegaadaana.
18 Laggetiyabi baynna nu Godaa Yesuus Kiristtoosa kehatettay intteyyo ubbaayyo gido.