Tasalonqqe Asaassi Xaafettida Naaꞌꞌanttoogaa
2 Gidoppe attin, ishatoo, nu Goday Yesuus Kiristtoosi yiidi takkiyo wodiyaranne aara issippe deꞌanaadan nuna shiishshiyo wodiyara gayttidaban nuuni inttena oychchiyobay hagaa: 2 Yihoowa gallassay yiis giyo, ayyaanay denttettin yootiyobaa woy haasayaa woy nuuni kiittidoba milatiya dabddaabbiya gaasuwan intte qofan eesuwan balbbuqettoppite woykko dagammoppite.
3 Makkalanchchay,* bashshaa naꞌay, higgiya kanttiya bitanee koyro yeennan, I qoncci beettennan he gallassay yeenna gishshawu, ay gidinkka asi inttena wora zaaroppo.* 4 I morkke, qassi xoossa geetettiya woy asi goynniyo* ubbabaappe bana xoqqissees; hegaappe denddidaagan, I bana xoossa oottidi asawu bessiiddi Xoossaa garuwan uttees. 5 Taani inttenaara deꞌiyo wode hageeta intteyyo darotoo yootidoogaa hassayekketii?
6 Qassi haꞌꞌi aybi teqqiyakko intte ereeta; hegaappe denddidaagan, I ba wode qoncci beettana. 7 Ha bitanee haꞌꞌikka geeman iitabaa oottiyogee tuma, shin ha iitatettay geemmi uttanay A teqqiyagee kichchana gakkanaashiina. 8 Hegaappe guyyiyan, Goday Yesuusi yiidi takkiyogee erettiyo wode ba doonaappe kiyiya ayyaanan xayssanaagee, higgiya kanttiya he bitanee qoncci beettana. 9 Shin higgiya kanttiya he bitanee Seexaanaa wolqqan deꞌees, qassi malaaliyabata, worddo malaatatanne garamiyabata ubbaa oottees; 10 hegaa bollikka, xayanaageeta iitaban ubban I balettana, qassi eti attana mala tumaa ekkibeennanne siiqibeenna gishshawu, xayiyogan qaxxayettana. 11 Eti worddobaa ammanana mala balettiya timirttiyan cimettanaadan Xoossay anttidoy* hegaassa; 12 tumaa ammaniyogaa aggidi iitaban ufayttiyageetu ubbaa bolli pirddettana mala I anttiis.
13 Gidoppe attin, Yihoowi siiqiyo ishatoo, Xoossay doomettaappekka attanaadan inttena doorido gishshawu, nuuni intte gaasuwan ubbatoo Xoossaa galatana koshshees giidi qoppoos; I inttena ba ayyaanan geeshshiyogaaninne intte tumaa ammaniyo ammanuwan inttena dooriis. 14 I nuuni yootiyo mishiraachchuwan inttena hegawu xeegiis; hegaappe denddidaagan, inttekka nu Godaa Yesuus Kiristtoosadan bonchchettana. 15 Hegaa gishshawu, simi ishatoo, minni eqqite, qassi intteyyo yootidoban gidin woy nuuni intteyyo xaafido dabddaabbiyan gidin, intte tamaaridobata mintti oyqqite. 16 Hegaa bollikka, nuuni hagaa woossoos: Nu Goday Yesuus Kiristtoosi, qassi nuna siiqiyanne laggetiyabi baynna kehatettan merinawu minttettiyanne malaaliya hidootaa immida Xoossay nu Aaway 17 intte wozanaa minttettanaadaaninne intte ubbatoo loꞌꞌobaa haasayananne oottana mala inttena minttanaadan* woossoos.