Yaaqoobi Xaafidoogaa
1 Xoossaa aylleenne Godaa Yesuus Kiristtoosa ayllee, taani Yaaqoobi dumma dummasan laalettida 12 yaratuyyo sarotaa kiittays:
2 Ta ishatoo, intte dumma dumma paaciya paacettiyo wode keehi ufayttite; 3 intte eriyogaadan, intte tumuppe ammaniyogee hegaa mala paaciyan erettiyo gishshawu, gencciyogaa meezeteeta. 4 Shin genccay ba oosuwa polanaadan oottite; yaatikko, intte ubba ginan qiti baynnan, kumettanne tilla gidana.
5 Simi intte giddon hayyoy paccido ooninne Xoossaa woossiyogaa aggoppo; ayssi giikko, I ayyo immana, qassi Xoossay ubbaayyo A balaa qoodennan,* kehidi immees. 6 Shin I aynne sirennan ammanidi ubbatoo woossana koshshees; ayssi giikko, siriya asi carkkoy sugiyonne yaa haa qaaxxiya abbaa beetaa mala. 7 Siriya asi Yihoowappe ubba aybanne ekkana giidi qoppana koshshenna; 8 I ba oge ubban qelꞌꞌiqelꞌꞌiya, qashoy baynna asa.
9 Shin hiyyeesa ishay Xoossay A xoqqu oottido gishshawu ufaytto;* 10 qassi duree dembban mokkiya ciishshaadan xayiyo gishshawu, ziqqi giyogaa meezetida dureekka ufaytto. 11 Ayssi giikko, away kiyiyo wode, suuloy tokettidabaa melissees, qassi A ciishshaa qoqqofeesinne loꞌꞌiya A meraa xayssees; hegaadankka, dure asi duretanawu woxxiiddi hayqqana.
12 Paacciyabay gayttishin genccidi deꞌiya asi ufayttees; ayssi giikko, I xooni kiyiyo wode, Yihoowi bana ubbatoo siiqiyageetuyyo immana giido deꞌuwa woytuwa ekkana. 13 Ooninne paacettiyo wode, “Tana Xoossay paaccees” gaana koshshenna. Ayssi giikko, Xoossay iitaban paacettana danddayenna, qassi I oonanne paaccenna. 14 Shin asay ubbay A amoy A piredan oyqqanawu* maliyo wode paacettees. 15 Hegaappe guyyiyan, amoy diccidi* nagaraa yelees, qassi he nagaray polettiyo wode hayquwawu gattees.
16 Ta siiqo ishatoo, inttena ooninne balettoppo. 17 Loꞌꞌonne kumetta imota ubbay bollappe, kuway ba sohuwa laammiyogaadan laamettenna,* saluwa pooꞌuwa Aawaappe yees. 18 Nuna tumaa qaalan yeliyogee A shene gidiis; I medhdhidobatu giddon nuuni koyro gakkida xeera kattaa mala gidanaadan hegaa oottiis.
19 Taani siiqiyo ishatoo, hagaa erite: Asay ubbay siyanawu eesotana bessees, qassi haasayanawunne hanqqettanawu eesotana bessenna; 20 ayssi giikko, asi hanqqettiyo wode, Xoossaa sinttan suurebaa oottenna. 21 Hegaa gishshawu, geeshsha gidenna ubbabaanne iitatetta ubbaa* xayssite, qassi Xoossay intte giddon inttena* ashshana danddayiya qaalaa tokkiyo wode ashilaalidi ekkite.
22 Gidoppe attin, qaalawu azazettiyageetappe attin, sissa xalla siyiyageeta gidoppite, qassi worddobaa qoppiyogan inttena cimmoppite. 23 Ayssi giikko, ooninne qaalaa siyiyagaappe attin, awu azazettennaagaa gidikko, I ba somꞌꞌuwa* heregan beꞌiya asa mala. 24 Ayssi giikko, I bana beꞌidi bees, qassi I ay malatiyakko sohuwara dogees. 25 Shin wottiyobi baynna laꞌatettaa higgiya loytti xeellidi I yootiyobaa oottiya asi siyidi dogiya asa gidenna. I Xoossaa oosuwa oottees, qassi hegaa oottiyogan ufayttees.
26 Ay asinne Xoossaayyo goynniyabadan* qoppiiddi ba inxxarssaa teqqana* xayikko, I ba wozanaa cimmees, qassi A goynoy hada. 27 Nu Xoossaanne Aawaa sinttan geeshshanne tunibeenna goynoy* hagaa: Aawi aaya baynna naatinne amꞌꞌeti waayettiyo wode eta maaddiyogaa, qassi saꞌaa asaa tuna ogiyappe shaahettiyogaa.