Yohaannisi Beꞌido Ajjuutaa
6 Dorssay laappun maatafatuppe issuwa denttiyo wode taani beꞌaas, qassi oyddu kiruubetuppe issoy dadaadan guummiiddi, “Haa ya!” yaagiyogaa siyaas. 2 Hegaa bollikka, hagaa beꞌaas: hekko! bootta paraa, qassi A toggidaagee wonddafiya oyqqiis; ayyo kallachchay imettiisinne I muleera xoonanawu, xooniiddi kiyiis.
3 I naaꞌꞌantto maatafaa denttiyo wode, naaꞌꞌantto kiruubee, “Haa ya!” yaagiyogaa siyaas. 4 Tama milatiya hara paray kiyiis, qassi issoy issuwa busakkanaadan saꞌan olaa denttana mala, A toggidaagaayyo maatay imettiisinne ayyo wogga bisoykka imettiis.
5 I heezzantto maatafaa denttiyo wode, heezzantto kiruubee, “Haa ya!” yaagiyogaa siyaas. Hegaa bollikka, hagaa beꞌaas: hekko! karetta paraa, qassi A toggidaagee ba kushiyan meezaanaa oyqqiis. 6 Taani oyddu kiruubetu giddon haasayettiyaba milatiya, hagaadan giyabaa siyaas: “Issi kilo* gisttee issi dinaare,* qassi heezzu kilo banggay issi dinaare; wogaraa zaytiyanne woyne eessaa qohoppite.”
7 I oyddantto maatafaa denttiyo wode, oyddantto kiruubee, “Haa ya!” yaagiyogaa siyaas. 8 Hegaa bollikka, taani hagaa beꞌaas: hekko! washalaala paraa, qassi A toggidaagaa sunttay Hayquwa. Duufoy* mataa shiiqidi A kaallees. Qassi adussa bisuwan, koshan, woriya harggiyaninne saꞌan deꞌiya doꞌatun worana mala, saꞌawu missaa bolli etayyo aawatettay imettiis.
9 I ichchashantto maatafaa denttiyo wode, yarshshiyosaappe garssaara Xoossaa qaalaa gaasuwaninne eti markkattidobaa gaasuwan shuhettidaageetu shemppota* beꞌaas. 10 Eti bantta qaalaa xoqqu oottidi hagaadan giidosona: “Ubbaa Haariya Godawu, geeshshawunne tumawu, neeni saꞌan deꞌiyageetu bolli pirddanawunne nu suuttaa awutiya achchanawu awude gakkanaashin naaguutee?” 11 Qassi etawu ubbawu bootta kaabbay imettiis; eta woridoogaadan worana, eta mala aylletu, eta ishatu qooday kumana gakkanaashin guuttaa shemppana mala, etayyo odettiis.
12 Qassi I usuppuntto maatafaa denttiyo wode taani beꞌaas; biittay wolqqappe qaaxxiis, qassi awa ayfee ikisiyappe* oosettida waaruwadan karexxiisinne aginay muleera suutta milatiis; 13 qassi balasiya mittaa wolqqaama carkkoy qaattin qawuꞌꞌe ayfee qoqqofettiyogaadan, saluwan deꞌiya xoolintteti saꞌan kunddidosona. 14 Qassi saloy woraqatay xaaxettiyogaadan xaaxettidi kichchiis, qassi dere ubbaynne haruuro ubbay bantta sohuwappe kichchidosona. 15 Hegaappe simmin, saꞌaa kawoti, maataawati, wotaaddarata azaziyageeti, dureti, minoti, aylleti ubbaynne goqati ubbay deretu bolli deꞌiya keratu giddooninne gonggolotun qosettidosona. 16 Qassi eti deretuyyonne keratuyyo zaari zaaridi hagaadan goosona: “Nu bolli kunddidi, araatan uttidaagaa sinttappenne Dorssaa hanqquwappe nuna genttite; 17 ayssi giikko, eta hanqquwa gita gallassay gakkiis, qassi ooni attana danddayii?”