KOCHCHOORUWA

Geeshsha Maxaafay Xoossay kaalettin Ibraawettuwan, Aramattuwaninne Giriikettuwan xaafettiis. ‘Dere ubbaa’ asay Xoossaa Qaalan goꞌettana mala, Geeshsha Maxaafay daro doonatun birshshettana koshshees. (Maatiyosa 24:14) Maatiyosappe Ajjuutaa gakkanaashin deꞌiya laatamanne laappun maxaafata koyro xeetu layttaa M.Ln xaafida Kiristtaaneti koyro Giriikettuwan xaafido gishshawu, he maxaafati “Giriikettuwan Xaafettida Geeshsha Maxaafaa” geetettoosona.

Giriikettuwan Xaafettida Geeshsha Maxaafaa Ooratta Alamiya Birshshettay koyro Inggilizettuwan 1950n kiyiis. Ha birshshettay beni Giriikettuwan kushiyan xaafetidaageetuppe bayratiyageetuura maayiya, keehi erettida Westkotanne Hortta Giriiketto xuufiya ketenꞌꞌidi giigissidoba. Ooratta Alamiya Birshshettay danddayettida keenan Giriiketto xuufiya qofaa laammennan birshshettiis. Ha Wolayttatto birshshettay 2013n Inggilizettuwan giigidaagaa ketenꞌꞌidi birshshidoba, qassi hegaadan qofaa laammennan birshshettiis.

Yihoowa giya, Xoossaa dumma sunttay Giriikettuwan Xaafettida Geeshsha Maxaafaa Ooratta Alamiya Birshshettan waanna xuufiyan 237too xaafettiis. Ha birshshettan sintta xeeran Xoossaa sunttaa geeshsha ootti xeellidinne asay ubbay attanawu he sunttaa xeesana koshshiyogaa akeekidi, Yihoowa giya sunttaa Geeshsha Maxaafan bessiya sohuwan wottidosona.​—Maatiyosa 6:9; Roome 10:13.

Ooratta Alamiya Birshshettaa giya sunttay asay ubbay goꞌettana mala Xoossay ooratta saꞌaa ehaana giidoogaara gayttidaba. (2 Pheexiroosa 3:13) Geeshsha Maxaafaa Pulttuwa Xoossaa siiqiya, hagaa birshshida asati Xoossaa qofaanne I yootidobaa danddayettida keenan likke birshshana mala appe dumma aawatettaa ekkidabadan qoppoosona. ‘Tumaa geeshshidi eranawu’ wozanappe baaxetiiddi nabbabiyageeta ha birshshettay keehi maaddanaadan woossoos.​—1 Ximootiyosa 2:4.