GALAATIYA ASAASSI XAAFETTIDAAGAA

1 Yesuus Kiristtoosinne A hayquwappe denttida Xoossay Aaway sunttidoogaappe attin, asappe gidenna woy asi sunttibeenna kiitettidaagee taani Phawuloosinne 2 tanaara deꞌiya ishati ubbay Galaatiyan deꞌiya galchchatuyyo sarotaa kiittoos:

3 Laggetiyabi baynna Xoossaa nu Aawaa kehatettaynne sarotettay, qassi Godaa Yesuus Kiristtoosaagee intteyyo gido. 4 I nuna ha iita wodiyappe ashshanawu, nu nagaraa gishshawu bana yarshshiis; I nu Xoossaanne nu Aawaa sheniyawu azazettanawu hegaa oottiis. 5 Xoossaayyo meri merinawu bonchchoy gido. Aminꞌꞌi.

6 Laggetiyabi baynna Kiristtoosa kehatettan inttena xeegidaagaappe hara qommo mishiraachchuwawu intte keehi eesuwan wora simmidoogee* tana malaalees. 7 Shin hara mishiraachchoy baawa; gidoppe attin, Kiristtoosabaa yootiya mishiraachchuwa geellayidi inttena wora zaaranawu koyiya issoti issoti deꞌoosona. 8 Shin nuuni intteyyo yootido mishiraachchuwappe harabaa, haray atto nuuni woy saluwappe yiida kiitanchchikka mishiraachchodan intteyyo yootikko, izaawu qanggettidaagaa gido. 9 Nuuni kase yootidoogaadan, haꞌꞌikka zaarettada hagaa yootays: Intte ammanidoogaappe harabaa intteyyo mishiraachchodan yootiya ooninne qanggettidaagaa gido.

10 Taani asaa ufayssanawu koyiyanaayye, Xoossaa ufayssanawu koyiyanaa? Taani haꞌꞌikka asaa ufayssiyaba gidikko, Kiristtoosa aylle gidikke. 11 Ayssi giikko, ishatoo, taani intteyyo yootido mishiraachchoy asaba gidennaagaa intte eranaadan koyays; 12 taani mishiraachchuwa asappe ekkabeykke woykko asi tana tamaarissibeenna, shin Yesuus Kiristtoosi hegaa taayyo qonccissiis.

13 Taani kase Ayhuda ammanuwan waana deꞌidaakko siyideta; taani Xoossaa galchchaa keehi* naaqqayddanne bashshaydda deꞌaas; 14 qassi he wode taani ta aawatu wogaa wozanappe kaalliyo gishshawu, ta dere asan ta mala yelagatu darotuppe aaruwan Ayhuda ammanuwan diccaydda deꞌays. 15 Shin tana ta aayee uluwappe shaakkida Xoossay laggetiyabi baynna ba kehatettan tana dooriis; I hagee loꞌꞌo giidi qoppiis: 16 Hara biittaa asay A Naꞌaa erana mala taani mishiraachchuwa etayyo yootiyogee loꞌꞌo giidi qoppiis; I tana hegawu doorido wode taani ay asaarakka* zorettabeykke; 17 woy taappe kase kiitettidaageetukko Yerusalaame babeykke, shin Araba biitti baas, qassi hegaappe Damasqqo simmaas.

18 Heezzu layttappe guyyiyan, taani Keefaara* gayttanawu Yerusalaame kiyaas, qassi aara 15 gallassaa takkaas. 19 Shin kiitettidaageetuppe hara oonaaranne gayttabeykke; Godaa ishaa Yaaqooba xalaalaara gayttaas. 20 Taani intteyyo xaafiyobay worddo gidennaagawu Xoossay markka.

21 Hegaappe guyyiyan, taani Sooriyaninne Kilqqiyan dumma dummasaa baas. 22 Shin Yihudan deꞌiya Kiristtoosa kaalliyageetu galchchati tana beꞌi erokkona. 23 Eti siyidobay, “Kase nuna naaqqiya bitanee kase I qohido ammanuwabaa mishiraachchuwa yootees” yaagiyogaa xalaala. 24 Hegaa gishshawu, eti ta gaasuwan Xoossaa sabbiyogaa doommidosona.

2 Yaanin, 14 layttappe guyyiyan, taani Tiitakka ekkada Barnnaabaasaara haranttuwa Yerusalaame kiyaas. 2 Yaa baada, saluwappe tawu qonccidabaappe denddidaagan, taani hara biittaa asawu yootiyo mishiraachchuwabaa etayyo qonccissaas. Shin taani woxxiyogee woy woxxidoogee hada gidennaagaa eranawu koyido gishshawu, hegaa bonchchettida attuma asatu xalaalawu yootaas. 3 Gidoppe attin, tanaara biida Tiitu Giriike asa gidikkokka, I qaxxarettana mala ooninne giddibeenna. 4 Shin hegaappe denddidaagan, galchchaa gelida worddo ishati iitabaa haasayiyogaa doommidosona; eti higgiyawu aylle gidana mala nuna giddanawunne nuuni Kiristtoos Yesuusa kaalliyo gishshawu demmido laꞌatettaa huruuranawu* lakkidi gelidosona; 5 nuuni mule* siyennan ixxida, woy qassi etayyo azazettibookko; hegaappe denddidaagan, intte mishiraachchuwa tuman minnidi deꞌana.

6 Shin bonchchettida asadan xeelliyogeeti taayyo oorattabaa aybanne yootibookkona; Xoossay asawu beettiyaban asa xeellenna gishshawu, he asati kase ay mala asa gidikkokka, hegee tawu gitaba gidenna. 7 Shin qaxxarettidaageetu hadaray Pheexiroosawu imettidoogaadan, qaxxarettibeenna asatuyyo mishiraachchuwa yootiyo hadaray taayyo imettidoogaa eti akeekidosona, 8 (ayssi giikko, qaxxarettidaageetuyyo kiitettidaagaa gidiyo wolqqaa Pheexiroosawu immidaagee hara biittaa asawu kiitettidaagaa gidiyo wolqqaa taayyokka immiis) 9 qassi eti Xoossay laggetiyabi baynna kehatettaa taayyo kehidoogaa akeekidosona; hegaa gishshawu, tuussa mala gidida Yaaqoobi, Keefinne* Yohaannisi nuuni ubbay miire gidiyogawu malaataa, bantta ushachcha kushiya Barnnaabaasayyonne taayyo immidosona; hegaa gishshawu, nuuni hara biittaa asaakko baana, shin eti qaxxarettida asatukko baana. 10 Eti nuuyyo yootidobay nuuni hiyyeesata hassayanaagaa xalaala, qassi taanikka hegaadan oottanawu wozanappe baaxetaas.

11 Shin Keefi* mooridoogee* qoncce gidiyo gishshawu, I Anxxookiya yiido wode taani A baazzan seeraas.* 12 Ayssi giikko, Yaaqoobi kiittido amarida asati yaanaappe kase, I darotoo hara biittaa asaara qumaa mees; shin eti gakkido wode, I qaxxarettidaageetussi yayyido gishshawu, yaatiyogaa aggidi etappe shaahettiis. 13 Hara Ayhudatikka milatissuwawu* adan hanidosona, yaatin haray atto Barnnaabaasikka milatissuwawu* etadan haniis. 14 Shin eti mishiraachchuwa tumaadan deꞌennaagaa beꞌada, taani eta ubbaa sinttan Keefa* hagaadan gaas: “Neeni Ayhuda gidikkokka, hara biittaa asaagaadaanappe attin, Ayhudatuugaadan deꞌakka; yaatin hara biittaa asay Ayhudatu wogaadan deꞌanaadan oottanawu ayssi koyay?”

15 Yeletan Ayhuda gidiyanne hara biittaa asaa giddon deꞌiya nagaranchchata gidenna nuuni, 16 issi asi higgiyan koyettiyabaa oottiyogan gidennan, Yesuus Kiristtoosa ammaniyogaa xalaalan xillo geetettiyogaa akeekoos. Hegaa gishshawu, nuuni Kiristtoos Yesuusa ammanoos; hegaappe denddidaagan, nuuni higgiyan koyettiyabaa oottiyogan gidennan, Kiristtoosa ammaniyogan xillo geetettana; ayssi giikko, ay asinne* higgiyan koyettiyabaa oottiyogan xillo geetettenna. 17 Kiristtoosa gaasuwan xillo geetettanawu koyiyo wode asay nunakka nagaranchchadan xeellikko, nuuni nagaraa oottanaadan Kiristtoosi minttettiiyye? Akkay minttettenna! 18 Taani kase laalidobaa zaarettada keexxikko, higgiya kanttiya asa gidays. 19 Ayssi giikko, taani higgiya gaasuwan higgiyappe laꞌa kiyaas;* hegaappe denddidaagan, taani Xoossaayyo deꞌays. 20 Taani Kiristtoosaara mittan baxxannettaas. Haꞌꞌi deꞌiyagee tana gidikke, shin taani Kiristtoosaara issuwa gidiya deꞌuwa deꞌays.* Hegaa gishshawu, tana siiqidanne ta gishshawu bana aatti immida Xoossaa Naꞌaa ammaniyo ammanuwadan taani haꞌꞌi deꞌays. 21 Taani laggetiyabi baynna Xoossaa kehatettaa phenqqeshikke;* ayssi giikko, higgiya naagiyogee xillo kessikko, Kiristtoosi hada hayqqiis.

3 Galaatiya asatoo, akeekennaageetoo! Intte Yesuus Kiristtoosi mittan kaqetti uttidi intteyyo beettido asa mala, shin inttena ooni balettidee? 2 Taani ha issibaa inttena oychchanawu* koyays: Intte siyidobaa ammanido gishshawu ayyaanaa ekkidetiiyye, higgiyan koyettiyabaa oottiyo gishshawu ekkidetii? 3 Intte tumu akeekekketii? Geeshsha ayyaanan ammanettiyogan doommidi,* asa qofaadan deꞌiyogan kuuyeetii?* 4 Intte coo mela daro waaye waayettidetii? Intte coo mela waayettibeennaagee qoncce. 5 Hegaa gishshawu, intteyyo ayyaanaa immiyageenne intte giddon malaaliyabaa oottiyagee higgiyan koyettiyabaa intte oottiyo gishshawu hegaa oottiiyye, siyidobaa intte ammaniyo gishshawu oottii? 6 Abrahaamabaa qoppite; I “Yihoowa ammaniis, qassi hegaappe denddidaagan Xoossay A xillo asadan xeelliis.”

7 Abrahaama naati ammanuwa baqqi oyqqiyageeta gidiyogaa intte eriyogee tuma. 8 Xoossay hara biittaa asaa eta ammanuwa gaasuwan xillo gaanaagaa Geeshsha Maxaafan kasetidi odiis. I, “Dere ubbay ne baggaara anjjettana” giido wode, he mishiraachchuwa Abrahaamayyo kasetidi yootiis. 9 Hegaa gishshawu, ammanuwa baqqi oyqqiyageeti ammanida Abrahaamaara issippe anjjuwa ekkiiddi deꞌoosona.

10 Higgiyan koyettiyabaa oottiyogan ammanettiya ubbay qanggettana; ayssi giikko, “Higgiya maxaafan xaafettida ubbabaa azazettiiddi deꞌenna asi ubbi qanggettidaagaa” geetettidi xaafettiis. 11 Qassi “xilloy ammanuwa gaasuwan deꞌana” geetettido gishshawu, higgiyawu azazettiyogan ooninne Xoossaa sinttan xillo geetettennaagee qoncce. 12 Higgee ammanuwara gayttidaba gidenna. Shin “hageeta oottiya ooninne etappe denddidaagan paxa deꞌana.” 13 Kiristtoosi nuna woziis; I nu gishshawu qanggettaa ekkidi, Higgiya qanggettaappe nuna laꞌa kessiis. Ayssi giikko, “Mittan kaqettida asi ubbi qanggettidaagaa” geetettidi xaafettiis. 14 Abrahaamayyo yootido anjjoy Kiristtoos Yesuusa baggaara hara biittaa asawukka gakkanaadan I hegaa oottiis; hegaa gishshawu, nuuni Xoossay immana giido ayyaanaa nu ammanuwan ekkana.

15 Ishatoo, taani leemisuwan issibaa yootays: Maacettidi wurssi simmin, asa maachcha gidikkokka ooninne kolenna woykko A bolli gujjenna. 16 Xoossay immana giido anjjoy Abrahaamassanne A zerettaassa. Eti daro gididabadan, Geeshsha Maxaafay “ne zerettatuyyo” geenna, shin issi ura, hegeekka Kiristtoosa gaanaassi, “ne zerettaayyo” yaagees. 17 Hegaa bollikka, Xoossay koyro Abrahaamaara maacettiisinne 430 layttaappe guyyiyan ba asawu Higgiya immiis, shin he maachchaynne Xoossay Abrahaamayyo immana giido anjjoy Higgiyan kolettibeenna. 18 Ayssi giikko, laataa ekkiyoy higgiya naagiyogaana gidikko, immana giido anjjuwana gidiyogee attiis; shin Xoossay immana giido anjjuwan Abrahaamayyo kehidi laataa immiis.

19 Yaatin, Higgee ayssi imettidee? Anjjuwa immana giido zerettay yaana gakkanaashin mooroy aybakko qonccissana mala imettiis, qassi kiitanchchati maacissiyagaa baggaara Higgiya asaayyo immidosona. 20 Issoy maacidoban maacissiya uri koshshenna, qassi Xoossay barkka hegaadan oottiis. 21 Yaatin Higgee Xoossay immana giido anjjota phalqqii? Akkay phalqqenna! Ayssi giikko, deꞌuwa immana danddayiya higgee asawu imettidaba gidiyakko, eti higgiyan xillo geetettana. 22 Shin Geeshsha Maxaafay asay nagaran qashettidoogaa bessiis; hegaa gishshawu, ammaniyageetussi Xoossay immana giido anjjoy Yesuus Kiristtoosa ammaniyageetuyyo imettana danddayees.

23 Shin ammanoy yaanaappe kase, nuuni Xoossay qonccissana haniyo ammanuwa naagiiddi, higgee nuna naagishin, higgiyan qashettidi deꞌida. 24 Hegaa gishshawu, Higgee nuna Kiristtoosakko kaalettiyagaanne naagiyagaa* gidiis; hegaappe denddidaagan, nuuni ammanuwan xillo geetettana danddayoos. 25 Shin haꞌꞌi ammanoy yiido gishshawu, kaalettiya* higgee nuussi koshshenna.

26 Intte ubbay Kiristtoos Yesuusa ammaniyo gishshawu Xoossaa naata. 27 Ayssi giikko, Kiristtoosa giddo muukettidaageeti intte ubbay Kiristtoosa maayideta. 28 Intte ubbay Kiristtoos Yesuusan issuwa gidiyo gishshawu, intte Ayhuda asa woy Giriike asa, aylle woy goqa, attuma asa woy macca asa gidiyogee aynne maaddenna. 29 Hegaa bollikka, intte Kiristtoosaageeta gidikko, Abrahaama naata,* qassi Xoossay yootidogaadan intte laataa ekkana.

4 Laattiyagee guutta naꞌa gidikko, I ubbabaa goda gidikkokka, aylleppe dummatennaagaa taani yootays, 2 shin A aaway kasetidi giido gallassay gakkanaashin, I naagiyageetunne keettaa ayssiyageetu kushiyan deꞌees. 3 Hegaadan, nuunikka naatettan saꞌaa asaa qofawu* aylle gidida. 4 Shin, giido wodee wurin Xoossay ba Naꞌaa kiittiis; I macca asappe yelettiisinne higgiyan koyettiyagaadan deꞌiis, 5 higgiyan qashettidaageeta shammidi laꞌa kessanawu I hegaa oottiis; hegaappe denddidaagan, Xoossay nuna ba naata oottidi ekkana danddayees.

6 Qassi intte naata gidiyo gishshawu, Xoossay ba Naꞌawu immido ayyaanaa intte wozanan wottiis, qassi he ayyaanay intte intte qaalaa xoqqu oottidi, “Abbaa, Aawawu!” gaanaadan oottees. 7 Hegaa gishshawu, neeni naꞌappe attin, aylle gidiyogee attiis; qassi neeni naꞌa gidikko, Xoossay nena laattiyagaakka oottiis.

8 Gidoppe attin, intte Xoossaa eribeenna wode, xoossa gidennaageetuyyo aylle gidideta. 9 Shin haꞌꞌi intte Xoossaa eridi, woykko Xoossan erettidi, laafanne pattenna qofatuyyo waanidi guyye simmeetiinne etayyo zaarettidi aylle gidanawu koyeetii? 10 Intte gallassata, aginata, keerettida wodetanne layttata qociridi bonchcheeta. 11 Taani inttena maaddanawu hada daafuridanaashsha gaada hirggays.

12 Ishatoo, taanikka kase intte mala gidiyo gishshawu, intte ta mala gidanaadan woossays. Intte tana qohibeekketa. 13 Shin taani intteyyo mishiraachchuwa koyro yootidoy sahettiyogaa gaasuwana gidiyogaa ereeta. 14 Qassi ta sahoy intteyyo paace gidikkokka, intte tana karibeekketa woykko shenetibeekketa;* shin Xoossaa kiitanchchaa, Kiristtoos Yesuusa mokkiyogaadan tana mokkideta. 15 He wode intte ufayttiyo ufayssay awu xayidee? Ayssi giikko, danddayettiyakko intte intte ayfiya wooci kessidi taayyo immanaagaa ammanettays. 16 Yaatin taani intteyyo tumaa yootido gishshawu intteyyo morkke gididanaa? 17 Eti intteyyo loꞌꞌobaa qoppiyo gishsha gidana xayikkokka, inttena labanawu mintti koyoosona; eti inttena taappe shaakkanawu koyoosona; yaatin intte eta baqqi oyqqi kaallana. 18 Gidoppe attin, issi uri intteyyo loꞌꞌobaa qoppiyo gishshawu inttena labanawu mintti koyiyogee awudekka loꞌꞌo; qassi taani inttenaara deꞌiyo wode xalaalan hegaadan hanana koshshenna, 19 ta naatoo, issi maccaasiyo leessoy oyqqiyogaadan tana haranttuwa intte gaasuwan sakkees; qassi intte eeshshay Kiristtoosaagaa mala gidana gakkanaashin tana hegaadan sakkana. 20 Inttebaa waatanaakko taayyo erettennan ixxido gishshawu, taani inttenaara gayttada shonggattiyabaa yootiyakko ixxikke.

21 Ane issibaa oychchays: Higgiyawu azazettanawu koyiyageetoo, Higgee woygiyakko erekketii? 22 Leemisuwawu, Abrahaamayyo naaꞌꞌu attuma naati deꞌiyogee xaafettiis; issoy aylleeppe yelettiis, issoy qassi goqa maccaaseeppe yelettiis; 23 shin aylliya yelidoogee hara naatuugaadan* yelettiis, qassi goqa maccaasiya yelidoogee Xoossay yootidoogaadan yelettiis. 24 Hageeti harabaa gishshaa eqqidaba* gidoosona; ayssi giikko, ha macca asati naaꞌꞌu maachchaa gishshaa eqqidaba; Siinaa Deriyan maacettidoogee naata aylletettawu yeliya Aggaari mala. 25 Aggaara Araba biittan deꞌiya Siinaa Deriya gishshaa eqqidaba, qassi A ha wodiya Yerusalaame gishshaa eqqidaba; ayssi giikko, Yerusalaama ba naatuura aylletettan deꞌawusu. 26 Shin bolla Yerusalaama goqa macca asa, qassi A nu aayyiyo.

27 Ayssi giikko, hagaadan xaafettiis: “Yela erenna mayne maccaasee, ufaytta; leessoy oyqqi erenna maccaasee, ufayttada ilila; ayssi giikko, battaale* maccaasee naati azinay deꞌiyo maccaasee naatuppe keehi daro.” 28 Ishatoo, intte Yisaaqaagaadan Xoossay yootidoogaadan yelettida naata. 29 Shin he wode hara naatuugaadan* yelettidaagee ayyaanan yelettidaagaa naaqqiyogaa doommidoogaadan, haꞌꞌikka hegaadaana. 30 Gidoppe attin, Geeshsha Maxaafay woygii? “Ayllee naꞌay goqa maccaasee naꞌaara mule laattenna gishshawu, aylliyonne I naꞌaa kessada yedda” yaagees. 31 Hegaa gishshawu, ishatoo, nuuni goqa maccaasee naatappe attin, ayllee naata gidokko.

5 Nuuni he laꞌatettan deꞌana mala, Kiristtoosi nuna laꞌa kessiis. Hegaa gishshawu, minni eqqite, qassi aylletettaa qambbaran zaarettidi qashettoppite.

2 Siyite! Intte qaxxarettikko, Kiristtoosi oottidobay inttena aynne maaddennaagaa taani, Phawuloosi, intteyyo yootays. 3 Qaxxarettiyay ooninne kumetta Higgiyawu azazettana bessiyogaa taani A zaarettada hassayissays. 4 Higgiyan xillo geetettanawu koyiyageetoo, intte Kiristtoosappe shaahettideta; laggetiyabi baynna A kehatettaa intte aggi bayideta. 5 Nuuni ayyaanan ammanettidinne* yeemottidi ammanoy demissiyo xillotettaa naagoos. 6 Ayssi giikko, eti siiqiyogaappe denddidaagan qoncciya ammanoy etayyo deꞌiyogee Kiristtoos Yesuusaara issuwa gididi deꞌanawu maaddeesippe attin, qaxxarettiyogee woy qaxxarettennan aggiyogee aynne maaddenna.

7 Intte kase loꞌꞌo woxxeeta. Tumaayyo azazettiiddi deꞌennaadan inttena ooni diggidee? 8 Hegaadan tamaarissiyobay inttena xeegida Xoossaabaa gidenna. 9 Guutta irshshoy munaqan ubbasaa gakkees. 10 Godaara issuwa gidiya intte ta qofaa maayanaagaa ammanettays; shin inttena wayssiyay oonanne gidikko, I bawu bessiyagaadan qaxxayettana. 11 Ishatoo, taani haꞌꞌikka qaxxaraabaa yootiyaba gidikko, asay tana ayssi naaqqii? Taani haꞌꞌikka qaxxaraabaa yootiyaba gidikko, Kiristtoosi kaqettido mittay xubbiyaba gidiyogee attiis. 12 Inttena diiqanawu* koyiya asati banttana muriyakko* taani ixxikke.

13 Ishatoo, intte laꞌa gidanaadan xeegettideta; he laꞌatettay ashuwa amuwa denttettanaadan oottoppite, shin siiqoy denttettin issoy issuwawu aylledan haggaazite. 14 Ayssi giikko, kumetta Higgee, “Ne shooruwa nena siiqiyogaadan siiqana bessees” yaagiya issi azazuwan polettiis.* 15 Intte issoy issuwa saxxiyogaanne miyogaa aggite; yaatennan aggidi issoy issuwa xayssennaadan naagettite.

16 Shin taani issibaa yootays: Ayyaanay kaalettiyogaadan deꞌiyogaa aggoppite; yaatikko, ashoy amottiyobaa aybanne oottekketa. 17 Ayssi giikko, ashoy ba amuwan ayyaanaara gaaddetees; ayyaanaykka ashuwara hegaadan gaaddetees; hageeti issoy issuwara gaaddetoosona; hegaappe denddidaagan, intte oottanawu koyiyobaa oottekketa. 18 Hegaa bollikka, ayyaanay inttena kaalettiyaba gidikko, intte higgiyadan deꞌekketa.

19 Nagaranchcha ashuwa oosoti qoncci beettoosona; hegeeti pokkiya tuna nagaraa,* tuniyogaa, yeelli baynnabaa haniyogaa,* 20 eeqaa xoossaassi goynniyogaa, iita ayyaanatuura gayttiyogaa,* morkketettaa, ooshshaa, miqqaynniya, hanqquwa, palamaa, asaa shaakkiyogaa, asaa kaalliyogaa, 21 qanaatiyogaa, mattottiyogaa, dajje allattaa allaxxiyogaanne hegaa malabata. Hegeeta oottiyageeti Xoossaa Kawotettaa laattennaagaa taani intteyyo kase yootidoogaadan haꞌꞌikka yootays.

22 Shin ayyaanay ayfiyobay siiquwa, ufayssaa, sarotettaa, danddayaa, kehatettaa, loꞌꞌotettaa, ammanuwa, 23 ashilaalo gidiyogaa, bana naagiyogaa. Hegaa malabata diggiya higgee baawa. 24 Hegaa bolli, Kiristtoos Yesuusaageeti nagaranchcha ashuwa A qaaqqaaranne amuwara issippe mittaa bolli kaqqidosona.

25 Nuuni ayyaanay kaalettiyogaadan deꞌikko, ayyaanay kaalettiyogaadan maara hemettana koshshees. 26 Nuuni ceeqettana, issoy issuwara keesettanaadan denttettananne issoy issuwa qanaatana koshshenna.

6 Ishatoo, issi asi akeekennan wora simmiyakkokka, ayyaanay kaalettiyo intte A suure ogiyawu zaarite, shin intte kehatettan yaatana bessees. Qassi inttekka paacettana danddayiyo gishshawu, naagettite. 2 Deexxiya toohuwa issoy issuwagaa tookkiyogaa aggoppite; intte yaatiyogan Kiristtoosa higgiyawu azazetteeta. 3 Ayssi giikko, ooninne wogo asa gidennan bana wogo asadan xeellikko, bana cimmees. 4 Shin asi ubbi ay oottiyakko yiggi xeello; yaatikko I baagaa hara asaagaara geeddarissennan ba oosuwan ufayttana. 5 Ayssi giikko, asi ubbi ba toohuwa* bawu tookkana.

6 Hegaa bolli, qaalaa tamaarissiyo* ooninne hegaa tamaarissiyagaara* loꞌꞌobaa ubbaa koxxo.

7 Inttena ooninne balettoppo: Xoossaa karana danddayettenna. Issi asi ay zerikkonne, I hegaa cakkana; 8 ayssi giikko, ba nagaranchcha ashuwawu giidi zeriya uri ba ashuwappe bashshaa cakkana, shin ayyaanawu giidi zeriya uri ayyaanaappe merinaa deꞌuwa cakkana. 9 Hegaa gishshawu, nuuni salettana* xayikko wodee gakkin cakkiyo gishshawu, loꞌꞌobaa oottiyogaa aggana koshshenna. 10 Yaatiyo gishshawu, nuuni danddayiyo wode* awudenne asawu ubbawu, ubba qassi ammanuwan nunaara dabbotiyageetuyyo loꞌꞌobaa oottana koshshees.

11 Taani intteyyo keehi gita pitaletun ta kushiyan xaafidoogaa beꞌite.

12 Intte qaxxarettanaadan giddiyageeti ubbay asa ufayssanawu* koyiyageeta; eti Kiristtoosi kaqettido mittaa gaasuwan naaqettanawu koyenna gishshawu hegaadan oottoosona. 13 Ayssi giikko, qaxxarettidaageetikka higgiya naagokkona, shin eti intte ashoy hanidoban ceeqettanawu intte qaxxarettanaadan koyoosona. 14 Shin taani mittan kaqettida nu Godaa Yesuus Kiristtoosappe haran ceeqettanawu mule koyikke; aani saꞌaa asay taayyo woridoba* mala, taanikka saꞌaa asawu woridoba mala. 15 Ayssi giikko, ooratta meretappe attin, qaxxarettiyogee woy qaxxarettennan aggiyogee keehi koshshiyaba gidenna. 16 Ha wogaadan maara hemettiya ubbaayyo, Xoossaa Israaꞌeelayyo Xoossay sarotettaa immonne etawu qaretto.*

17 Taani Yesuusa aylle gidiyogaa bessiya malaatay ta bollan deꞌiyo gishshawu, hagaappe guyyiyan tana ooninne metana bessenna.

18 Ishatoo, laggetiyabi baynna nu Godaa Yesuus Kiristtoosa kehatettay intte ayyaanaara gido. Aminꞌꞌi.