PILIPHPHISIYUSA ASAASSI XAAFETTIDAAGAA

1 Kiristtoos Yesuusa aylleti Phawuloosinne Ximootiyosi, Piliphphisiyusan galchchaa heemmiyageetuyyonne galchchawu haggaaziyageetuyyo, hegaadankka, Kiristtoos Yesuusa kaalliya geeshshatu ubbaayyo hagaa kiittoos:

2 Laggetiyabi baynna Xoossaa nu Aawaa kehatettaynne sarotettay, qassi Godaa Yesuus Kiristtoosaagee intteyyo gido.

3 Taani inttena hassayiyo wode awudenne ta Xoossaa galatays; 4 taani inttessi ubbaassi wozanappe woossiyo wode awudenne yaatays. Taani hegaadan woossiyo wode ubban ufayttays; 5 ayssi giikko, intte koyro siyido gallassaappe hanno gakkanawu mishiraachchuwawu* koshshiyabaa oottideta. 6 Intte giddon loꞌꞌo oosuwa doommida Xoossay Kiristtoos Yesuusa gallassay gakkanaashin hegaa intte polanaadan maaddanaagaa ammanettays. 7 Ayssi giikko, taani inttena wozanappe siiqiyo gishshawu, inttebaa ubbaabaa hegaadan qoppiyogee muleera bessiyaba; intte taani qashettidaashin, mishiraachchuwa tumawu mootettishiininne A awaajjanawu maataawata haasayissishin tawu exatideta; yaatiyogan, taanikka inttekka laggetiyabi baynna Xoossaa kehatettan goꞌettida.

8 Taani inttessi ubbaassi Kiristtoos Yesuusaagaadan gomppan mishettiyo gishshawu, inttena ay keena laamotiyakko Xoossay markka. 9 Taani issibawu ubbatoo Xoossaa woossays: Xoossaa sheniya geeshshi eriyogaaninne wurssi akeekiyogan intte siiqoy minni minni baanaadan, 10 qassi intte keehi koshshiyabay aybakko shaakki eranaadan woossays; yaatikko, Kiristtoosa gallassay gakkanaashin intte suurenne harata xubbennaageeta gidana; 11 qassi Yesuus Kiristtoosi maaddin xillotettaa ayfiya intte koridi ayfin, Xoossay ay keena gitakko asay eranaadaaninne A sabbanaadankka woossays.

12 Ishatoo, tana gakkidabay mishiraachchoy darosaa gakkanaadan oottidoogaa intte eranaadan koyays; 13 hegaappe denddidaagan, taani Kiristtoosayyo gaada qashettidoogaa Rooma Kawuwa Naagiyageetinne harati ubbay siyidosona. 14 Godaayyo haggaaziya daro ishati ta qashuwa gaasuwan minettidosona, qassi Xoossaa qaalaa yayyennan yaa darissidi yootoosona.

15 Issoti issoti qanaatiyageetanne yootettiyageeta gidiyo gishshawu Kiristtoosabaa yootiyogee tuma, shin harati loꞌꞌobaa qoppidi yootoosona. 16 Loꞌꞌobaa qoppiyageeti taani mishiraachchuwa tumawu mootettanawu sunttettidoogaa eriyo gishshawu, siiqoy denttettin Kiristtoosabaa yootoosona; 17 shin qanaatiyageeti ta qashuwa waayiya yaa darissanawu koyiyo gishshawu, suure wozanaappe gidennan, palamettanawu yootoosona. 18 Yaatin hanidabay aybee? Wordduwan gidin tuman gidin, ay gidinkka, Kiristtoosabay odettees, qassi hegee tana ufayssees; 19 ayssi giikko, intte wozanappe woossiyo gishshawunne Xoossay Yesuus Kiristtoosawu immido ayyaanay maaddiyo gishshawu, taani attanaagaa erays. 20 Taani aynne yeellatennaagaa ammanettaysinne ammanays, shin taani yayyennan yootiyo gishshawu, taani kase oottidoogaadan, haꞌꞌikka Kiristtoosi tanan bonchchettees; taani paxa deꞌin woy hayqqinkka, I tanan* bonchchettana.

21 Taani deꞌikko Kiristtoosayyo deꞌays, qassi hayqqikko taani goꞌettays. 22 Taani ashuwan deꞌikko, Kiristtoosayyo gujjada oottana danddayays; gidoppe attin, taani ay dooranaakko erissikke. 23 Kiristtoosaara deꞌiyogee aadhdhiyaba gidiyogee erettidaba gidiyo gishshawu, taani laꞌa kiyanawunne aara deꞌanawu koyays; hegaappe denddidaagan, ha naaꞌꞌaappe awugaa dooranaakko tawu kirqqi giis. 24 Gidoppe attin, taani inttessi gaada ashuwan deꞌiyogee keehi koshshiyaba. 25 Taani hegaa ammanettiyo gishshawu, intte diccanaadaaninne ammanuwan intte ufayttanaadan ashuwan inttenaara ubbaara deꞌashshanaagaa erays; 26 yaanikko, intte Kiristtoos Yesuusa kaalliyageeta gidiyo gishshawu, taani inttekko biyo wode intte keehi ufayttana.

27 Kiristtoosa mishiraachchuwawu bessiyagaadan deꞌite;* yaanikko, taani inttekko baada inttena beꞌin woy inttenaara deꞌana xayin, taani inttebaa siyada intte mishiraachchuwa ammanuwawu hashetidi baaxetiiddi, issi ayyaanaaninne issi shemppuwan* minnidi deꞌiyogaa erana; 28 qassi intte inttena eqettiyageetuyyo aynne yayyennan deꞌiyogaakka taani erana. Hegee eti xayanaagaa bessiyaba, shin intte attanaagaakka bessiyaba; qassi Xoossay hegee qonccanaadan oottiis. 29 Ayssi giikko, intte Kiristtoosa ammaniyo maata xalaala gidennan, ayyo giidi waayettiyo maataakka ekkideta. 30 Tanaara gayttin intte beꞌido, qassi tanaara gayttiiddi deꞌiyogaa intte haꞌꞌi siyiyo baaxiya inttekka baaxetiiddi deꞌeeta.

2 Intte Kiristtoosan issoy issuwa kaafikko, issoy issuwa siiqidi minttettikko, issoy issuwawu qoppikko,* issoy issuwawu gomppan mishettikkonne qarettikko, 2 qofaaninne siiquwan issuwa gidiyogan, muleera issippetettan deꞌiyogan,* qassi kahan issi mala qofaa qoppiyogan taani keehi ufayttanaadan oottite. 3 Ooyettoppite woy ceeqettoppite, shin ziqqi giidi,* harata intteppe aadhdhiya asadan xeellite; 4 inttena haratubaykka qofissoppe attin, inttebaa xalaalay qofissoppo.

5 Intte Kiristtoos Yesuusi qoppido ogiyan ubbatoo qoppite; 6 I Xoossaa milatidi deꞌidaba gidikkonne, Xoossaa sohuwa wotti ekkidi aara lagge gidanawu mule qoppibeenna. 7 Shin I bawu deꞌiya ubbabaa aggi bayidi aylle milatiisinne asa* gidiis. 8 Hegaa bolli qassi, I asa gididi yiido* wode, ziqqi giidi, haray atto hayqqanawukka, ee, mittaa bolli hayqqanawukka azazettiis. 9 Hegaappe denddidaagan, Xoossay ayyo keehi leqqiya maataa immiis, qassi ayyo kehidi ay sunttappekka aadhdhiya sunttaa immiis; 10 hegaa gishshawu, saluwan deꞌiyageeti, saꞌan deꞌiyageetinne saꞌaappe garssaara deꞌiyageeti ubbay A sinttan Yesuusa sunttan gulbbatana; 11 qassi eti ubbay Xoossaa Aawaa sabbanawu Yesuus Kiristtoosi Goda gidiyogaa markkattana.

12 Taani siiqiyogeetoo, intte awudekka azazetteeta; taani inttenaara deꞌiyo wode azazettideta, shin haꞌꞌi inttenaara deꞌenna wode hegaappekka aaruwan azazetteeta; yayyiiddinne kokkoriiddi hegaadan oottiyogaa aggoppite; yaatikko, intte attana. 13 Ayssi giikko, intteyyo koshshaanne oottanawu wolqqaa immiyogan inttena minttidi, bana ufayssiyabaa oottiyagee Xoossaa. 14 Aybanne oottiyo wode awudekka zuuzummoppitenne palamettoppite; 15 hegaappe denddidaagan, intte geeshshanne suure gidana, qassi intte Xoossaa naata gidiyo gishshawu, iitanne geella yeletaa giddon deꞌikkokka, bali baynnaageeta gidana; intte ha saꞌaa asaa giddon pooꞌissiyabadan wagaggidi pooꞌana; 16 intte deꞌuwa qaalaa mintti oyqqiyogan yaatana. Hegaappe denddidaagan, ta wottay woy ta daafuray hada gidennaagaa eriyo gishshawu, Kiristtoosa gallassi taayyo ufayttiyo gaasoy deꞌana. 17 Gidoppe attin, ammanoy denttettin intte oottidoogaadan, taani yarshshuwaninne geeshsha haggaazan ushshaa yarshshodan gukkaydda deꞌikkokka, inttenaara ubbaara keehippe ufayttays. 18 Hegaadan, inttekka tanaara keehi ufayttana koshshees.

19 Godaa Yesuusa shene gidikko, taani Ximootiyosa mata wode inttekko kiittanawu qoppays; yaatikko, I inttebaa tawu yootin taani minettana. 20 Aagaa mala xeelay deꞌiyo, intteyyo tumuppe qoppana asi kiittanawu taayyo baawa. 21 Ayssi giikko, harati ubbay banttana goꞌꞌiyabaappe attin, Yesuus Kiristtoosi koyiyobaa qoppokkona. 22 Shin I hegaa mala asa gidennaagaa naqaashan bessidoogaa intte ereeta; ayssi giikko, naꞌi ba aawaara oottiyogaadan, I mishiraachchoy darosaa gakkanaadan tanaara minnidi oottiis. 23 Hegaa gishshawu, taani ta yohoy waananaakko beꞌada, sohuwara inttekko kiittanawu qoppidoy A. 24 Godaa shene gidikko, taanikka mata wode baanaagaa ammanettays.

25 Shin haꞌꞌissi, tanaara issippe oottiyagaanne Kiristtoosa wotaaddaraa, qassi koshshiyaban tana maaddanaadan intte kiittido, ta ishaa Eppafiroditoosa inttekko kiittana koshshiyogaa qoppays; 26 I inttena ubbaa beꞌanawu laamotiyo gishshawu A kiittays, qassi I harggidoogaa intte siyido gishshawu azzanees. 27 I tumukka harggidi hayqqiichchi attiis; shin Xoossay awu qarettiis,* A xalaalaassa gidennan, tawukka qarettiis; hegaappe denddidaagan, taani haꞌꞌi azzaniyogaappe aaruwa azzanikke. 28 Hegaa gishshawu, taani ellellada A kiittays; hegaappe denddidaagan, intte aara gayttiyo wode zaarettidi ufayttana, qassi taanikka kaseegaa keenaa hirggikke. 29 Hegaa gishshawu, Godaa kaalliyageeta intte ubbatoo mokkiyogaadan A wozanappe mokki ekkite, qassi hegaa mala asata awudekka bonchchite; 30 ayssi giikko, intte haa yiidi maaddana danddayibeennaban tana maaddanawu I ba shemppuwa* daafan yeggidi, Kiristtoosa* oosuwa gaasuwan hayqqiichchi attiis.

3 Wurssettan, ta ishatoo, awudenne Godan ufayttite. Taani kase xaafidobaa zaarettada xaafiyogee tana wayssiyaba gidenna, qassi intte naagettanaadan hegaa xaafays.

2 Kanatuppe naagettite; qohiyabaa oottiyageetuppe naagettite; ashuwa qanxxi oliyageetuppe* naagettite. 3 Ayssi giikko, Xoossaa ayyaanay maaddin geeshsha haggaazaa haggaaziya, Kiristtoos Yesuusan ceeqettiyanne asatettaaban ammanettennanne tumu qaxxaraa qaxxarettidaageeti nuna; 4 asatettaaban ammanettiyo gishshawu ceeqettanawu ooyyonne gaasoy deꞌikko, taayyo aagaappe aadhdhiya gaasoy deꞌees.

Hara ooninne asatettaaban ammanettiyo gaasoy baayyo deꞌees giidi qoppikko, taayyo aagaappe aadhdhiya gaasoy deꞌees; 5 taani hosppuntta gallassi qaxxarettida Israaꞌeela dere asa, qassi Biniyama yaranne Ibraaweti yelido Ibraawe, higgiyara gayttidaagan Parisaawe, 6 galchchaa naaqqanawu taani wozanappe oottaas, higgee xillotetta giyobaara gayttidaagan taani boree baynna asa gidiyogaa bessaas. 7 Gidoppe attin, taani kase keehi goꞌꞌiyabadan xeelliyobata Kiristtoosassi gaada aynne goꞌꞌennabadan xeellays.* 8 Hegaa bollikka, taani ta Godaa Kiristtoos Yesuusa eriyogee aybippekka aadhdhiyo gishshawu, ubbabaa aynne goꞌꞌennabadan xeellays. Taani Kiristtoosaara issuwa gidanawu ayyo gaada ubbabaa agga bayasinne pitodan* xeellays; 9 hegaadankka, Higgiyan koyettiyabaa oottido ta xillotettaa gishshataassa gidennan, Kiristtoosa ammaniyogan, hegeekka, ammanuwan Xoossaa sinttan xillo geetettiyo gishshawu, Kiristtoosaara issuwa gidanawu hegaa oottaas. 10 Taani anne A dendduwa wolqqaa eranawu, qassi adan waayettanawunne aagaa mala hayquwa hayqqanaassi giiga uttanawu halchchaas; 11 taani danddayettikko kasetiya dendduwan hayquwappe denddanaakkonne beꞌanawu halchchaas.

12 Taani woytuwa ekkaychchaas woy polaychchaas* giyogaa gidenna, shin Kiristtoos Yesuusi tana ayyo doorido* woytuwa oyqqanawu ubbatoo baaxetays. 13 Ishatoo, taani woytuwa oyqqaychchidabadan qoppikke; shin issibaa oottays: Taappe guyyen deꞌiyabata agga bayada ta sinttan deꞌiyabatukko zaatturays; 14 taani Xoossay Kiristtoos Yesuusan xeegidoogeetuyyo immiyo saluwa deꞌuwa woytuwa ekkanawu ubbatoo baaxetays. 15 Hegaa gishshawu, nuuni ammanuwan minnidaageeti hegaadan qoppana koshshees, shin intte hegaappe dummatiyabaa qoppikko, hegaadan qoppanaadan Xoossay inttena maaddana. 16 Gidoppe attin, nuuni ay keena diccidaba gidikkokka, simi he maaran ubbatoo sinttawu hemettoos.

17 Ishatoo, issippetettan tana milatite, qassi nuuni inttena bessido ogiyadan deꞌiyageeta ubbatoo wochchite. 18 Kiristtoosi kaqettido mittawu morkkedan deꞌiya darotubaa taani intteyyo darotoo yootaas, shin haꞌꞌi etabaa yeekkaydda yootays. 19 Eti wurssettan xayana, eta uloy eta xoossaa, eti yeellatana bessiyaban ceeqettoosona, qassi saꞌaabaa xalaalaa qoppoosona. 20 Shin nu biittay saluwana, qassi nuuni saluwan deꞌiya, nuna ashshiya Godaa Yesuus Kiristtoosa laamotiiddi naagoos; 21 I ubbabaa haaranaadan bawu imettida wolqqan nu laafa bollaa baagaa mala gita bolla* oottana.

4 Hegaa gishshawu, taani siiqiyo ta ishatoo, intte Godan minnidi eqqanay hegaadaana; taani inttena siiqaysinne laamotays, qassi intte taayyo ufayssanne kallachcha.

2 Ewodiyanne Sinxxiika maayettidi* Godaayyo haggaazanaadan taani eta zorays. 3 Ee, ta tumu miiriyawu,* ha macca asata maaddiyogaa aggennaadan nenakka oychchays; Qaleminxxoosinne harati etaara issippe tanaara hashetidi mishiraachchuwawu minnidi oottidosona.* Deꞌo maxaafan hageetu ubbaa sunttay deꞌees.

4 Ubbatoo Godan ufayttite. Gujjadakka gays, Ufayttite! 5 Intte zozzu geennaagaa asay ubbay ero. Goday matan deꞌees. 6 Intte aybissinne hirggoppite, shin ubbabaa Xoossaayyo woosan yootite; intte woossiyo wode watiwatitenne* A galatite; 7 qassi asi akeekana danddayenna sarotettaa Xoossay intteyyo immana; yaatiyogan, I Kiristtoos Yesuusan intte wozanaanne intte qofaa* naagana.

8 Wurssettan, ishatoo, tuma gididabaa aybanne, keehi koshshiyabaa aybanne, xillobaa aybanne, geeshshabaa* aybanne, siiqanaadan oottiyabaa aybanne, bonchchobaa aybanne, loꞌꞌobaa aybanne, qassi nashettiyabaa aybanne, hageeta qoppiyogaa aggoppite.* 9 Intte taappe tamaaridoogaadaaninne ekkidoogaadan, qassi taani yootishin siyidoogaadaaninne oottishin beꞌidoogaadan ubbatoo oottite, qassi sarotettaa Xoossay inttenaara deꞌana.

10 Intte haꞌꞌi wurssettan zaarettidi taassi qoppiyogaa doommido gishshawu taani Godan keehi ufayttays. Intte taassi qoppiyaba gidikkokka, tana maaddiyo oge demmana danddayibeekketa. 11 Taani hegaa giyogee metootido gishshataassa gidenna; ayssi giikko, ta hanotay ayba gidinkka koshshiyaban tana danddayada* deꞌiyogaa tamaaraas. 12 Taani paccin deꞌiyogee aybakko, qassi palahin deꞌiyogeekka aybakko erays. Taani ubbabaaninne ubba hanotankka daroti erennabaa tamaaraas; taani kaloy aybakko, qassi namisaykka aybakko, korettin deꞌiyogee aybakko, qassi aybikka xayin deꞌiyogeekka aybakko tamaaraas. 13 Taayyo wolqqaa immiyagan an ubbabaassi tawu minotettay deꞌees.

14 Gidoppe attin, intte taayyo kehidi ta waayiyan tana maaddideta. 15 Intte mishiraachchuwa koyro siyi simmin, taani Maqidooniyappe biido wode, taani maaddidoogawu zaaridi tana maaddida galchchi intteppe hari baynnaagaakka intte Piliphphisiyusa asati ereeta; 16 taani Tasalonqqen deꞌiyo wode, intte taayyo koshshiyabaa issitoo xalaala gidennan, naaꞌꞌutoo yeddideta. 17 Taani hegaa giyogee imotaa koyada gidenna, shin intte loꞌꞌo oosoti Xoossaa sinttan yaa gujjanaadan koyays. 18 Shin, tawu koshshiya ubbabay, ubba hegaappekka darobay taayyo deꞌees. Intte Eppafiroditoosa bolli kiittido sawiyanne Xoossaa ufayssiya yarshshuwa taani ekkido gishshawu, haꞌꞌi taayyo paccidabi baawa. 19 Yaatin, ta Xoossay ba gita duretettaadan intteyyo koshshiya ubbabaa Kiristtoos Yesuusa baggaara kunttidi immana. 20 Nu Xoossawunne Aawawu meri merinawu bonchchoy gido. Aminꞌꞌi.

21 Kiristtoos Yesuusa kaalliya geeshsha asa ubbaayyo ta sarotaa yootite. Tanaara deꞌiya ishati intteyyo sarotaa kiittoosona. 22 Geeshshati ubbay, ubba qassi Qeesaara garuwan deꞌiyageetikka intteyyo sarotaa kiittoosona.

23 Laggetiyabi baynna Godaa Yesuus Kiristtoosa kehatettay intte ayyaanaara gido.