XIMOOTIYOSASSI XAAFETTIDA NAAꞌꞌANTTOOGAA

1 Kiristtoos Yesuusa kaalliyo gishshawu Xoossay deꞌuwa immana giidoogaadan, Xoossaa shene gidin Kiristtoos Yesuusi kiittido taani Phawuloosi, 2 ta siiqo naꞌawu Ximootiyosawu hagaa xaafays:

Laggetiyabi baynna Xoossaa Aawaa kehatettay, maarotaynne sarotettay, qassi nu Godaa Kiristtoos Yesuusaagee neeyyo gido.

3 Taani qamminne gallassi wozanappe woossiyo wode nena ubbatoo hassayaydda, ta mayzza aawatuugaadan, qassi geeshsha kahan ayyo geeshsha haggaazaa haggaaziyo Xoossaa galatays. 4 Taani ne afuttaa hassayaydda nena beꞌanawu laamotays; qassi taani nena beꞌikko keehi ufayttana. 5 Ayssi giikko, koyro ne aayee aayen Loydiininne ne aayen Ewuniiqin deꞌiya worddoy baynna ne ammanuwa taani hassayays; qassi he ammanoy haꞌꞌikka neeyyo deꞌiyogaa ammanettays.

6 Hegaa gishshawu, taani ta kushiya ne bolli wottiyo wode Xoossay neeyyo immido imotay tamaadan pololattanaadan oottana mala nena hassayissays. 7 Ayssi giikko, Xoossay nuuyyo wolqqaa, siiquwanne suure qoppiyo ayyaanaa immiisippe attin, yashshaa ayyaanaa immibeenna. 8 Hegaa gishshawu, Godaabaa markkattiyoban woy ayyo gaada qashettida taban yeellatoppa, shin mishiraachchuwa gaasuwan waayettiyo wode Xoossay neeyyo wolqqaa immanaagaa ammanettada gencca. 9 I nuna ba sheniyaninne laggetiyabi baynna ba kehatettan ashshiisinne geeshsha gidanaadan xeegiisippe attin, nu oosuwana gidenna. I Kiristtoos Yesuusaara gayttidaagan nuuyyo hegaa oottoosappe keehi daro wode gidiis; 10 shin nuna ashshiya Kiristtoos Yesuusi qonccidi beettidoogan hegee haꞌꞌi geeyidi erettiis; I hayquwa xayssiis, qassi deꞌuwabaynne musenna bollaabay mishiraachchuwa baggaara qonccanaadan oottiis; 11 hegaayyo awaajjiyagaa, kiitettidaagaanne asttamaare gidanaadan Xoossay tana dooriis.

12 Taani hagaadan waayettiyoy hegaassa, shin hegee tana yeellayenna. Ayssi giikko, taani ammanido Xoossaa erays, qassi taani ayyo sheedhdhido ubbabaa he gallassi gakkanaashin I naaganaagaa ammanettays. 13 Neeni taappe siyido tumu* qaalatu anuwa Kiristtoos Yesuusaara gayttida ammanuwaranne siiquwara mintta oyqqa. 14 Neeyyo hadara giido ha loꞌꞌobaa nunan deꞌiya geeshsha ayyaanay maaddin naaga.

15 Isiya moottan deꞌiyageeti ubbay, Pigeluusikka Hermmogeneesikka taayyo miyye gidiyogaa aggidoogaa eraasa. 16 Henesifooru keettaa asawu Goday qarettanaadan amottays; ayssi giikko, I tana darotoo minttettiis, qassi taani qashettidoogan yeellatibeenna. 17 Shin I Roomen deꞌiyo wode, tana mintti koyidi demmiis. 18 Goday Yihoowi he gallassi ayyo qarettanaadan woossays. Qassi I Efisoonan taayyo oottido ubbabaa loyttidi ereeta.

2 Hegaa gishshawu, ta naꞌawu, Kiristtoos Yesuusan deꞌiya laggetiyabi baynna kehatettan Xoossay neeyyo wolqqaa immanaadan oychchiyogaa aggoppa; 2 qassi neeni taappe siyido, daroti markkattidobata ammanettida attuma asata tamaarissa; yaatin, etikka harata hegaa tamaarissana danddayiyageeta gidana. 3 Neeni Kiristtoos Yesuusa loꞌꞌo wotaaddara gidiyo gishshawu, waayettiyo wode gencca. 4 Ay wotaaddarinne bana wotaaddara oosuwan gelissidaagaa ufayssanawu koyiyo gishshawu, zalꞌꞌiyan* wuttaalettenna.* 5 Qassi kaassankka, annaacettiya uri maaraadan annaacettana xayikko woytuwa* ekkenna. 6 Ba gaden minni oottida asi ba kattaa ayfiyappe koyro miyogee bessiyaba. 7 Taani yootiyobaa ubbatoo qoppa; qassi Goday ha ubbabaa neeni akeekanaadan* oottana.

8 Taani yootiyo mishiraachchuwadan, Xoossay Kiristtoosa hayquwappe denttidoogaanne I Daawita zeretta gidiyogaa hassaya; 9 mishiraachchuwa gaasuwan, taani higgiya kanttidabadan waayettaysinne qashettaas. Gidoppe attin, Xoossaa qaalaa ooninne qachchana danddayenna. 10 Hegaappe denddidaagan, taani doorettidaageetussi gaada ubbaban genccays; hegaa gishshawu, etikka Kiristtoos Yesuusan attananne merinaa anjjuwa demmana danddayoosona. 11 Ha yohoy ammanana koshshiyaba: Nuuni aara hayqqikko, aara issippe deꞌanaageekka tuma; 12 nuuni genccidi deꞌikko, aara issippe kawotana; nuuni A erokko giikko, ikka nuna erikke gaana; 13 I ba hanuwappe harabaa aybanne hanana danddayenna gishshawu, nuuni ammanettikko, I awudekka ammanettees.

14 Hageeta eta hassayissiyogaa aggoppa, qassi qaalatuura gayttidaagan palamettennaadan Xoossaa sinttan etayyo yoota;* he palamay siyiyageeta qohiyo* gishshawu aynne maaddenna. 15 Tumaa qaalaa maara tamaarissiyanne qonccissiya, Xoossaa ufayssiya, yeellatiyobi baynna oosanchcha gidanawu neeyyo danddayettida ubbabaa ootta. 16 Shin Xoossaa toochchiya pattenna odota siyoppa; ayssi giikko, hegeeti Xoossay dosennabay eellanaadan oottoosona; 17 qassi eti haasayiyobay laaꞌiya citto mala. Hemeneyosinne Piliixoosikka he asatu yara. 18 Ha asati denddoy polettiichchiis yaagidi, tumaappe wora simmidosona, qassi issoti issoti ammaniyogaa agganaadan oottidosona. 19 Shin Xoossay hiixxido shuchchay minni eqqiis, qassi A bolli ha maatafay deꞌees: “Yihoowi baageeta erees,” qassi, “Yihoowa sunttaa xeegiya ubbay iitabaa aggana bessees.”

20 Issi gita keettan worqqaappenne biraappe oosettida miishsha* xalaala gidennan, mittaappenne urqqaappe oosettida miishshatikka deꞌoosona; qassi issoti issoti bonchchobawu goꞌettiyogeeta gidikkonne harati bonchchettennabawu goꞌettiyogeeta. 21 Hegaa gishshawu, ooninne geedossaageetuppe baqatikko, I geeyida, ba godawu maaddiya, loꞌꞌo ooso ubbawu giigi uttida, bonchchobawu goꞌettiyo miishsha* gidana. 22 Hegaa gishshawu, yelagatettaa amuwappe baqata, shin geeshsha wozanan Godaa xeegiyageetuura issippe suurebaa oottanawu, ammanuwawu, siiquwawu, sarotettawu baaxeta.

23 Qassi pattenna eeyya haasayay palamaa denttiyogaa erada hegaa siyoppa. 24 Ayssi giikko, Godaa ayllee palamettana koshshenna, shin I asa ubbawu kehana,* tamaarissanawu danddayiyagaa gidananne asi naaqqiyo wode danddayana bessees; 25 qassi neeni tamaarissiyobaa maayennaageeta kehatettan zora. Ooni eri, Xoossay anttin* eti zilꞌꞌetti laamettidi* tumaa geeshshi erana danddayoosona; 26 qassi eti banttana Dabloosi ba koyiyobaa ootissanawu paxa oyqqidoogaa akeekidi, suure qoppiyogaa doommananne A gitiyappe kessi ekkana danddayoosona.

3 Shin wurssetta gallassatun haniyabay wayssiyabanne daafan yeggiyaba gidanaagaa era. 2 Ayssi giikko, asay ba xalaalaa siiqana, miishshaa siiqana, ceeqettana, axiraarana, toochchana, ba aawaassinne aayeessi azazettenna, galatenna, haratuyyo ammanettenna, 3 so asaa siiqenna, haratuura maayettenna, sunttaa bashshana, bana naagenna, biittaa goggana, loꞌꞌobaa dosenna, 4 ba laggiya qohana, zozzu gaana, otorettana, Xoossaa siiqiyogaa aggidi bana ufayssiyabaa siiqana, 5 eti Xoossaayyo haggaaziyaba milatana, shin eta deꞌoy hegaa bessenna, qassi hegeetu achchappe kichchaychcha. 6 He asatu giddoppe balettiya asati denddidi, dumma dumma amuwan xoonettida, bantta nagaraa gaasuwan minnibeenna macca asatu soo gelidi eta balettana, 7 eti ubbatoo tamaarikkokka, tumaa mule geeshshi erana danddayibookkona.

8 Yaaneesinne Yambbareesi Muuse qofaa phalqqidoogaadan, ha asatikka tumaa phalqqiyogaa aggokkona. He asatu qofay muleera moorettiis; eti ammanuwara gayttidabawu bessiya asa gidokkona. 9 Qassi etayyo ushachchana danddayenna; ayssi giikko, he naaꞌꞌu asatuugaadan etawu wozani baynnaagee* asa ubbawu keehi qonccana. 10 Shin tamaarissuwara, deꞌuwara, halchchuwara, ammanuwara, danddayaara, siiquwara, genccaara gayttidaagan taani oottidobaa neeni loytta kaalladasa; 11 qassi taani Anxxookiyan, Iqooniyoneeninne Lisxxiran naaqettido naaquwanne waayettido waayiya eraasa. Taani he naaquwa kantta kiyaas, qassi Goday tana he ubbabaappe ashshiis. 12 Kiristtoos Yesuusa kaalliyanne Xoossaayyo goynniiddi deꞌanawu koyiya ubbay naaqettanaagee erettidaagaa. 13 Shin iita asatinne balettiyageeti balettiiddinne harati eta balettishin yaa iiti iiti baana.

14 Gidoppe attin, neeni ooppe tamaaridaakko eriyo gishshawu, eti nena tamaarissidoogaadaaninne ammananaadan maaddidoogaadan deꞌiyogaa aggoppa; 15 qassi Kiristtoos Yesuusa ammanada attanaadan oottiya hayyo eriya asa nena oottana danddayiya geeshsha maxaafata, neeni yelettoosappe doommada eriyogaa hassaya. 16 Geeshsha Maxaafati ubbay Xoossay kaalettin xaafettidosona, qassi hegeeti tamaarissanawu, seeranawu, ubbabaa sittayanawu,* suurebaa oottana mala loohanawu oonakka maaddoosona; 17 hegaa gishshawu, Xoossawu goynniya asi loꞌꞌo ooso ubbawu muleera gixxi denddida giiga asa gidana danddayees.

4 Xoossaa sinttan, qassi qoncci beettiyo wodenne ba Kawotettan haariyo wode paxa deꞌiyageetu bollinne hayqqidaageetu bolli daannatana Kiristtoos Yesuusa sinttan nena mintta azazays: 2 Xoossaa qaalaa awaajja; injjetiya wodiyankka wayssiya wodiyankka yeemottada elle hegaa ootta; danddayayddanne qara asttamaaredan tamaarissaydda seera, callanne zora. 3 Ayssi giikko, eti tumu* timirttiya siyanawu koyenna wodee yaana, qassi eti bantta amuwadan, siyanawu koyiyobaa xalaalaa* tamaarissiya asttamaareta banttawu shiishshana. 4 Eti tumaa siyiyogaa aggidi worddo oduwakko simmana. 5 Shin neeni ubbaban suure qoppiyogaa aggoppa, metoy gakkiyo wode gencca, mishiraachchuwa yootiyogaa aggoppa, qassi minnada haggaaza.

6 Ayssi giikko, taani ushshaa yarshshodan gukkaydda deꞌays, qassi taani laꞌa kiyana wodee matattiis. 7 Taani loytta olettaas, wottaa woxxada wurssaas, qassi ammanuwa mintta kaallaas. 8 Suure pirddiya daannay, Goday haꞌꞌi taayyo woytuwa immanawu giigi uttiis. Geeshshatuyyo imettiya he woytuwa I taayyo he gallassi immana; shin I ta xalaalawu gidennan, I yaanaadan wozanappe amottiya ubbawu hegaa immana.

9 Gamꞌꞌennan taakko yaanawu neeyyo danddayettida ubbabaa ootta. 10 Ayssi giikko, Deemaasi ha saꞌaabaa* siiqidi, tana aggi bayidi Tasalonqqe biis; Qerqqiisi Galaatiya biis; Tiitu Dilmmaaxiya biis. 11 Luqaasa xalaalay tanaara deꞌees. Marqqoosa ekkada ya; ayssi giikko, I haggaazan tana keehi maaddana. 12 Shin taani Tikiqoosa Efisoona kiittaas. 13 Neeni yaydda, taani Xiroꞌaadan Karppoosa son aggada yiido afalaanne xaaxettida maxaafata, ubba qassi, galbban xaafettidaageeta ekkada ya.

14 Naasiya qoxxiya Iskkinddiri tana darotoo qohiis. Yihoowi ayyo A oosuwadan haluwa kessana. 15 I nuuni yootiyobaappe keehi geellabaa haasayiyo gishshawu, neenikka appe naagettana koshshees.

16 Tana mootiyobawu taani koyro zaariyo wode, eti ubbay tana aggidi biidosonappe attin, ta miyyiyan ooninne eqqibeenna; Xoossay etawu atto go. 17 Shin Goday ta miyyiyan eqqidi taayyo wolqqaa immiis; hegaappe denddidaagan, taani mishiraachchuwa pola yootana, qassi asay ubbay hegaa siyana danddayees; hegaa bollikka, Goday tana gaammuwa doonaappe ashshiis. 18 Goday tana iitabaa ubbaappe ashshidi, saluwan deꞌiya ba Kawotettawu gattana. Ayyo meri merinawu sabay gido. Aminꞌꞌi.

19 Phirisqqilonne Aqiila, qassi Henesifooru soo asaa saro ga.

20 Erasxxoosi Qoronttoosan attiis, shin Xirofiimoosi sahettido gishshawu Miliixen aggada yaas. 21 Balggoy gelennan haa gakkanawu neeyyo danddayettida ubbabaa ootta.

Eyubuluusi neeyyo sarotaa kiittees; hegaadankka, Phudeesi, Liinoosi, Qilaadanne ishati ubbay neeyyo sarotaa kiittoosona.

22 Goday ne ayyaanaara gido. Laggetiyabi baynna A kehatettay neeyyo gido.