Maaddiya Ura Oychcha
“Issi asi barkka teqqanau danddayenna metuwaa na77u asati issippe eqettidi, teqqanau danddayoosona.”—Eranchchaa 4:12.
ASI maaddiyo wode, issibaa poliyo loꞌꞌo qaaday deꞌees. Yaatiyo gishshawu, neeni sijaaraa uyiyoogaa agganawu koyikko, so asay woy laggeti maaddanaadan oychchiyoogee loꞌꞌoba.
Sijaaraa uyiyoogaa aggida asi neessi qarettananne nena maaddana danddayiyo gishshawu, A oychcha. Denmarken deꞌiya, Torbena giyo Kiristtaanee, “Harati kaafidoogee tana keehippe maaddiis” yaagiis. Hindden deꞌiya Abrahaami qassi hagaadan giis: “Nu so asaynne gubaaꞌiyan deꞌiya ishanttinne michchontti tana tumuppe siiqidoogee he amaliyaa agganaadan maaddiis.” SHin issi issitoo, so asaynne laggeti kaafiyoogaa xallay gidenna.
Bagiwandda giyo asi hagaadan giis: “Taani 27 layttawu sijaaraa uyaas; shin Geeshsha Maxaafay tuna meeziyaa xeelliyaagan yootiyoobaa erada, aggabayanawu qofaa qachchaas. Kaseegaa keena sijaaraa uyennan agganawu malaas. Kase laggeeta aggada hara asaara laggetaas. Qassi, eranchcha uri tana maaddiis. SHin yaatinkka aggana danddayabeykke. Wurssettan, issi galla qammi ta wozanan deꞌiyaabaa ubbaa Xoossaa Yihoowawu yootada, hegaa agganawu tana maaddana mala A woossaas. Hegaappe guyyiyan, aggaas!”
Oottana koshshiya harabay qassi metana danddayiyaabawu kasetidi giigettiyoogaa. He metoti aybee? Kaalliya huuphe yohoy hegaa qonccissees.
[Saaxiniyaa]
XALIYAA GOꞌETTANA KOSHSHII?
Sijaaraa amaliyaa agganawu maaddiya, nikotin pach giyoogaa mala xaleta zalꞌꞌiyoogee daro miiloone biraa demmiyooba gidiis. Xaliyaa ekkanaappe kase kaalli deꞌiya oyshata qoppa:
Hegee aybin goꞌꞌii? He xaleta ekkanaadan minttettiyaageeti agganawu maliyo wode darin sakkenna gaana danddayoosona, shin he xaleti maaddiyoogaa issi issi asay maayenna.
Hegee waati qohana danddayii? Amarida xaleti looqqoyana, unꞌꞌettanaadaaninne izaawu bana woranawu koyanaadan oottana danddayoosona. Qassi nikotinee gattido qohuwaa giigissiyaabati hara ogiyan payyatettaa qohiya xale gidiyoogaa hassaya. Hegaa gishshawu, he xaliyaa goꞌettiyoogee hara amale gidees.
Doorana harabay aybee? Sijaaraa uyiyoogaa aggidaageetun xeetaappe 88 kushe gidiyaageeti ayba xalenne ekkennan sohuwaara aggibayidoogaa issi xinaatee qonccissiis.