Saynttistteti Nuussi Yootana Danddayennabay Aybee?

Saynttistteti saluwaaninne saꞌan deꞌiya ubbabaa xannaꞌidaba milatees. SHin eti zaarana danddayenna keehi koshshiya daro oyshati deꞌoosona.

Saynttistteti saluwaanne saꞌaa, qassi deꞌuwaa doomettaabaa yootana danddayiyoonaa? Danddayokkona. Saluwaanne saꞌaabaa xannaꞌiya saynttistteti A doomettaabaa qonccissana danddayoosona giidi issoti issoti yootoosona. Gidoppe attin, Darttimawuz Kolloojjiyan awa ayfiyaabaanne xoolinttiyaabaa xannaꞌiya, qassi Xoossay deꞌiyoogaa siriya, Marssello Gilazeri giyo profeeseree, “Nuuni saluwaanne saꞌaa doomettaabaa aybanne qonccissibookko” yaagiis.

Hegaadankka, Saynis Niwus giyo maxeetee issi huuphe yohuwan deꞌuwaa doomettaabaa xeelliyaagan hagaadan giis: “Ha saꞌan deꞌoy tumuppe waani doommidaakko erana danddayettennaba milatees; ayssi giikko, saꞌay koyro merettido wode hanidabay aybakko bessiya zaallatinne A giddon deꞌiyaabati xayiichchidosona.” Saloynne saꞌay, qassi deꞌoy waani doommidee? giya oyshawu hanno gakkanawu saynisee zaaro demmibeennaagaa ha qofaappe akeekana danddayoos.

SHin, saꞌan deꞌiyaabay merettidaba gidikko, medhdhiday oonee? gaada qoppana danddayaasa. Kaallidi deꞌiya oyshatakka oychchennan aggakka: Aadhdhida eranchchanne siiqiya Medhdhidaagee deꞌikko, ba medhdhido asay tuggatanaadan I paqqadidoy aybissee? Dumma dumma gidida daro haymaanooteti deꞌiyoy aybissee? Xoossaayyo goynnays giyaageeti iita gidida keehi darobaa oottiyoy aybissee?

Saynisee ha oyshata zaarana danddayenna. SHin hegee neeni aliya zaaruwaa demmana danddayakka giyoogaa gidenna. Ubba, daro asay Geeshsha Maxaafaappe aliya zaaruwaa demmiis.

Geeshsha Maxaafaa xannaꞌida issi issi saynttistteti Medhdhidaagan ammaniyoy aybissakko eranawu koyikko jw.org websaytiyaa xomoosa. Deꞌuwa Doomettaabaa Yootido Qofaa giya kaalli kaalli kiyiya biiduwa koya.

SAYNISEENNE GEESHSHA MAXAAFAY ETI AMMANANAADAN OOTTIIS

Jorjji Niyekaliviyich Koydan, kemisttiriyaa eranchchaa

“Darotoo, taani molekiyuleta medhdhanawu dumma dumma keemikkaaleta walakkays. Taani hegaa oottanawu kasiyaa kaaluwan oosettiya darobaa halchchana bessees. Hegaappe issibaa dogikko, he molekiyulee moorettana danddayees. Ta oosoy muttumurettidaba gidikkokka, deꞌon deꞌiya seeletu giddon akeekanawu metiya keemikkaale molekiyuleti merettanaadan oottiya shaꞌan qoodettiya keemikkaale oosotuura gatti xeelliyo wode, taagee metennaba. Hegee nuuppe aaruwan Keemisttiriyaabaa eriya Xoossay deꞌana bessiyoogaa taani ammananaadan oottiis.

“Taani Geeshsha Maxaafaa xannaꞌiyo wode, I coo maxaafa gidennaagaa akeekaas. Geeshsha Maxaafay xaafetti wuroosappe 2,000 gidiya layttay aadhdhidaba gidikkonne, an deꞌiya zoree ha wodiyankka keehi maaddees gaada qoppays. So giddon, ooso sohuwaaninne shooron metoy merettiyo wode sigettiyoogaabaa I yootiyoobay keehippe maaddees. Hegaa mala loꞌꞌo zoree ooppenne aadhdhiya eranchchaappe yaana bessees gaada kuuyaas.”

Yen-De SHiyu, shahaaraabaa xannaꞌiyaagaa

“SHahaaray gitati gitati biyo wode, narbbiyaa, dibbaa, meqettaanne suuttaa seeleti, qassi bolla giddon deꞌiya harabati, wurssettan kumetta bolla gidanaadan ubba seeleti issoy issuwaara hashetana bessees. He seeleti waanidi asa gidiyaakko hanno gakkanawu nuuni erokko. Taani hegaa beꞌiyo wode, deꞌoy aadhdhida eranchchay giigissin yiidaba gidana bessees gaada qoppaas.

“SHahaaray aayee uluwan waanidi dicciyaakko Geeshsha Maxaafay Mazamure 139:15, 16n yootiyoobay, saynttistteti mata wode eridobaara issi mala gaada qoppays. Hegaa xaafidaagaayyo Medhdhidaagee qonccissibeennaba gidikko, daro layttappe kase hegaa mala suurebaa waatidi xaafana danddayii?”

Roseyo Pekado Herero: Kemisttiriyaa Asttamaariyaa Ba Ammanuwaabaa woyga Qonccissadee? (Amaarattuwaa) giya biiduwaa beꞌa. Biiduwaa huuphe yohuwaa jw.org saytiyan koya.