Yofttaahee Gelido Qaalaa

QAALAA gelada polanau metoota eray? Ha misiliyan deꞌiya bitanee hegaadan haniis, i azzanidoykka hegaassa. He bitanee Yofttaaha geetettiyaa Israaꞌeeletu xala daannaa.

Yofttaahee deꞌidoy Israaꞌeeleti Yihoowassi goynniyoogaa aggido wodiyaana. Eti zaarettidikka iitabaa oottidosona. Yaatin Yihooway Amoona asay eta qohanaadan oottiis. Hegee Israaꞌeeleti: ‘Nu ne bolli nagaraa oottida. Hayyanaa nuna ashsharkkii!’ yaagidi Yihoowakko waassanaadan oottiis.

Asay bantta oottido iitaban azzanidosona. Zaarettidi Yihoowassi goynniyoogan azzanidoogaa bessidosona. Hegaa gishshau, Yihoowaykka zaarettidi eta maaddiis.

He iita Amoona asata olanaadan asay Yofttaaha dooriis. He olan Yihooway bana maaddanaadan Yofttaahee keehi koyiis. Hegaa gishshau i Yihoowayyo: ‘Taani Amoonata xoonanaadan neeni oottikko, taani olan xoonada simmiyo wode, tana mokkanau ta sooppe kiyiya uraa neeyyo immana’ yaagidi qaalaa geliis.

Yihooway Yofttaahee gelido qaalaa siyidi, olan xoonanaadan a maaddiis. Yofttaahee soo simmiyo wode, a mokkanau sooppe koyro kiyiday oonakko eray? Kiyidaara ayyo mexi issi naꞌa gididaaro. Yofttaahee: ‘Poora ta naꞌee! Tana kaushsharggadasa. SHin taani Yihoowassi qaalaa gela uttaas; he qaalaa gelidobaa polennan agganau danddayikke!’ yaagidi yeekkiis.

Yofttaahe naꞌiyakka he i gelido qaalaabaa siyada koyro azzanaasu. He i gelido qaalay, a ba aawaanne ba laggeta aggada baanaadan oottiyaaba. SHin a ba deꞌo laytta ubban Seelon deꞌiya Yihoowa dunkkaaniyan oottanau deꞌausu. Hegaa gishshau a ba aawaayyo: ‘Yihoowassi neeni qaala gelidabaa gidikko, polana bessees’ yaagaasu.

Yaatiyo gishshau, Yofttaahe naꞌiyaa Seelo baada, ba deꞌido layttan Yihoowassi a dunkkaaniyan oottaydda deꞌaasu. Layttan layttan oyddu gallassaassi Israaꞌeele maccaasati o oychchanau yaa biidi, wodiya iira ufayssan aattoosona. A hegaadan Yihoowayyo oottiya loꞌꞌo asa gidiyo gishshau, asay Yofttaahe naꞌiyo siiqees.