Xoossaa SHenee Aybee?

Nuuni gannate saꞌan merinau sarotettaaninne ufayssan deꞌanaadan Xoossay koyees!

SHin, ‘Hegee waanidi hanana danddayii?’ gaada qoppana danddayaasa. Hegaa Xoossaa Kawotettay ehaanaagaa Geeshsha Maxaafay yootees; qassi he Kawotettaabaanne Xoossay asaa naatussi halchidobaa ubba asay eranaadan i koyees.—Mazamure 37:11, 29; Isiyaasa 9:7.

Nuuni goꞌettana mala Xoossay koyees.

Loꞌꞌo aaway ba naatussi kehabaa amottiyoogaadan, saluwan deꞌiya nu Aaway nuuni merinau ufayttanaadan koyees. (Isiyaasa 48:17, 18) “Xoossai giidoogaa oottiya urai merinau” deꞌanaagaa i yootiis.—1 Yohaannisa 2:17.

Xoossay nuuni ba ogiyan baana mala koyees.

Medhidaagee “nuuni baana mala, i nuna ba ogiyaa tamaarissana” koyiyoogaa Geeshsha Maxaafay yootees. (Isiyaasa 2:2, 3) I ba shenee saꞌa ubban erettana mala ba sunttau “haniya asaa” giigissiis.—Oosuwaa 15:14.

Xoossay nuuni goynuwan issuwaa gidana mala koyees.

Yihoowa tumu goynoy asaa shaakkiyoogaappe, eti tumu siiquwan issuwaa gidanaadan oottees. (Yohaannisa 13:35) Xoossaayyo issippetettan oottiyo ogiyaa ha wodiyan ubbasan deꞌiya attuma asaanne macca asaa tamaarissiiddi deꞌiyaageeti oonee? Ha brooshuriyaappe hegaa loyttada erana mala nena minttettoos.