Kawotettaa Hidootaa Ubbabaa Ooraxissiyoogaa

APPILIYAA ayfee malꞌꞌiyaagaa mittaappe duuttaasa. Keeshiyan deꞌiya hara appiliyaa bolli hegaa yegganaappe kase he sawuwaa tonggu giyaagaa singgaasa. Neeni daro saatiyaa ootta simmadakka daafurabeenna gishshawu, gujjada oottanawu koyaasa. Ne aayyiyaa intte so asaaranne ba laggetuura issi appiliyaa mittaa matan deꞌawusu; eti issippe ufayttiiddi appiliyaa maxoosonanne haasayoosona. A keehi yelaga; ubba neeni daro layttaappe kase naatettan eriyoogaappe dumma gidukku. Beni dogettida alamiyan a cimin neeni beꞌidoogaa ammananawu danddayabaakka. A sahettada keehi gilqqin beꞌadasa, a hayqqiyo wode i kushiyaa oyqqa uttadasa, qassi o moogiyo sohuwaa baada yeekkadasa. SHin, a hara darotuura hayquwaappe denddada haꞌꞌi payya deꞌawusu!

Hegaa mala wodee yaanaagaa eroos. Ayssi giikko, Xoossay qaalaa gelidobay ubbatoo polettees. Kawotettaa baggaara Yihooway oottana giido issi issibay mata wode, Armmageedoona olaappe kase waani polettanaakko ha shaahuwan nuuni beꞌana. Kawotettay hegaappe simmin oottana ufayssiyaabaappe amaridaagaakka nuuni zaarettana. Xoossa Kawotettay kumetta saꞌaa haarin ubbabay ooraxxiyoogaa beꞌiyo wode, nuuni keehi ufayttana!