PHawuloosa Roome Yeddiis

PHawuloosi sabbakanawu heezzanttuwaa biyo buussaa Yerusalaamen wurssiis. Yan i oyqettidi qashettiis. He galla qammi ajjuutan, Yesuusi assi, ‘Neeni Roome baana; baada yan sabbakana’ yaagiis. PHawuloosa Yerusalaameppe Qiisaariyaa efiidosona; i yan naaꞌꞌu laytta qashettiis. PHawuloosi Deriyaa Haariya Pisxxoosa sinttan shilootan eqqido wode, ‘Roomen, Qeesaari tabaa pirddo’ yaagiis. Pisxxoosi, “Neeni Qeesaari tabaa pirddo gaada oichchadasa; Qeesaarakko baasa” yaagiis. PHawuloosi Roome biya markkabiyan geliis; qassi Luqaasanne Arisxxirokoosa giyo naaꞌꞌu Kiristtaane ishantti aara biidosona.

Abban denddida wolqqaama beetay eti beennaadan daro gallassaa diggiis. Eti ubbay hayqqoos giidi qoppidosona. SHin PHawuloosi hagaadan giis: ‘Asatoo, issi kiitanchay taassi aymuwan hagaadan giis: “PHauloosaa, yayyoppa; neeni Roome baana; nenaara biya asa ubbaa shemppoy attana.” Minnite! Nuuni hayqqokko.’

Beetay 14 gallassawu goobidi takkiis. Wurssettan, biittay beettiis. Hegee maltta giyo haruuruwaa. Markkabee shafiyan domꞌꞌettidi meqerettiis; shin an deꞌiya 276 asay qohettennan gaxi kiyiis. Issoti issoti haattaa wadhidi, harati qassi markkabiyaa meꞌuwan gaxi kiyidosona. Malttan deꞌiya asay etawu koshshiyaabaa kunttiis; qassi eti hoꞌꞌanaadan tamaa eettidosona.

Heezzu aginappe guyyiyan, wotaaddarati PHawuloosa hara markkabiyan Roome efiidosona. I yaa gakkido wode, ishantti aara gayttanawu yiidosona. Eta beꞌidi, PHawuloosi Yihoowa galatiis; qassi minettiis. PHawuloosi qasho asa gidikkonne, i keraa ekkido keettan issi wotaaddaray naagishin deꞌennaadan digettibeenna. I hegan naaꞌꞌu laytta takkiis. Asay a beꞌanawu yaa bees; qassi i etawu Xoossaa Kawotettaabaa sabbakiis; qassi eta Yesuusabaa tamaarissiis. PHawuloosi Qeeri Isiyaaninne Yihudan deꞌiya galchchatussi dabddaabbetakka xaafiis. Yihoowi tumukka PHawuloosa baggaara daro biittaa asawu mishiraachoy odettanaadan oottiis.