Yesuusa—Asay Abaa Woygii?

“Naazireeta Yesuusi . . . taarikiyan erettida asa gidiyoogau siree baawa.” —H. G. Wels, Ingglize biittaa asa gidida taarikiyaa eranchaa.

“Taarikiyan erettida gooba asatu ubbaappe Kiristtoosi . . . dumma.” —Filip SHaaf, Suwidinen yelettida haymaanootiyaanne taarikiyaa eranchaa.

SAꞌAN deꞌida asa ubbaappe aadhiyaagaa geetettanau danddayiyay oonee? Issi ura gitatettaa aybin likkana koshshii? Gooba olancha gidiyoogaanee? Bollaa minotettaanee? Erancha gidiyoogaanee? Woykko, i yootidobaynne oottidobay asaa denttettidoogaaninne i etau leemiso gididoogaanee?

Naazireete asa gidida Yesuus Kiristtoosabaa, ha wodiyan deꞌiyaanne beni wode deꞌida, taarikiyaa eranchati, saynisiyaa eranchati, xaafeti, polotikan ayssiyaageetinne harati giidobaa akeeka:

“Ha naaꞌꞌu shaꞌu laytta xallan gidennan, asaa naatu taarikiyan deꞌida asaa ubbaappe aadhidi erettida uri—Naazireeta Yesuusa gidiyoogaa kashi gaanau issi uri naqaashata geellayana koshshees.”—Reynolds Prays, Amarkka biittaa xaafiyaanne Geeshsha Maxaafaa eranchaa.

“Issi keehippe geeshsha bitanee ba morkketa gujjin, haratu goꞌꞌau bana yarshsho oottidi aatti immiisinne alamiyaa woziis. Hegaa mala loꞌꞌo oosoy deꞌenna.”—Mohandas K. Ganddi, polotikaaninne haymaanootiyan Hindde biittaa kaalettidaagaa.

“Taassi naatettan, Geeshsha Maxaafaappenne Talmudiyaappe kaaletoy imettiis. Taani Ayhuda, shin Yesuusau deꞌiya dumma eeshshay tana ufayssees.”—Albert Anesttayn, Jarmanen yelettida sayinttisttiyaa.

“Yesuus Kiristtoosi Xoossaa Naꞌanne Asa Naꞌa gidiyoogaa taani qoppiyo wode, taarike wode ubban a mali baawa. I yootidobaynne oottidobay ubbay ha wodiyan nuna goꞌꞌiyaaba; deꞌuwan deꞌiya woykko hayqqida hara oonanne xeelliyaagan hegaadan gaana danddayettenna.”—SHolem Aash, Poolandde biittan yelettida xaafiyaa, Kiristtiyan Herald giyo gaazeexan kiyida qofaa; geddi oottidi xaafiday eta.

“Ta deꞌuwan 35 layttau aybiininne ammanenna asa gidada deꞌaas. Yesuusi tumuppe deꞌida asa gidiyoogaa ichashu layttappe kase ammanaas. Yesuus Kiristtoosa timirttiyaa ammanaas; qassi ta kumetta deꞌoy sohuwaara laamettiis.”—Liyo Tolisttoy, Ruusiyaa biitta xaafiyaanne palasppaa.

“Taarike wode ubban Yesuusaagaadan daro asaa deꞌuwaa laammida asi baawa; qassi gujji gujjidikka laammiiddi deꞌees.”—Kenet Skkoot Latuuret, Taarikiyaa eranchanne xaafe gidida Amarkka biitta asa.

“Yesuusa deꞌuwaabaa yootiya wonggeliyaa medhi ekkidi xaafidobadan qoppana koshshii? Ta laggiyau, hegee medhi ekkidi xaafidobaa milatennaagee qoncce. Hegaappe dumma hanotan, ooninne siranau malenna Soqiraaxisa taarikiyau Yesuus Kiristtoosaagaa mala loꞌꞌo naqaashi baawa.”—ZHan-ZHaak Russo, Paransaaye biittaa palasppaa.

Nuuni nu deꞌuwan kaallanau leemiso gidana danddayiya uri deꞌikko, hegee Yesuus Kiristtoosa gidiyoogee qoncce. Bana kaallanaadaaninne Babaa kawotettatussi yootanaadan Yesuusi doorido, koyro xeetu layttan deꞌida, tamaarida asa gidida PHauloosi, nuuni Yesuusa loyttidi ‘xeellanaadan’ zoriis. (Ibraawe 12:2; Oosuwaa 9:3) Nuuni waani deꞌanaakko Yesuusappe ay tamaarana danddayiyoo? A deꞌoy nena waati goꞌꞌana danddayii?