Hiyyeesatettay Xoossay Anjjennaagaa Bessiyaabee?
XOOSSAY beni wode Israaꞌeeletuyyo: “Intte giddon issi asinne hiyyeesenna” yaagiis. Hegaa giidoy, i etassi immido Higgiyan hiyyeesatussi qoppiyo ogiyaanne acuwaa maariyoogaa xeelliyaagan azazuwaa immido gishshataassa. (Zaarettido Wogaa 15:1-4, 7-10) Hegaappe denddidaagan, Yihooway eta anjjanau qaalaa gelido gishshau, Israaꞌeela asaa giddon hiyyeesi deꞌana koshshenna. Gidoppe attin, he anjjoy Israaꞌeeleti azazettennan aggido Muuse Higgiyau azazettiyoogan baasettidaba.
Gidikkokka, dureti Xoossay anjjidoogeeta giyoogaa gidennaagaadan, hiyyeesati Xoossay anjjibeennaageeta giyoogaa gidenna. Ammanettidi Xoossau oottidaageetuppe daroti aquwaaban hiyyeesa. Hananabaa yootiya Amoxi dorssaa heemmiyaanne ettaa ayfiyaa maxiya hiyyeesa asa. (Amoxa 1:1; 7:14) Hananabaa yootiya Eelaasa wode, Israaꞌeelen koshay denddido wode, iyyo deꞌiya guutta xiilleenne zaytee koshaa wode maalaalissiya hanotan baraatido issi hiyyeesa amꞌꞌee imatoy Eelaasassi koshshiis. Eelaasa gidin amꞌꞌiyo gidin, naaꞌꞌykka duretibookkona; Yihooway etau koshshiyaabaa xallaa immiis.—1 Kawotu 17:8-16.
Qoppennan gakkiyaabay asay issi kutti hiyyeesanaadan oottana danddayees. Daafaynne harggee issi uri guutta wodiyau woykko muleera oottennaadan diggana danddayees. Hayqoy naata aaya woy aawi baynnaageeta, maccaasaa qassi amꞌꞌe oottana danddayees. Hegaa mala iita hanotaykka gidin, Xoossay anjjibeennaagaa bessiyaaba gidenna. Naꞌoominne Uruti taarikee, Yihooway hiyyeesatuyyo koshshiyaabaa siiquwan kunttiyoogaa bessiya minttettiya leemiso. Naꞌoomanne Uruta bantta azinati hayqqin keehippe hiyyeesidaba gidikkokka, Xoossaa Yihooway eta anjjiisinne etau koshshiyaabaa kunttiis.—Uruto 1:1-6; 2:2-12; 4:13-17.
Hiyyeesatettay Xoossay anjjibeennaagaa bessiyaaba gidennaagee qoncce. Xoossaa Yihoowau ammanettiyaageeti, Kawuwaa Daawiti: “Taani kase yelaga; ha77i simmi cimaas; shin xillo asi coo attin, woikko a naati miyoobaa woossin, taani mulekka be7a erikke” yaagido qaalan ammanettana danddayoosona.—Mazamure 37:25.
[Sinttaa 8n deꞌiya misiliyaa]
Naꞌoomanne Uruta hiyyeesa gidikkokka, Xoossay eta anjjiisinne etau koshshiyaabaa siiquwan kunttiis