Nabbabiyaageetu Oyshaa

Leemiso 24:27 ppe ay timirtte demmiyoo?

Leemiso maxaafaa xaafidaagee issi yelagaa zoriiddi: “Kasetada ne gadiyaa ootta; kattaakka zera; hegaappe guyyiyan, ne keettaa keexxa” yaagiis. Geeshsha ayyaanaa kaaletuwan xaafettida ha leemisuwan deꞌiya qofay aybee? Issi asi machidi ba keettaa ayssiyoogaa doommanaappe kase, hegee kaalettiyo aawatettau bessiyaagaadan giigettana koshshiyoogaa yootees.

Kase, ha xiqisee issi issitoo issi azinay woy aaway ba oosuwaa oottiyoogaa xalla gidennan, leemisuwau, ba keettaa asau ayyaanaaban kaaletuwaa immiyoogan eta minttettana koshshiyoogaa malaatiyaabadan qoncciis. He qofay tumanne Geeshsha Maxaafay yootiyoobaara moggiyaaba gidikkonne, ha xiqisiyan qonccida waannabay hegaa milatenna. Aybissi? Naaꞌꞌu gaasota akeeka.

Koyruwan, ha xiqisee kase deꞌiya so asaa minttettiyoogaa yootenna. SHin hegau sitta birshshettay keettaa keexxiyoogaa malaatees. “Keexxa” yaagiya qaalay leemiso hanotan machidi naata yeliyoogaakka malaatana danddayees.

Naaꞌꞌanttuwan, “Hagaa ootta simmada hegaa ootta” giyoogaa mala hanotan, issibaa ootti simmidi harabaa oottiyoogaakka qonccissees. Yaatiyo gishshau, he leemisoy ayyaanaabaappe ashuwaabaa kaseyiyoogaa yootii? Hegaa yootennaagee qoncce!

Beni wode, issi asi ‘ba keettaa keexxanau’ woykko machidi ba keettaa ayssanau koyikko, ‘Taani ta macheeyyoonne geella guyyeppe yelettana naatuyyo koshshiyaabaa kunttanaunne eta kaafanau giigettidanaa?’ yaagidi bana oychana koshshees. I machanaappe kase, ba gadiyaa oottanaunne kattaa zeranau koshshees. Yaatiyo gishshau, Tudeys Inglish Vershin giyo Geeshsha Maxaafaa birshshettay ha xiqisiyaa: “Ne gadiyaa giigissada deꞌuwau koshshiyaabaa demmanaagaa ammanettennan deꞌaydda, ne keettaa keexxoppanne aqo oyqqoppa” yaagees. He baaso siraatay ha wodiyankka oottii?

Ee. Machanau koyiya asi he aawatettau bessiyaagaadan giigettana koshshees. Abbee deꞌiyaaba gidikko, i oottana koshshees. Issi asi ba keettaa asau minnidi oottiyoy, ashuwau koshshiyaabaa xallaassa gidennaagee tuma. Ba soo asau ashuwaaban, ayyaanaabaaninne qofan koshshiyaabaa kunttenna uri ammanenna asaappekka aadhida iita gidiyoogaa Xoossaa Qaalay yootees! (1 Ximootiyoosa 5:8) Hegaa gishshau, issi yelagay machanaunne ba keettaa ayssanau giigettiyo wode: ‘So asau ashuwaaban koshshiyaabaa kunttanau giigettidanaa? Keetta asaa ayyaanaaban kaalettanau giigettidanaa? Ta macheeranne ta naatuura ubbatoo Geeshsha Maxaafaa xannaꞌiyo aawatettaa kiyana danddayiyaanaa?’ yaagiyaagaa mala oyshaa bana oychana koshshees. Ha keehippe koshshiya aawatettaa xeelliyaagan, Xoossaa Qaalay minttidi yootees.—Zaarettido Wogaa 6:6-8; Efisoona 6:4.

Hegaa gishshau, machana koyiya issi yelagay Leemiso 24:27n deꞌiya baaso siraataa akeekan qoppana koshshees. Hegaadankka, issi yelagiyaa machonne aayo gidiyo aawatettau giigidaakkonne bana oychana koshshees. Yelaga azinaynne machiyaakka naata yelanau qoppiyo wode, hegaa mala oyshaa banttana oychana koshshees. (Luqaasa 14:28) Ayyaanay denttettin xaafettida hegaa mala kaaletuwaa kaalliyoogee Xoossaa asay daro azzanttiyaabaappe naagettanaadaaninne so asaa deꞌuwan ufayttanaadan maaddees.

[Sinttaa 10n deꞌiya misiliyaa]

Machiyoogaa xeelliyaagan issi yelagay bana ay oysha oychana koshshii?