Xoossaakko Shiiqa

Koyidobaa Dooranaadan Oottidi Nuna Bonchiis

2 KAWOTU 18:1-7

YELIDAAGEETI bantta naatuyyo loꞌꞌo leemiso gidana koshshees. Yelidaageeti loꞌꞌo leemiso gidiyoogee, naatuyyo loꞌꞌo eeshshay deꞌanaadaaninne eti bantta deꞌuwan eratetta dooruwaa dooranaadan maaddana danddayees. Daroti bantta naatuyyo iita leemiso gididoogee azzanttiyaaba. Hegaa mala naatu sinttanaa deꞌoy mooretti attees giyoogee? Hegaa zaaruwaa keehi minttettiyaabaappe, giishin Xoossaa Yihooway nuuni ubbay koyidobaa dooriyo maataa immidi nuna bonchidoogaappe akeekoos. Naaꞌꞌantto Kawotu 18:1-7n deꞌiya, Hizqqiyaasa hanotaa qoppite.

Hizqqiyaasi “Yihudaa Kawuwaa Akaaza” naꞌaa. (Paydo 1) Akaazi ba haariyo asati Yihoowa geeshsha goynuwaappe haakkanaadan oottiis. Ha iita kawoy, asaa yarshshiyo wogaa kaalliyo, Baala giyo eeqau goynniis. I Hizqqiyaasa ishatuppe issuwaa woy darota yarshshiis. Akaazi beeta maqidasiyaa penggeta gorddidi, “Yerusalaamen ubbasan baayyo yarshshiyo sohota essiis.” I Yihoowa “hanqqetissiis.” (2 Odi. 28:3, 24, 25) Hizqqiyaasa aaway keehi iita gidiyoogee qoncce. SHin Hizqqiyaasi ba aawaa mala gidennan agganau danddayii?

Hizqqiyaasi ba aawaa Akaaza sohuwan kawoti simmidi, ba aawaa iita leemisuwaa awudekka gidin kaallennaagaa sohuwaara bessiis. Hizqqiyaasi ubbatoo “GODAA sinttan suurebaa oottiis.” (Paydo 3) Hizqqiyaasi Yihoowan ammanettiis; qassi “Yihudaa kawotu ubbaa giddon a mala kawoi” denddibeenna. (Paydo 5) He yelaga kawoy kawotido laytti, eeqau goynniyo xoqqa sohota xayssidi, tumu goynuwaa zaaretti essiyoogaa doommiis. Beeta maqidasiyaa penggeti dooyettin, tumu goynoy zaarettidi doomettiis. (Paydo 4; 2 Odi. 29:1-3, 27-31) ‘Hizqqiyaasi Yihoowa baxuuxiis; Yihoowaykka aara issippe gidiis.’—Paydo 6, 7.

Hizqqiyaasi ba aawaa iita leemisuwaa kaallennaadan maaddidabay aybee? Ibaa xeelliyaagan eriyoobi guutta gidido a aayyiyaa Abiiya, ba naꞌau loꞌꞌo leemiso gidadeeshsha? Hizqqiyaasi yelettanaappe kase hananabaa yootiyoogaa doommida Isiyaasa loꞌꞌo leemisoy he yelagaa maaddideeshsha?a Geeshsha Maxaafay hegaa xeelliyaagan aybanne yootenna. Hanotay aybakka gido, issibay qoncce: Hizqqiyaasi ba aawaagaappe keehi dummatiya ogiyaa kaallanau dooriis.

Yelidaageeti loꞌꞌo leemiso gidennaagaappe denddidaagan iita hanotan diccida ubbatussi Hizqqiyaasa leemisoy keehi minttettiyaaba. Aadhida wodiyaa laammanau woy kase gakkida iitabaa xayssanau danddayokko. SHin hegaa malabay gakkido gishshau, nu sinttanaa deꞌoy mooretti attenna. Nuuni haꞌꞌi dooriyoobay sinttanaa deꞌoy ufayssiyaagaa gidanaadan oottana danddayees. Hizqqiyaasaagaadan tumu Xoossaa Yihoowa siiqanaunne ayyo goynnanau doorana danddayoos. Hegaadan oottiyoogee ha wodiyan ufayssiya deꞌuwaa deꞌanaadaaninne Xoossay ehiyo ooratta alamiyan merinaa deꞌuwaa demmanaadan oottees. (2 PHe. 3:13; Ajj. 21:3, 4) Alꞌꞌo imotaa, giishin koyidobaa dooriyo maataa immidi nuna bonchida, siiqiya Xoossaa keehippe galatana koshshees!

[Tohossa qofata]